خُروج 21

الشُروط البُخُصّوا العبيد

١ «وَ دَوْل الشُّرُوطْ التَّنْطِيهُمْ لِبَنِي إِسْرَائِيلْ. ٢ كَنْ شَرَيْتُوا عَبِدْ عِبْرَانِي، خَلِّي يَخْدِمْ لَيْكُو سِتَّةْ سَنَةْ وَ فِي السَّنَةْ السَّابْعَةْ، يُكُونْ حُرّ وَ دَا بَلَا مَا يِكَفِّي لَيْكُو شَيّءْ. ٣ وَ كَنْ جِبْتُوهْ وِحَيْدَهْ، تِخَلُّوهْ يَمْشِي وِحَيْدَهْ. وَ كَنْ جِبْتُوهْ بِمَرَةْ، تِخَلُّوهْ يَمْشِي مَعَاهَا سَوَا. ٤ وَ كَنْ جِبْتُوهْ وَ إِنْتُو بَسْ أَنْطَيْتُوهْ مَرَةْ وَ وِلْدَتْ لَيَّهْ أَوْلَادْ أَوْ بَنَاتْ، الْعِيَالْ وَ أَمُّهُمْ يِفَضُّلُوا لَيْكُو وَ أَبُوهُمْ كَمَانْ يَمْشِي وِحَيْدَهْ. ٥ وَ لَاكِنْ كَنْ الْعَبِدْ قَالْ: ‹أَنَا نِرِيدْ سِيدِي وَ مَرْتِي وَ عِيَالِي وَ مَا نِدَوْر نَبْقَى حُرّ›، ٦ فِي الْبَكَانْ دَا سِيدَهْ يِشِيلْ الْعَبِدْ وَ يِوَدِّيهْ قِدَّامْ الرَّبّ وَ يِقَرِّبَهْ لِلْبَابْ أَوْ لِعُودْ الْبَابْ وَ يِقِدّ أَدَانَهْ بِمُخْرَصْ. وَ يَقْعُدْ يَخْدِمْ لَيَّهْ إِلَى الْأَبَدْ.

٧ «وَ كَنْ رَاجِلْ بَاعْ بِنَيِّتَهْ مِثِلْ خَادِمْ هِي مَا يَطُلْقُوهَا حُرَّةْ مِثِلْ الرَّاجِلْ الْعَبِدْ. ٨ وَ كَنْ الْبِنَيَّةْ دِي مَا عَجَبَتْ سِيدْهَا الشَّرَاهَا لِتَبْقَى لَيَّهْ مَرَةْ، هُو مَا يِبِيعْهَا لِلْأَجَانِبْ أَشَانْ دَا مِثِلْ هُو خَانْهَا. خَلِّي أَهَلْهَا يَفْدَوْهَا. ٩ وَ كَنْ شَرَاهَا لِيِجَوِّزْهَا لِوِلَيْدَهْ، دَا خَلِّي يِعَامِلْهَا مِثِلْ بِنَيِّتَهْ. ١٠ وَ كَنْ سِيدْهَا أَخَدْ مَرَةْ آخَرَةْ، خَلِّي مَا يَنْقُصْ أَكِلْهَا وَ لَا لُبَاسْهَا وَ لَا لَيْلِتْهَا. ١١ وَ كَنْ وَاحِدْ مِنْ الْأَشْيَاءْ التَّلَاتَةْ دَوْل نَقَصْ، هِي تَمْشِي حُرَّةْ مِنْ دُونْ تِكَفِّي شَيّءْ.

