خُروج 23

قوانين الشريعة

١ «مَا تَنْقُلْ الْقُوَالَةْ بَيْن النَّاسْ. مَا تَشْهَدْ بِكِدِبْ أَشَانْ تَنْصُرْ الْخَاطِي. ٢ مَا تِعَاوِنْ الْكَتِيرِينْ كَنْ هُمَّنْ يِدَوْرُوا يِسَوُّوا شَيّءْ فَسِلْ. وَ فِي الشَّرِيعَةْ، مَا تِتَلِّفْ شَهَادْتَكْ لِتِسْتَفِقْ مَعَ الْكَتِيرِينْ. ٣ وَ مَا تِعَاوِنْ الْمِسْكِينْ كُلَ فِي الشَّرِيعَةْ أَشَانْ هُو مِسْكِينْ بَسْ.

٤ «وَ كَنْ لِقِيتْ تَوْر هَنَا عَدُوكْ أَوْ حُمَارَهْ مُوَدِّرْ، وَدِّيهْ لَيَّهْ. ٥ وَ كَنْ شِفْت حُمَارْ هَنَا نَادُمْ الْيَكْرَهَكْ وَاقْعِ تِحِتْ حِمْلَهْ، مَا تِخَلِّيهْ وَ تَمْشِي. وَ لَاكِنْ أَرْفَعَهْ مَعَايَهْ.

٦ «مَا تَظْلُمْ الْمِسْكِينْ وَ تِدَنْقِسْ الشَّرِيعَةْ. ٧ مَا تَتْهَمْ إِنْسَانْ بِكِدِبْ. وَ مَا تَحْكِمْ بِالْمَوْت لِلْإِنْسَانْ الْبَرِي أَوْ الصَّالِحْ. النَّادُمْ الْفَسِلْ السَّوَّى مِثِلْ دَا، أَنَا اللّٰهْ مَا نَجْعَلَهْ صَالِحْ. ٨ مَا تَقْبَلْ رَشْوَةْ أَشَانْ هِي تَعَمِي عُيُونْ الْمَسَائِيلْ وَ تِعَوِّجْ كَلَامْ الصَّالِحِينْ.

٩ «مَا تَظْلُمْ الْغَرِيبْ. إِنْتُو تَعَرْفُوا عِيشَةْ الْغَرِيبْ أَشَانْ إِنْتُو كُلَ أَوَّلْ عِشْتُوا غَرِيبِينْ فِي مَصِرْ.

السنة السابْعة و اليوم السابِع

١٠ «فِي سِتَّةْ سَنَةْ، أَحْرِتْ زَرْعَكْ وَ أَقْطَعْ إِنْتَاجَهْ. ١١ وَ فِي السَّنَةْ السَّابْعَةْ، خَلِّي يُبُورْ وَ يُقُمّ بَنْدَرْ. وَ مِنْ الْبَنْدَرْ دَا، يَاكُلُوا مَسَاكِينْ شَعَبَكْ. وَ الْفَضَّلْ كَمَانْ، يَاكُلُوهْ حَيْوَانَاتْ الْكَدَادَةْ. وَ تِسَوِّي نَفْس الشَّيّءْ فِي زَرْعَكْ هَنَا الْعِنَبْ وَ الزَّيْتُونْ.

١٢ «أَخْدِمْ مُدَّةْ سِتَّةْ يَوْم. وَ فِي الْيَوْم السَّابِعْ كَمَانْ، أَنْجَمَّ أَشَانْ تَوْرَكْ وَ حُمَارَكْ كُلَ يِنْجَمَّوْا وَ الْغَرِيبْ الْقَاعِدْ مَعَاكْ وَ عَبْدَكْ كُلَ يِنْجَمَّوْا.

١٣ «سَوُّوا كُلَّ شَيّءْ الْقُلْتَهْ لَيْكُو. وَ مَا تِحَجُّوا بِأُسُمْ إِلٰـهْ آخَرْ وَ لَا يِنْسَمِعْ فِي خُشُومْكُو.

تلاتة عيد في السنة

١٤ «عَيُّدُوا لَيِّ تَلَاتَةْ مَرَّاتْ فِي السَّنَةْ. ١٥ عَيُّدُوا عِيدْ الْخُبْزَةْ بَلَا تَوَّارَةْ. فِي سَبْعَةْ يَوْم، تَاكُلُوا خُبْزَةْ بَلَا تَوَّارَةْ مِثِلْ أَنَا أَمَرْتُكُو. وَ دَا فِي وَكِتْ الْمُحَدَّدْ فِي شَهَرْ الْقَنَادِيلْ الشَّهَرْ الْإِنْتُو مَرَقْتُوا بَيَّهْ مِنْ بَلَدْ مَصِرْ. مَا تَجُوا قِدَّامِي إِيدَيْكُو يَابْسِينْ.

١٦ «وَ بَعَدْ دَا، عَيُّدُوا عِيدْ الْقَطِعْ وَ قَدُّمُوا لَيِّ أَوَّلْ إِنْتَاجْ الْقَطَعْتُوهْ مِنْ زِرَاعِتْكُو التَّيْرَبْتُوهُمْ. وَ بَعَدْ دَا، عَيُّدُوا عِيدْ اللَّمِّينْ فِي كُمَالَةْ السَّنَةْ وَكِتْ إِنْتُو تِلِمُّوا فَوْقَهْ إِنْتَاجْ زِرَاعِتْكُو. ١٧ وَ تَلَاتَةْ مَرَّاتْ فِي السَّنَةْ، أَيِّ دَكَرْ مِنْكُو يَجِي قِدَّامِي أَنَا اللّٰهْ الرَّبّ لِيَعَبُدْنِي.

