تكوين 29

يَعْقُوب في بكان لَابَان

١ وَ خَلَاصْ، يَعْقُوبْ قَمَّ مَشَى عَلَيْ بَلَدْ الصَّبَاحْ. ٢ وَ وَكِتْ مَاشِي، لِقِي بِيرْ فِي الْخَلَاءْ. وَ فِي الْبَكَانْ دَا، فِي تَلَاتَةْ دَوْر هَنَا غَنَمْ رَاقْدِينْ جَنْب الْبِيرْ أَشَانْ دِي بَسْ الْبِيرْ الْيَزْقُوهُمْ فَوْقهَا. وَ خَشُمْ الْبِيرْ دِي مَسْدُودْ بِحَجَرْ كَبِيرْ. ٣ وَ وَكِتْ كُلَّ الْغَنَمْ يِلِمُّوا خَلَاصْ، الرُّعْيَانْ يِلِزُّوا الْحَجَرْ مِنْ خَشُمْ الْبِيرْ وَ يَزْقُوا الْغَنَمْ. وَ بَعَدْ دَا، يِقَبُّلُوا الْحَجَرْ فِي خَشُمْ الْبِيرْ.

٤ وَ يَعْقُوبْ قَالْ لِلرُّعْيَانْ: «يَا أَخْوَانِي، إِنْتُو مِنْ وَيْن؟» وَ هُمَّنْ قَالَوْا لَيَّهْ: «أَنِحْنَ مِنْ حَارَانْ.» ٥ وَ هُو قَالْ لَيْهُمْ: «تَعَرْفُوا لَابَانْ وِلَيْد وِلَيْدَهْ لِنَاحُورْ؟» وَ قَالَوْا: «أَيْوَى نَعَرْفُوهْ.» ٦ وَ هُو قَالْ: «هُو قَاعِدْ عَافَيْ وَلَّا؟» وَ رَدَّوْا لَيَّهْ وَ قَالَوْا: «عَافَيْ. وَ دِيكْ بِنْتَهْ رَاحِيلْ جَايَةْ بِالْغَنَمْ.» ٧ وَ يَعْقُوبْ قَالْ لَيْهُمْ: «الْحَرَّايْ لِسَّاعْ فَوْق، دَا مَا الْوَكِتْ التِّلِمُّوا فَوْقَهْ الْغَنَمْ. أَزْقُوهُمْ وَ أَسْرَحَوْا بَيْهُمْ.» ٨ وَ الرُّعْيَانْ قَالَوْا لَيَّهْ: «أَنِحْنَ مَا نَقْدَرَوْا نَزْقُوهُمْ إِلَّا كَنْ الْغَنَمْ كُلُّهُمْ لَمَّوْا، خَلَاصْ نِلِزُّوا الْحَجَرْ مِنْ خَشُمْ الْبِيرْ وَ نَزْقُوا الْغَنَمْ.»

٩ وَ وَكِتْ يَعْقُوبْ لِسَّاعْ قَاعِدْ يِحَجِّي مَعَاهُمْ كَيْ بَسْ، رَاحِيلْ وَصَّلَتْ بِغَنَمْ أَبُوهَا أَشَانْ هِي كُلَ رَاعِيَةْ. ١٠ وَكِتْ يَعْقُوبْ شَافْ رَاحِيلْ بِنَيَّةْ لَابَانْ أَخُو أَمَّهْ وَ غَنَمْ لَابَانْ أَخُو أَمَّهْ، طَوَّالِي مَشَى لَزَّ الْحَجَرْ مِنْ خَشُمْ الْبِيرْ وَ زَقَى غَنَمْ لَابَانْ أَخُو أَمَّهْ. ١١ وَ بَعَدَيْن، حَبَّاهَا لِرَاحِيلْ وَ قَمَّ يَبْكِي. ١٢ وَ يَعْقُوبْ أَوْرَاهَا لِرَاحِيلْ كَدَرْ هُو مِنْ أَهَلْ أَبُوهَا وَ هُو وِلَيْد رِفْقَةْ. وَ طَوَّالِي، هِي جَرَتْ خَبَّرَتْ أَبُوهَا.

