عَدد 19

رُماد هنا البقرة الشقْرة

١ وَ اللّٰهْ قَالْ لِمُوسَى وَ هَارُونْ: ٢ «دَوْل هُمَّنْ قَوَانِينْ الشَّرِيعَةْ الْاللّٰهْ أَمَرْ بَيْهُمْ. قُولْ لِبَنِي إِسْرَائِيلْ يِجِيبُوا لَيْك بَقَرَةْ شَقْرَةْ مَا مُخَلْقَنَةْ وَ مَا عِنْدَهَا أَيِّ عَيْب وَ يَوْم وَاحِدْ كُلَ مَا حَرَتَوْا بَيْهَا. ٣ وَ الْبَقَرَةْ دِي سَلُّمُوهَا لِرَاجِلْ الدِّينْ أَلِعَازَرْ وَ يِوَدِّيهَا بَرَّا مِنْ الْفَرِيقْ وَ يَدْبَحَوْهَا قِدَّامَهْ.

٤ «هُو يِشِيلْ مِنْ دَمَّهَا بِأُصْبَعَهْ وَ يُرُشَّهْ سَبْعَةْ مَرَّاتْ عَلَيْ جِيهَةْ خَشُمْ خَيْمَةْ الْإِجْتِمَاعْ. ٥ وَ فِي قِدَّامْ رَاجِلْ الدِّينْ أَلِعَازَرْ، يِحَرُّقُوا الْبَقَرَةْ دِي كُلَّهَا كَيْ، فَرْوِتْهَا وَ لَحَمْهَا وَ دَمَّهَا وَ بَعَرْهَا كُلَ. ٦ وَ رَاجِلْ الدِّينْ يِشِيلْ عُودْ هَنَا أَرْز وَ فِرِعْ هَنَا زُوفَةْ وَ خَيْط أَحْمَرْ وَ يَزْقُلْهُمْ فِي النَّارْ الْقَاعِدَةْ تَحْرَقْ فَوْقهَا الْبَقَرَةْ. ٧ وَ رَاجِلْ الدِّينْ يِغَسِّلْ خُلْقَانَهْ وَ يِلْبَرَّدْ وَ بَعَدْ دَا، يِقَبِّلْ فِي الْفَرِيقْ وَ لَاكِنْ يَقْعُدْ نِجِسْ لَحَدِّي عَشِيَّةْ. ٨ وَ الْحَرَّقْ الْبَقَرَةْ كُلَ يِغَسِّلْ خُلْقَانَهْ وَ يِلْبَرَّدْ بِأَلْمِي وَ لَاكِنْ يَقْعُدْ نِجِسْ لَحَدِّي عَشِيَّةْ.

٩ «وَ نَادُمْ وَاحِدْ طَاهِرْ يُخُمّ الرُّمَادْ هَنَا الْبَقَرَةْ وَ يُخُطَّهْ بَرَّا مِنْ الْفَرِيقْ فِي بَكَانْ طَاهِرْ. وَ مُجْتَمَعْ بَنِي إِسْرَائِيلْ يَحْفَضَوْا الرُّمَادْ لِيِسَوُّوا بَيَّهْ أَلْمِي التَّطْهِيرْ الْيِسْتَعْمَلَوْه لِمَحِيِينْ الْخَطَا. ١٠ وَ النَّادُمْ الْيُخُمّ الرُّمَادْ هَنَا الْبَقَرَةْ، هُو كُلَ يِغَسِّلْ خُلْقَانَهْ وَ لَاكِنْ يَقْعُدْ نِجِسْ لَحَدِّي عَشِيَّةْ. وَ دَا يَبْقَى شَرْط دَايِمْ لِبَنِي إِسْرَائِيلْ وَ لِلْأَجْنَبِي السَّاكِنْ مَعَاهُمْ.

النادم اللِمِس جنازة يبْقى نِجِس

١١ «كَنْ نَادُمْ لِمِسْ جَنَازَةْ، هُو يَبْقَى نِجِسْ لِمُدَّةْ سَبْعَةْ يَوْم. ١٢ وَ النَّادُمْ دَا، خَلِّي يِطَهِّرْ نَفْسَهْ بِأَلْمِي التَّطْهِيرْ السَّوَّوْه بِرُمَادْ الْبَقَرَةْ فِي الْيَوْم التَّالِتْ وَ فِي الْيَوْم السَّابِعْ وَ بَيْدَا، هُو يُكُونْ طَاهِرْ. وَ لَاكِنْ كَنْ مَا يِطَهِّرْ نَفْسَهْ فِي الْيَوْم التَّالِتْ وَ الْيَوْم السَّابِعْ، هُو مَا يَبْقَى طَاهِرْ. ١٣ كَنْ نَادُمْ لِمِسْ جَنَازَةْ وَ مَا طَهَّرْ نَفْسَهْ، يِنَجِّسْ خَيْمَةْ اللّٰهْ. وَ النَّادُمْ دَا وَاجِبْ يَفْصُلُوهْ مِنْ بَنِي إِسْرَائِيلْ أَشَانْ هُو مَا رَشَّوْه بِأَلْمِي التَّطْهِيرْ وَ هُو نِجِسْ وَ قَاعِدْ بِنَجَاسْتَهْ.

