خُروج 14

١ وَكِتْ هُمَّنْ فِي إِتَامْ، اللّٰهْ حَجَّى لِمُوسَى وَ قَالْ: ٢ «قُولْ لِبَنِي إِسْرَائِيلْ خَلِّي يِقَبُّلُوا شِيَّةْ وَ يَقْعُدُوا قِدَّامْ خَشُمْ الْحِرُوتْ. وَ دَا أَمْبَيْن مِقْدُولْ وَ الْبَحَرْ، مُقَابِلْ بَعْل صَفُونْ. وَ فِي الْبَكَانْ دَا بَسْ، إِنْتُو تَنْزُلُوا جَنْب الْبَحَرْ. ٣ وَ خَلَاصْ، فِرْعَوْن مَلِكْ مَصِرْ يِفَكِّرْ وَ يُقُولْ: ‹دَاهُو بَنِي إِسْرَائِيلْ وَدَّرَوْا فِي الْكَدَادَةْ وَ الصَّحَرَاء سَجَنَتْهُمْ.› ٤ وَ بَتَّانْ أَنَا نِقَوِّي رَاسْ فِرْعَوْن وَ هُو يَمْشِي وَرَاكُو لِيَكْرُبْكُو. وَ بَيْدَا، أَنَا نِوَصِّفْ قُدُرْتِي الْمَجِيدَةْ بَيَّهْ هُو وَ عَسْكَرَهْ. وَ مِثِلْ دَا، كُلَّ الْمَصْرِيِّينْ يَعَرْفُوا كَدَرْ أَنَا بَسْ اللّٰهْ.» وَ بَنِي إِسْرَائِيلْ مَشَوْا نَزَلَوْا فِي الْبَكَانْ دَا مِثِلْ اللّٰهْ أَمَرَاهُمْ.

المصْريّين مشوا وراء بني إسرائيل

٥ وَكِتْ فِرْعَوْن مَلِكْ مَصِرْ سِمِعْ كَدَرْ بَنِي إِسْرَائِيلْ عَرَّدَوْا مِنَّهْ، طَوَّالِي لَمَّ خَدَّامِينَهْ وَ غَيَّرَوْا فِكِرْهُمْ وَ قَالَوْا: «شُنُو الْأَنِحْنَ سَوَّيْنَا دَا؟ خَلَّيْنَا بَنِي إِسْرَائِيلْ مَرَقَوْا مِنْ بَلَدْنَا. وَدَّرْنَا الْإِيدْ التَّخْدِمْ لَيْنَا!» ٦ وَ الْمَلِكْ شَالْ عَرَبَاتَهْ هَنَا الْحَرِبْ وَ كُلَّ عَسْكَرَهْ. ٧ شَالْ 600 عَرَبَاتْ حَرِبْ مِنْ النَّوْع الْعَدِيلْ وَ الْعَرَبَاتْ الْآخَرِينْ هَنَا الْمَصْرِيِّينْ كَمَانْ تَابَعَوْهُمْ بِوَرَاءْ. وَ فِي أَيِّ وَاحِدَةْ فِيَّهْ ظَابِطْ. ٨ وَ اللّٰهْ قَوَّى رَاسْ مَلِكْ مَصِرْ أَشَانْ يَمْشِي وَرَاءْ بَنِي إِسْرَائِيلْ الْمَرَقَوْا وَ مَاشِينْ فَرْحَانِينْ بِحُرِّيِّتْهُمْ. ٩ الْمَصْرِيِّينْ مَشَوْا وَرَاءْ بَنِي إِسْرَائِيلْ بِكُلَّ خَيْل الْمَلِكْ وَ عَرَبَاتَهْ وَ سِيَادْهُمْ وَ كُلَّ دَيْشَهْ. وَ لِحْقَوْهُمْ لِبَنِي إِسْرَائِيلْ فِي الْبَكَانْ الْهُمَّنْ نَزَلَوْا فَوْقَهْ جَنْب الْبَحَرْ فِي خَشُمْ الْحِرُوتْ مُقَابِلْ بَعْل صَفُونْ.