١٣ وَ وَكِتْ لَابَانْ سِمِعْ بِالْخَبَرْ هَنَا يَعْقُوبْ وِلَيْد أَخْتَهْ، خَلَاصْ جَرَى لَاقَاهْ حَضَنَهْ وَ حَبَّاهْ وَ وَدَّاهْ بَيْتَهْ. وَ يَعْقُوبْ حَجَّى لِلَابَانْ بِكُلَّ شَيّءْ الْكَانْ لَيَّهْ. ١٤ وَ لَابَانْ قَالْ: «أَكِيدْ إِنْتَ دَا، وِلَيْد بِنْت أَمِّي! إِنْتَ مِنْ دَمِّي وَ لَحَمِي!»

أخيدة الأخْوات الإتْنَيْن

وَ يَعْقُوبْ قَعَدْ مَعَ لَابَانْ مُدَّةْ شَهَرْ. ١٥ وَ بَعَدْ دَا، لَابَانْ قَالْ لَيَّهْ: «أَشَانْ إِنْتَ مِنْ أَهَلِي بَسْ، تَخْدِمْ لَيِّ سَاكِتْ وَلَّا؟ أَوْرِينِي مَاحِيّتَكْ كَمْ.»

١٦ وَ لَابَانْ عِنْدَهْ بَنَاتْ إِتْنَيْن وَ الْكَبِيرَةْ أُسُمْهَا لَيْئَةْ وَ الصَّغَيْرَةْ أُسُمْهَا رَاحِيلْ. ١٧ وَ لَيْئَةْ دِي شَوْفهَا ضَعِيفْ لَاكِنْ رَاحِيلْ دَقَّهَا سَمَحْ وَ جَمِيلَةْ مَرَّةْ وَاحِدْ. ١٨ وَ يَعْقُوبْ يِرِيدْهَا لِرَاحِيلْ وَ قَمَّ قَالْ: «أَنَا نَخْدِمْ لَيْك سَبْعَةْ سَنَةْ أَشَانْ نَاخُدْ رَاحِيلْ، بِنَيِّتَكْ الصَّغَيْرَةْ.» ١٩ وَ لَابَانْ قَالْ لَيَّهْ: «نَنْطِيهَا لَيْك إِنْتَ، أَخَيْر مِنْ نَنْطِيهَا لِنَادُمْ آخَرْ. خَلَاصْ أَقْعُدْ مَعَايِ.» ٢٠ وَ بِمِثِلْ دَا، يَعْقُوبْ خَدَمْ سَبْعَةْ سَنَةْ أَشَانْ يَاخُدْ رَاحِيلْ. وَ السِّنِينْ دَوْل فَاتَوْا لَيَّهْ عَجَلَةْ كَيْ بَسْ مِنْ حُبَّهْ لَيْهَا الْكَتِيرْ.

٢١ وَ بَعَدْ دَا، يَعْقُوبْ قَالْ لِلَابَانْ: «أَنْطِينِي مَرْتِي! الْوَكِتْ تَمَّ لِنِشِيلْهَا عَرُوسْ.» ٢٢ خَلَاصْ لَابَانْ عَزَمْ كُلَّ نَاسْ الْحِلَّةْ وَ سَوَّوْا الْعَرُوسْ. ٢٣ لَاكِنْ بِاللَّيْل، لَابَانْ شَالْ بِنَيِّتَهْ لَيْئَةْ وَ وَدَّاهَا لِيَعْقُوبْ وَ هُو دَخَلْ بَيْهَا. ٢٤ وَ لَابَانْ أَنْطَاهَا لِبِنَيِّتَهْ لَيْئَةْ خَدَّامْتَهْ الْأُسُمْهَا زِلْفَةْ أَشَانْ تَخْدِمْ لَيْهَا.

