تكوين 28

١ وَ خَلَاصْ، إِسْحَاقْ نَادَى يَعْقُوبْ وَ بَارَكَهْ وَ وَصَّاهْ وَ قَالْ لَيَّهْ: «مَا تَاخُدْ مَرَةْ مِنْ بَنَاتْ الْكَنْعَانِيِّينْ ٢ لَاكِنْ قُمّ أَمْشِي فَدَّانْ أَرَامْ بَكَانْ بَتُوِيلْ أَبُو أَمَّكْ. وَ آخُدْ مَرَةْ مِنْ هِنَاكْ، مِنْ بَنَاتْ لَابَانْ أَخُو أَمَّكْ. ٣ وَ خَلِّي اللّٰهْ الْقَادِرْ يِبَارِكَكْ وَ تَلْدَ عِيَالْ وَ يَبْقَوْا كَتِيرِينْ أَشَانْ إِنْتَ تَبْقَى جِدّ هَنَا أُمَمْ كَتِيرِينْ. ٤ وَ خَلِّي الرَّبّ يَنْطِيكْ إِنْتَ وَ ذُرِّيّتَكْ الْمَعَاكْ الْبَرَكَةْ الْأَنْطَاهَا لِإِبْرَاهِيمْ. وَ إِنْتُو تَوْرُثُوا الْبَلَدْ الْهُو أَنْطَاهَا لِإِبْرَاهِيمْ وَ إِنْتَ سَاكِنْ فَوْقهَا مِثِلْ أَجْنَبِي.»

٥ وَ خَلَاصْ، إِسْحَاقْ رَسَّلْ يَعْقُوبْ وَ هُو مَشَى فَدَّانْ أَرَامْ، بَكَانْ لَابَانْ وِلَيْد بَتُوِيلْ الْأَرَامِي. وَ لَابَانْ هُو أَخُو رِفْقَةْ أَمّ يَعْقُوبْ وَ عِيسُو.

أخيدة عِيسُو التالْتة

٦ وَ عِيسُو عِرِفْ كَدَرْ أَبُوهْ إِسْحَاقْ بَارَكْ يَعْقُوبْ وَ رَسَّلَهْ مَشَى فَدَّانْ أَرَامْ أَشَانْ يَاخُدْ مَرَةْ مِنْ هِنَاكْ. وَ عِرِفْ كَدَرْ وَكِتْ أَبُوهْ بَارَكَهْ، وَصَّاهْ وَ قَالْ لَيَّهْ: «مَا تَاخُدْ مَرَةْ مِنْ بَنَاتْ الْكَنْعَانِيِّينْ.» ٧ وَ يَعْقُوبْ سِمِعْ كَلَامْ أَمَّهْ وَ أَبُوهْ وَ قَمَّ مَشَى فَدَّانْ أَرَامْ. ٨ وَ فِي الْبَكَانْ دَا بَسْ، عِيسُو عِرِفْ كَدَرْ أَبُوهْ إِسْحَاقْ مَا يِدَوْر بَنَاتْ الْكَنْعَانِيِّينْ. ٩ وَ خَلَاصْ، هُو قَمَّ مَشَى لِإِسْمَاعِيلْ وِلَيْد إِبْرَاهِيمْ. وَ أَخَدْ بِنَيِّتَهْ مَحْلَةْ أَخُتْ نَبَيُوتْ. وَ هُو أَخَدَاهَا مِنْ فَوْق لِعَوِينَهْ الْآخَرِينْ.