الجرايِم اليجيبوا المَوْت

١٢ «وَ كَنْ نَادُمْ ضَرَبْ إِنْسَانْ وَ كَتَلَهْ، وَاجِبْ هُو كُلَ يَكْتُلُوهْ. ١٣ وَ لَاكِنْ كَنْ كَتَلَهْ بَلَا رَايْه وَ الشَّيّءْ دَا الرَّبّ بَسْ جَعَلَهْ لَيَّهْ، خَلِّي يَمْشِي فِي الْبَكَانْ الْأَنَا اللّٰهْ نِحَدِّدَهْ لِيَلْجَأْ فَوْقَهْ. ١٤ وَ كَنْ نَادُمْ يُقُمّ بِنِيّتَهْ ضِدّ جَارَهْ وَ يَكْتُلَهْ بِنَجَاضَةْ، هُو دَا يِشِيلُوهْ وَ يَكْتُلُوهْ حَتَّى كَانْ لَجَأْ فِي مَدْبَحِي كُلَ.

١٥ «وَ كَنْ نَادُمْ ضَرَبْ أَمَّهْ أَوْ أَبُوهْ، وَاجِبْ يَكْتُلُوهْ.

١٦ «وَ كَنْ نَادُمْ خَطَفْ إِنْسَانْ وَ بَاعَهْ أَوْ لِقَوْه مَكْرُوبْ فِي بَيْتَهْ، الْخَاطِفْ دَا وَاجِبْ يَكْتُلُوهْ.

١٧ «وَ كَنْ نَادُمْ عَيَّرْ أَمَّهْ أَوْ أَبُوهْ، وَاجِبْ يَكْتُلُوهْ.

قانون الجرايِم الآخرين

١٨-١٩ «كَنْ رُجَالْ إِتْنَيْن أَلْهَارَجَوْا وَ الْوَاحِدْ ضَرَبْ الْآخَرْ بِحَجَرْ أَوْ بِإِيدَهْ وَ مَا كَتَلَهْ لَاكِنْ هُو رَقَدْ مَرْضَانْ وَ مَا يَقْدَرْ يُقُمّ بَرَّا إِلَّا بِعَصَاةْ، فِي الْبَكَانْ دَا النَّادُمْ الضَّرَبْ دَا، مَا يِعَاقُبُوهْ. لَاكِنْ وَاجِبْ يِكَفِّي لِلْمَرْضَانْ مُدَّةْ الْأَيَّامْ الْهُو رَقَدَاهُمْ وَ يِكَفِّي الْعِلَاجْ كُلَ.

٢٠ «وَ كَنْ نَادُمْ ضَرَبْ عَبْدَهْ أَوْ خَادْمَهْ بِعَصَاةْ وَ كَتَلَهْ، وَاجِبْ يِعَاقُبُوهْ. ٢١ لَاكِنْ كَنْ قَعَدْ يَوْم أَوْ يَوْمَيْن حَتَّى مَاتْ، السِّيدْ مَا يِعَاقُبُوهْ أَشَانْ الْعَبِدْ أَوْ الْخَادِمْ دَا هُو شَرَاهْ بِقُرْسَهْ.

٢٢ «وَ كَنْ نَاسَيْن أَدَّاوَسَوْا وَ وَقَعَوْا فَوْق مَرَةْ غَلْبَانَةْ وَ هِي رَمَتْ صَغِيرْهَا لَاكِنْ هِي عَافَيْ، فِي الْبَكَانْ دَا النَّادُمْ الْوَقَعْ فَوْقهَا يِكَفِّي الدِّيَّةْ الرَّاجِلْهَا يَطُلْبَهْ مِنَّهْ بِمُوَافَقَةْ الْقَاضِي. ٢٣ وَ لَاكِنْ كَنْ الْمَرَةْ دِي مَاتَتْ أَوْ حَسَّتْ، سَوِّي حَسَبْ الْقَانُونْ الْبُقُولْ النَّفِسْ بِالنَّفِسْ ٢٤ وَ الْعَيْن بِالْعَيْن وَ السِّنّ بِالسِّنّ وَ الْإِيدْ بِالْإِيدْ وَ الرِّجِلْ بِالرِّجِلْ ٢٥ وَ الْحَرَاقْ بِالْحَرَاقْ وَ الْجِرَاحْ بِالْجِرَاحْ وَ الضَّرْبَةْ بِالضَّرْبَةْ.