١٤ «وَ دَاهُو قَانُونْ الْبُخُصّ النَّادُمْ الْيُمُوتْ فِي الْخَيْمَةْ. وَ فِي الْحَالَةْ دِي، أَيِّ نَادُمْ الْيَدْخُلْ فِي الْخَيْمَةْ دِي أَوْ قَاعِدْ فَوْقهَا يَبْقَى نِجِسْ لِمُدَّةْ سَبْعَةْ يَوْم. ١٥ وَ أَيِّ مَاعُونْ مَفْتُوحْ الْمَا عِنْدَهْ سِدَادَةْ مَسْدُودَةْ فَوْقَهْ كُلَ يُكُونْ نِجِسْ.

١٦ «أَيِّ نَادُمْ كَنْ مَاشِي فِي الْكَدَادَةْ وَ لِمِسْ نَادُمْ مَكْتُولْ بِالْسَّيْف أَوْ لِمِسْ نَادُمْ مَيِّتْ مَوْت سَاكِتْ أَوْ لِمِسْ عُضَامْ هَنَا نَادُمْ أَوْ لِمِسْ قَبُرْ، النَّادُمْ دَا يَبْقَى نِجِسْ لِمُدَّةْ سَبْعَةْ يَوْم. ١٧ وَ لِلنَّادُمْ الْمَا طَاهِرْ دَا، يِشِيلُوا مِنْ رُمَادْ الْبَقَرَةْ الْحَرَّقَوْهَا لِكَفَّارَةْ الذَّنِبْ وَ يُصُبُّوهْ فِي مَاعُونْ وَ يُصُبُّوا فَوْقَهْ أَلْمِي نَضِيفْ. ١٨ وَ رَاجِلْ وَاحِدْ طَاهِرْ يِشِيلْ فِرِعْ هَنَا زُوفَةْ وَ يِدِسَّهْ فِي الْأَلْمِي دَا وَ يُرُشّ بَيَّهْ الْخَيْمَةْ وَ كُلَّ الْمَوَاعِينْ وَ كُلَّ النَّاسْ الْقَاعِدِينْ فِي لُبَّهَا. وَ يُرُشّ النَّادُمْ اللِّمِسْ عُضَامْ هَنَا نَادُمْ مَيِّتْ أَوْ لِمِسْ نَادُمْ مَكْتُولْ بِالْسَّيْف أَوْ لِمِسْ نَادُمْ مَيِّتْ مَوْت سَاكِتْ أَوْ لِمِسْ قَبُرْ. ١٩ وَ الرَّاجِلْ الطَّاهِرْ يُرُشّ النَّادُمْ النِّجِسْ فِي الْيَوْم التَّالِتْ وَ الْيَوْم السَّابِعْ. وَ فِي الْيَوْم السَّابِعْ دَا، خَطَايَهْ يِنْمَحِي. وَ بَعَدْ دَا، يِغَسِّلْ خُلْقَانَهْ وَ يِلْبَرَّدْ وَ بِعَشِيَّةْ هُو يَبْقَى طَاهِرْ. ٢٠ وَ لَاكِنْ النَّادُمْ النَّجَّسْ نَفْسَهْ وَ مَا طَهَّرْهَا، وَاجِبْ يَفْصُلُوهْ مِنْ الشَّعَبْ أَشَانْ هُو نَجَّسْ الْبَيْت الْمُقَدَّسْ هَنَا اللّٰهْ. وَ النَّادُمْ دَا قَاعِدْ بِنَجَاسْتَهْ أَشَانْ مَا رَشَّوْه بِأَلْمِي التَّطْهِيرْ.

٢١ «وَ دَا يَبْقَى لَيْهُمْ شَرْط دَايِمْ. وَ النَّادُمْ الْيُرُشّ أَلْمِي التَّطْهِيرْ دَا، وَاجِبْ يِغَسِّلْ خُلْقَانَهْ. وَ كَنْ نَادُمْ لِمِسْ أَلْمِي التَّطْهِيرْ دَا، يُكُونْ نِجِسْ لَحَدِّي عَشِيَّةْ. ٢٢ أَيِّ شَيّءْ الْيِلَمِّسَهْ النَّادُمْ النِّجِسْ دَا، يُكُونْ نِجِسْ وَ النَّادُمْ لِمِسْ نَادُمْ نِجِسْ، هُو كُلَ يُكُونْ نِجِسْ لَحَدِّي عَشِيَّةْ.»