٢٥ وَ بِفَجُرْ، يَعْقُوبْ شَافْ وَ عِرِفْ كَدَرْ دِي لَيْئَةْ! خَلَاصْ قَمَّ قَالْ لِلَابَانْ: «دَا شُنُو السَّوَّيْتَهْ لَيِّ دَا؟ مَا لِرَاحِيلْ بَسْ أَنَا خَدَمْت لَيْك؟ مَالَا غَشَّيْتنِي؟» ٢٦ وَ لَابَانْ قَالْ لَيَّهْ: «دَا مَا فِي عَادِتْنَا كَدَرْ نَنْطُوا الصَّغَيْرَةْ قُبَّالْ الْكَبِيرَةْ. ٢٧ وَ هَسَّعْ دَا، كَمِّلْ الْأُسْبُوعْ دَا مَعَ الْكَبِيرَةْ دِي وَ بَعَدَيْن نَنْطُوكْ الصَّغَيْرَةْ كُلَ. وَ تَخْدِمْ لَيِّ بَتَّانْ سَبْعَةْ سِنِينْ آخَرِينْ.»

٢٨ وَ يَعْقُوبْ قَصَّدْ وَ تَمَّ الْأُسْبُوعْ هَنَا الْعِرِسْ مَعَ لَيْئَةْ وَ بَعَدْ دَا، لَابَانْ أَنْطَاهْ بِنَيِّتَهْ رَاحِيلْ كُلَ، لِيِشِيلْهَا عَرُوسْ. ٢٩ وَ لَابَانْ أَنْطَاهَا لِبِنَيِّتَهْ رَاحِيلْ خَدَّامْتَهْ الْأُسُمْهَا بِلْهَةْ أَشَانْ تَخْدِمْ لَيْهَا. ٣٠ وَ يَعْقُوبْ دَخَلْ بِرَاحِيلْ كُلَ وَ لَاكِنْ هُو حَبَّاهَا لِرَاحِيلْ زِيَادَةْ مِنْ لَيْئَةْ. وَ خَدَمْ سَبْعَةْ سِنِينْ بَتَّانْ لِلَابَانْ.

عيال يَعْقُوب

٣١ وَ وَكِتْ اللّٰهْ شَافْ كَدَرْ لَيْئَةْ مَا مَرْيُودَةْ، أَنْطَاهَا عِيَالْ وَ لَاكِنْ رَاحِيلْ عَاقْرَةْ. ٣٢ وَ لَيْئَةْ بِقَتْ غَلْبَانَةْ وَ وِلْدَتْ وِلَيْد وَ سَمَّتَهْ رَأُوبِينْ (مَعَنَاتَهْ اللّٰهْ شَافْ تَعَبِي). وَ قَالَتْ: «أَكِيدْ هَسَّعْ دَا، رَاجْلِي يِرِيدْنِي.»

٣٣ وَ لَيْئَةْ غِلْبَتْ بَتَّانْ وَ وِلْدَتْ وِلَيْد وَ قَالَتْ: «اللّٰهْ سِمِعْ كَدَرْ أَنَا مَا مَرْيُودَةْ وَ أَنْطَانِي بَتَّانْ لَيَّهْ هُو دَا.» وَ بَيْدَا، سَمَّتَهْ شِمْعُونْ (مَعَنَاتَهْ هُو سِمِعْ).

٣٤ وَ بَتَّانْ بِقَتْ غَلْبَانَةْ وَ وِلْدَتْ وِلَيْد وَ قَالَتْ: «هَسَّعْ دَا خَلَاصْ، رَاجْلِي يِنْلَوِي فَوْقِي أَشَانْ جِبْت لَيَّهْ تَلَاتَةْ أَوْلَادْ.» أَشَانْ دَا بَسْ، الْوِلَيْد سَمَّوْه لَاوِي (مَعَنَاتَهْ أَنْلَوَى).

٣٥ وَ بَتَّانْ كُلَ بِقَتْ غَلْبَانَةْ وَ وِلْدَتْ وِلَيْد وَ قَالَتْ: «فِي الْمَرَّةْ دِي، نَشْكُرْ اللّٰهْ.» وَ سَمَّتَهْ يَهُوذَا (مَعَنَاتَهْ شُكُرْ). وَ بَعَدْ دَا، وَقَفَتْ مِنْ الْوَالُودَةْ.