٢٦ «وَ كَنْ نَادُمْ سَلَّ عَيْن عَبْدَهْ أَوْ خَادْمَهْ، وَاجِبْ يِخَلِّيهْ يَمْشِي حُرّ أَشَانْ هُو سَلَّ عَيْنَهْ. ٢٧ وَ كَنْ كَسَرْ سِنّ عَبْدَهْ أَوْ خَادْمَهْ، وَاجِبْ يِخَلِّيهْ يَمْشِي حُرّ أَشَانْ هُو كَسَرْ سِنَّهْ.

٢٨ «وَ كَنْ تَوْر طَعَنْ رَاجِلْ أَوْ مَرَةْ وَ كَتَلَهْ، التَّوْر دَا وَاجِبْ يَرْجُمُوهْ. وَ لَحَمَهْ كُلَ مَا يَاكُلُوهْ. وَ سِيدْ التَّوْر دَا يُكُونْ بَرِي. ٢٩ وَ لَاكِنْ كَنْ التَّوْر دَا أَوَّلْ كُلَ مَعْرُوفْ يَطْعَنْ النَّاسْ وَ النَّاسْ حَذَّرَوْا سِيدَهْ وَ سِيدَهْ مَا حَفَضَهْ وَ هُو طَعَنْ رَاجِلْ أَوْ مَرَةْ وَ كَتَلَهْ، فِي الْبَكَانْ دَا التَّوْر يَرْجُمُوهْ وَ سِيدَهْ كُلَ وَاجِبْ يَكْتُلُوهْ. ٣٠ وَ كَنْ طَلَبَوْا مِنَّهْ دِيَّةْ لِيَفْدَى بَيْهَا نَفْسَهْ، وَاجِبْ يَنْطِي الدِّيَّةْ الطَّلَبَوْهَا مِنَّهْ. ٣١ وَ نَفْس الْحُكُمْ دَا يَحْكُمُوا بَيَّهْ لِلتَّوْر الطَّعَنْ بِنَيَّةْ أَوْ وِلَيْد. ٣٢ وَ كَنْ التَّوْر طَعَنْ عَبِدْ أَوْ خَادِمْ، سِيدَهْ يِكَفِّي لِسِيدْ الْعَبِدْ أَوْ الْخَادِمْ 30 حَجَرْ فُضَّةْ وَ التَّوْر دَا، يَرْجُمُوهْ.

٣٣ «وَ كَنْ نَادُمْ فَكَّ بِيرْ أَوْ نَكَتْ بِيرْ وَ خَلَّاهَا فَاتْحَةْ وَ وَقَعْ فَوْقهَا تَوْر أَوْ حُمَارْ، ٣٤ سِيدْ الْبِيرْ دَا يِكَفِّي تَمَنْ التَّوْر أَوْ الْحُمَارْ لِسِيدَهْ. وَ سِيدْ الْبِيرْ كَمَانْ يِشِيلْ الْبَهِيمَةْ الْمَيْتَةْ.

٣٥ «كَنْ تَوْر طَعَنْ تَوْر هَنَا نَادُمْ آخَرْ وَ كَتَلَهْ، سِيَادْ التِّيرَانْ الْإِتْنَيْن دَوْل يِبِيعُوا التَّوْر الْحَيّ وَ يِلْقَاسَمَوْا تَمَنَهْ وَ التَّوْر الْمَيِّتْ كُلَ يِلْقَاسَمَوْه. ٣٦ وَ لَاكِنْ كَنْ التَّوْر دَا أَوَّلْ مَعْرُوفْ يَطْعَنْ وَ سِيدَهْ مَا حَفَضَهْ عَدِيلْ، فِي الْبَكَانْ دَا سِيدْ التَّوْر الطَّعَنْ يِكَفِّي التَّوْر. وَ هُو يِشِيلْ التَّوْر الْمَيِّتْ.»