يَعْقُوب رِئي

١٠ وَ يَعْقُوبْ قَمَّ مِنْ بِيرْ سَبْعَةْ وَ مَاشِي لِبَلَدْ حَارَانْ. ١١ وَ وَصَّلْ فِي بَكَانْ وَاحِدْ وَ دَوَّرْ يُنُومْ فَوْقَهْ أَشَانْ الْحَرَّايْ وَقَعَتْ. وَ شَالْ حَجَرْ أَلْوَسَّدَهْ وَ نَامْ فِي الْبَكَانْ دَا. ١٢ وَ هُو رِئِي. وَ فِي الرُّؤْيَةْ دِي هُو شَافْ طَلَّاعَةْ خَطَّوْهَا فِي الْأَرْض وَ رَاسْهَا فِي السَّمَاءْ. وَ مَلَائِكَةْ اللّٰهْ يَطْلَعَوْا وَ يَنْزُلُوا بَيْهَا. ١٣ وَ اللّٰهْ وَاقِفْ جَنْبَهْ وَ قَالْ لَيَّهْ: «أَنَا اللّٰهْ إِلٰـهْ أَبُوكْ إِبْرَاهِيمْ وَ إِلٰـهْ إِسْحَاقْ. الْأَرْض الْإِنْتَ رَاقِدْ فَوْقهَا دِي، نَنْطِيهَا لَيْك وَ لِذُرِّيّتَكْ. ١٤ وَ ذُرِّيّتَكْ تَبْقَى كَتِيرَةْ مِثِلْ تُرَابْ الْأَرْض وَ تِزِيدْ مِنْ الصَّبَاحْ لِلْغَرِبْ وَ مِنْ الْمُنْشَاقْ لِلْوَطِي. وَ كُلَّ قَبَايِلْ الْأَرْض يَلْقَوْا بَرَكَةْ بَيْك إِنْتَ وَ بِذُرِّيّتَكْ. ١٥ شِيفْ! نِأَكِّدْ لَيْك! أَنَا ذَاتِي قَاعِدْ مَعَاكْ. نَحْفَضَكْ فِي أَيِّ بَكَانْ التَّمْشِي فَوْقَهْ وَ نِقَبِّلَكْ فِي الْبَلَدْ دِي. أَنَا مَا نِخَلِّيكْ وَ لَحَدِّي نِتِمّ كُلَّ الشَّيّءْ الْقُلْتَهْ لَيْك.»

١٦ وَ يَعْقُوبْ قَمَّ مِنْ نَوْمَهْ وَ قَالْ: «أَكِيدْ! اللّٰهْ قَاعِدْ فِي الْبَكَانْ دَا وَ أَنَا مَا عِرِفْتَهْ.» ١٧ وَ خَوْف شَدِيدْ دَخَلْ لَيَّهْ وَ قَالْ: «الْبَكَانْ دَا بِخَوِّفْ! أَكِيدْ هُو دَا بَيْت الرَّبّ! وَ الْبَكَانْ دَا بَابْ السَّمَاءْ!»

١٨ وَ بِفَجُرْ بَدْرِي، يَعْقُوبْ قَمَّ شَالْ الْحَجَرْ الْهُو أَلْوَسَّدَهْ، غَزَّاهْ وَ صَبَّ فَوْقَهْ دِهِنْ أَشَانْ يَبْقَى عَلَامَةْ يِذَّكَّرْ بَيْهَا الْبَكَانْ دَا. ١٩ وَ سَمَّى الْبَكَانْ دَا بَيْت إِيلْ (مَعَنَاتَهْ بَيْت اللّٰهْ). وَ لَاكِنْ زَمَانْ، الْحِلَّةْ دِي أُسُمْهَا لُوزْ. ٢٠ وَ بَعَدْ دَا، يَعْقُوبْ سَوَّى نَذِرْ وَ قَالْ: «كَنْ الرَّبّ قَاعِدْ مَعَايِ وَ حَفَضْنِي فِي مَخَطَرِي الْأَنَا مَاشِي فَوْقَهْ وَ أَنْطَانِي أَكِلْ وَ لُبَاسْ ٢١ وَ كَنْ قَبَّلَانِي فِي بَيْت أَبُويِ بِصِحَّةْ وَ سَلَامَةْ، خَلَاصْ اللّٰهْ هُو بَسْ يَبْقَى إِلٰـهِي. ٢٢ وَ الْحَجَرْ الْغَزَّيْتَهْ لَيْك، يَا رَبِّي، يَبْقَى بَيْتَكْ. وَ نَنْطِيكْ الْعُشُرْ مِنْ كُلَّ شَيّءْ التَّنْطِينِي.»