١٠ وَكِتْ مَلِكْ مَصِرْ قَاعِدْ يِقَرِّبْ لَيْهُمْ، بَنِي إِسْرَائِيلْ شَافَوْا مِنْ بَعِيدْ الْمَصْرِيِّينْ جَايِينْ وَرَاهُمْ. وَ مِنْ شِدَّةْ الْخَوْف، عَاطَوْا وَ قَالَوْا: «يَا اللّٰهْ، نَجِّينَا!» ١١ وَ فِي الْبَكَانْ دَا، لَامَوْه لِمُوسَى وَ قَالَوْا: «فِي مَصِرْ مَا فِي قُبُورْ وَلَّا؟ مَالَا جِبْتِنَا نُمُوتُوا فِي الصَّحَرَاء دِي؟ لِشُنُو مَرَقْتِنَا مِنْ مَصِرْ؟ ١٢ وَ فِي شَانْ دَا بَسْ، وَكِتْ أَنِحْنَ فِي مَصِرْ كَلَّمْنَاكْ وَ قُلْنَا لَيْك: ‹خَلِّينَا سَاكِتْ! نَقْعُدُوا عَبِيدْ لِلْمَصْرِيِّينْ بَسْ. دَا أَخَيْر لَيْنَا مِنْ نُمُوتُوا فِي الصَّحَرَاء!›» ١٣ وَ لَاكِنْ مُوسَى رَدَّ لَيْهُمْ وَ قَالْ: «مَا تَخَافَوْا! أَقْعُدُوا بَكَانْ وَاحِدْ وَ شِيفُوا كِكَّيْف الْيَوْم اللّٰهْ يِنَجِّيكُو! الْمَصْرِيِّينْ الْإِنْتُو قَاعِدِينْ تِشِيفُوهُمْ الْيَوْم، أَبَداً مَا تِشِيفُوهُمْ! ١٤ دَاهُو اللّٰهْ يِحَارِبْ عَدُوكُو. وَ لَاكِنْ إِنْتُو كَمَانْ، أَقْعُدُوا سَاكِتْ بَسْ.»

اللّه ثبّت قُلوب بني إسرائيل

١٥ خَلَاصْ، اللّٰهْ قَالْ لِمُوسَى: «مَالَا تِكَوْرِكْ لَيِّ بَتَّانْ؟ قُولْ لِبَنِي إِسْرَائِيلْ خَلِّي يِشِيلُوا دَرِبْهُمْ وَ يَمْشُوا! ١٦ كَنْ لَيْك إِنْتَ، أَرْفَعْ عَصَاتَكْ فَوْق وَ مِدّ إِيدَكْ عَلَيْ الْبَحَرْ وَ يِنْشَقَّ بَكَانْتَيْن. وَ فِي أُسْط الْبَحَرْ، التُّرَابْ يَبْقَى يَابِسْ وَ بَنِي إِسْرَائِيلْ يَقْطَعَوْا الْبَحَرْ رَايْغِينْ بِرِجْلَيْهُمْ فِي التُّرَابْ الْيَابِسْ دَا. ١٧ وَ فِي الْبَكَانْ دَا، أَنَا نِقَوِّي رَاسْ الْمَصْرِيِّينْ أَشَانْ يَدْخُلُوا وَرَاكُو فِي الْبَحَرْ. وَ خَلَاصْ، أَنَا نِوَصِّفْ قُدُرْتِي الْمَجِيدَةْ بِفِرْعَوْن مَلِكْ مَصِرْ وَ دَيْشَهْ وَ عَرَبَاتَهْ هَنَا الْحَرِبْ وَ سِيَادْ خَيْلَهْ. ١٨ وَ وَكِتْ نِوَصِّفْهُمْ قُدُرْتِي الْمَجِيدَةْ بِمَلِكْ مَصِرْ وَ عَرَبَاتَهْ وَ سِيَادْ خَيْلَهْ، خَلَاصْ الْمَصْرِيِّينْ يَعَرْفُوا كَدَرْ أَنَا بَسْ اللّٰهْ.»

١٩ وَ مَلَكْ اللّٰهْ الْأَوَّلْ مَاشِي قِدَّامْ فَرِيقْ بَنِي إِسْرَائِيلْ قَبَّلْ وَ قَعَدْ وَرَاهُمْ. وَ عَمُودْ السَّحَابْ الْأَوَّلْ مَاشِي قِدَّامْهُمْ كُلَ قَبَّلْ وَ قَعَدْ وَرَاهُمْ. ٢٠ وَ عَمُودْ السَّحَابْ وَقَفْ بَيْن مُعَسْكَرْ الْمَصْرِيِّينْ وَ فَرِيقْ بَنِي إِسْرَائِيلْ وَ نُصَّهْ الْعَلَيْ بَنِي إِسْرَائِيلْ قَاعِدْ يِضَوِّي وَ نُصَّهْ الْعَلَيْ الْمَصْرِيِّينْ قَاعِدْ أَضْلَمْ. وَ طُولْ اللَّيْلَةْ دِي، مَا فِي وَاحِدْ الْقَرَّبْ لِلْآخَرْ.