١٨ «مَا تِقَدُّمُوا لَيِّ دَمّ الضَّحِيَّةْ مَعَ أَيِّ شَيّءْ الْعِنْدَهْ تَوَّارَةْ. وَ مَا تِخَلُّوا شَحَمْ ضَحِيَّةْ الْعِيدْ يَرْقُدْ لَحَدِّي فَجُرْ. ١٩ وَ قَدُّمُوا أَوَّلْ إِنْتَاجْ زِرَاعِتْكُو لِبَيْت اللّٰهْ إِلٰـهْكُو.

«وَ مَا تِرَكُّبُوا لَحَمْ السَّخَلْ فِي لَبَنْ أَمَّهْ.

اللّه أنْطى وعد لشعبه

٢٠ «شِيفُوا، أَنَا نِرَسِّلْ مَلَكْ يَمْشِي قِدَّامْكُو فِي الدَّرِبْ وَ يَحْفَضْكُو. وَ يِوَدِّيكُو فِي الْبَكَانْ الْأَنَا جَهَّزْتَهْ لَيْكُو. ٢١ فَكُّرُوا فَوْقَهْ وَ تَابُعُوا كَلَامَهْ وَ مَا تَعَصَوْه أَشَانْ هُو مَا يِسَامِحْ عِصْيَانْكُو أَشَانْ هُو يِمَثِّلْنِي. ٢٢ وَ لَاكِنْ كَنْ تِطِيعُوهْ وَ تِسَوُّوا كُلَّ شَيّءْ حَسَبْ كَلَامِي، أَنَا نَبْقَى عَدُو لِعُدْوَانْكُو وَ نِضَايِقْ الْيِضَايُقُوكُو. ٢٣ وَ مَلَكِي يَمْشِي قِدَّامْكُو وَ يِوَدِّيكُو فِي بَلَدْ الْأَمُورِيِّينْ وَ الْحِتِّيِّينْ وَ الْفِرِزِّيِّينْ وَ الْكَنْعَانِيِّينْ وَ الْحِوِّيِّينْ وَ الْيَبُوسِيِّينْ وَ نِدَمِّرْهُمْ. ٢٤ مَا تَسْجُدُوا لِإِلٰـهَاتْهُمْ وَ لَا تَعَبُدُوهُمْ وَ لَا تِسَوُّوا الشَّيّءْ الْهُمَّنْ قَاعِدِينْ يِسَوُّوهْ. لَاكِنْ أَرْمُوا وَ دَمُّرُوا الْحُجَارْ الْغَزَّوْهُمْ لِلْعِبَادَةْ. ٢٥ أَعَبُدُونِي أَنَا اللّٰهْ إِلٰـهْكُو وَ نِبَارِكْ أَكِلْكُو وَ شَرَابْكُو وَ نَمْرُقْ الْمَرَضْ مِنْ أُسُطْكُو. ٢٦ وَ فِي بَلَدْكُو، مَا فِي أَيِّ مَرَةْ التَّبْقَى عَاقْرَةْ وَ لَا تَرْمِي صَغِيرْهَا. وَ نَنْطِيكُو عُمُرْ طَوِيلْ.

٢٧ «وَ نِرَسِّلْ الْخَوْف لِكُلِّ أُمَّةْ التَّقِيفْ قِدَّامْكُو أَشَانْ تِبَرْجِلْ وَ تَجْرِي مِنْكُو. ٢٨ وَ نِرَسِّلْ النَّحَلَةْ قِدَّامْكُو لِتَطْرُدْهُمْ لِلْحِوِّيِّينْ وَ الْكَنْعَانِيِّينْ وَ الْحِتِّيِّينْ. ٢٩ لَاكِنْ أَنَا مَا نَطْرُدْهُمْ مَرَّةْ وَاحِدْ فِي سَنَةْ وَاحِدَةْ أَشَانْ الْبَلَدْ مَا تَبْقَى خَرَابْ وَ حَيْوَانَاتْ الْكَدَادَةْ يَبْقَوْا كَتِيرِينْ وَ يُقُمُّوا ضِدُّكُو. ٣٠ أَنَا نَطْرُدْهُمْ شِيَّةْ شِيَّةْ لَحَدِّي إِنْتُو تَبْقَوْا كَتِيرِينْ وَ تَوْرُثُوا الْبَلَدْ. ٣١ وَ نِسَوِّي حُدُودْكُو مِنْ الْبَحَرْ الْأَحْمَرْ لَحَدِّي الْبَحَرْ الْأَبْيَضْ وَ مِنْ الصَّحَرَاء لَحَدِّي بَحَرْ الْفُرَاتْ. نِدِسّ فِي إِيدَيْكُو سُكَّانْ الْبَلَدْ وَ تَطُرْدُوهُمْ قِدَّامْكُو. ٣٢ مَا تِسَوُّوا عَلَاقَةْ مَعَاهُمْ وَ لَا مَعَ إِلٰـهَاتْهُمْ. ٣٣ مَا تِخَلُّوهُمْ يَسْكُنُوا فِي بَلَدْكُو مَعَاكُو أَشَانْ يِلِزُّوكُو تِسَوُّوا ذَنِبْ قِدَّامِي. أَشَانْ كَنْ إِنْتُو عَبَدْتُوا إِلٰـهَاتْهُمْ، دَا يَبْقَى لَيْكُو شَرَكْ.»