بني إسرائيل شقّوا البحر

٢١ وَ بَعَدْ دَا، مُوسَى مَدَّ إِيدَهْ عَلَيْ الْبَحَرْ وَ فِي الْبَكَانْ دَا، اللّٰهْ نَفَخْ رِيحْ شَدِيدَةْ جَايَةْ مِنْ صَبَاحْ. وَ فِي طُولْ اللَّيْل، الرِّيحْ قَاعِدَةْ تُسُوقْ وَ قَسَّمَتْ الْأَلْمِي بَكَانْتَيْن لَحَدِّي التُّرَابْ الْيَابِسْ بَانْ. ٢٢ وَ خَلَاصْ، بَنِي إِسْرَائِيلْ عَدَّوْا أُسْط الْبَحَرْ فِي التُّرَابْ الْيَابِسْ وَ الْأَلْمِي قَعَدْ جَايْ وَ جَايْ لَيْهُمْ مِثِلْ دُرْدُرْ بِنُصُّهُمْ الْإِسْرَايْ وَ الزَّيْنَايْ. ٢٣ الْمَصْرِيِّينْ وَ خَيْل الْمَلِكْ وَ عَرَبَاتَهْ هَنَا الْحَرِبْ وَ سِيَادْهُمْ دَخَلَوْا وَرَاءْ بَنِي إِسْرَائِيلْ أَمْبَيْنَاتْ الدَّرَادِرْ الْإِتْنَيْن هَنَا الْأَلْمِي. ٢٤ وَ بِفَجُرْ بَدْرِي مِنْ الْعَمُودْ هَنَا النَّارْ وَ سَحَابْ، اللّٰهْ شَافْ دَيْش الْمَصْرِيِّينْ وَ بَرْجَلَاهُمْ. ٢٥ وَ هُو تَلَّفْ رِجْلَيْ عَرَبَاتْهُمْ وَ مَا يَقْدَرَوْا يَمْشُوا إِلَّا بِتَعَبْ. وَ فِي الْبَكَانْ دَا، الْمَصْرِيِّينْ قَالَوْا: «يَلَّا! نَجْرُوا مِنْ بَنِي إِسْرَائِيلْ أَشَانْ اللّٰهْ قَاعِدْ يِحَارِبْ لَيْهُمْ ضِدِّنَا!»

٢٦ وَكِتْ بَنِي إِسْرَائِيلْ قَطَعَوْا الْبَحَرْ خَلَاصْ، اللّٰهْ قَالْ لِمُوسَى: «مِدّ إِيدَكْ عَلَيْ الْبَحَرْ وَ خَلِّي الْأَلْمِي يِلِمّ فِي الْمَصْرِيِّينْ وَ فِي عَرَبَاتْ الْحَرِبْ وَ فِي سِيَادْ الْخَيْل.» ٢٧ وَ وَكِتْ الْحَرَّايْ طَلَعَتْ، مُوسَى مَدَّ إِيدَهْ عَلَيْ الْبَحَرْ وَ الْأَلْمِي أَنْسَدَّ فِي بَكَانَهْ مِثِلْ أَوَّلْ. وَ وَكِتْ الْمَصْرِيِّينْ مُعَرِّدِينْ عَلَيْ خَشُمْ الْبَحَرْ، اللّٰهْ لَزَّاهُمْ فِي أُسْط الْأَلْمِي. ٢٨ وَ الْأَلْمِي قَبَّلْ فِي بَكَانَهْ وَ أَكَلْ الْعَرَبَاتْ وَ سِيَادْ الْخَيْل وَ كُلَّ دَيْش فِرْعَوْن مَلِكْ مَصِرْ الدَّخَلَوْا وَرَاءْ بَنِي إِسْرَائِيلْ فِي الْبَحَرْ. وَ نَادُمْ وَاحِدْ كُلَ مِنْهُمْ مَا فَضَّلْ! ٢٩ وَ كَنْ لِبَنِي إِسْرَائِيلْ كَمَانْ، الْبَحَرْ أَنْشَقَّ وَ بِقِي مِثِلْ دُرْدُرْ جَايْ وَ جَايْ لَيْهُمْ وَ هُمَّنْ قَطَعَوْا الْبَحَرْ فِي التُّرَابْ الْيَابِسْ.

٣٠ وَ فِي الْيَوْم دَا، اللّٰهْ نَجَّى بَنِي إِسْرَائِيلْ مِنْ الْمَصْرِيِّينْ وَ هُمَّنْ شَافَوْا جَنَازَاتْ الْمَصْرِيِّينْ مُشَتَّتِينْ فِي خَشُمْ الْبَحَرْ. ٣١ وَ وَكِتْ بَنِي إِسْرَائِيلْ شَافَوْا الْإِيدْ الشَّدِيدَةْ الْاللّٰهْ ضَرَبْ بَيْهَا الْمَصْرِيِّينْ، خَلَاصْ هُمَّنْ خَافَوْا وَ آمَنَوْا بِاللّٰهْ وَ بِعَبْدَهْ مُوسَى كُلَ.