تكوين 25

إِبْرَاهِيم و عياله الآخرين

١ إِبْرَاهِيمْ أَخَدْ مَرَةْ آخَرَةْ أُسُمْهَا قَطُورَةْ. ٢ وَ هِي جَابَتْ لَيَّهْ عِيَالْ وَ هُمَّنْ زِمْرَانْ وَ يَقْشَانْ وَ مَدَانْ وَ مِدْيَانْ وَ يَشْبَاقْ وَ شُوَحْ. ٣ وَ يَقْشَانْ وِلِدْ شَبَا وَ دَدَانْ. وَ ذُرِّيَّةْ دَدَانْ، هُمَّنْ الْأَشُورِينْ وَ اللَّطُوشِينْ وَ اللُّمِينْ. ٤ وَ عِيَالْ مِدْيَانْ، هُمَّنْ عِيفَا وَ عِفِرْ وَ حَنُوكْ وَ أَبِيدَعْ وَ أَلِدَاعَا. وَ دَوْل كُلُّهُمْ عِيَالْ قَطُورَةْ.

٥ وَ إِبْرَاهِيمْ قُبَّالْ مَا يُمُوتْ أَنْطَى كُلَّ مَالَهْ لِوِلَيْدَهْ إِسْحَاقْ. ٦ وَ لِعِيَالَهْ هَنَا الْعَوِينْ الْآخَرِينْ كَمَانْ، أَنْطَاهُمْ هَدِيَّةْ وَ سَفَّرَاهُمْ بَعِيدْ مِنْ وِلَيْدَهْ إِسْحَاقْ فِي تُرَابْ الصَّبَاحْ.

مَوْت إِبْرَاهِيم

٧ وَ إِبْرَاهِيمْ عَاشْ 175 سَنَةْ. ٨ وَ وَكِتْ شَيَّبْ وَ شِبِعْ مِنْ الدُّنْيَا، هُو مَاتْ وَ لِحِقْ أَبَّهَاتَهْ بِفَرْحَةْ وَ سَلَامْ. ٩ وَ أَوْلَادَهْ إِسْحَاقْ وَ إِسْمَاعِيلْ دَفَنَوْه فِي كَرْكُورْ الْقَاعِدْ فِي زَرَعْ عَفْرُونْ وِلَيْد صُوحَرْ الْحِتِّي الْفِي مَكْفِيلَةْ. وَ الزَّرَعْ دَا صَبَاحْ لِحِلَّةْ مَمْرَا. ١٠ وَ الزَّرَعْ دَا، إِبْرَاهِيمْ شَرَاهْ مِنْ الْحِتِّيِّينْ. وَ دَا الْبَكَانْ الدَّفَنَوْهُمْ فَوْقَهْ هُو وَ مَرْتَهْ سَارَةْ. ١١ وَ بَعَدْ مَوْت إِبْرَاهِيمْ، الرَّبّ بَارَكْ وِلَيْدَهْ إِسْحَاقْ. وَ إِسْحَاقْ سَكَنْ جَنْب الْبِيرْ الْأُسُمْهَا بِيرْ اللّٰهْ الْحَيّ الْقَاعِدْ يِشِيفْنِي.

ذُرّية إِسْمَاعِيل

١٢ دَاهُو ذُرِّيَّةْ إِسْمَاعِيلْ وِلَيْد إِبْرَاهِيمْ. أَمَّهْ هَاجَرْ الْمَصْرِيَّةْ خَادِمْ سَارَةْ. ١٣ وَ دَاهُو أَسَامَيْ أَوْلَادْ إِسْمَاعِيلْ حَسَبْ ذُرِّيِّتْهُمْ. هُمَّنْ نَبَيُوتْ الْبِكِرْ وَ قِدَارْ وَ أَدَبِيلْ وَ مِبْسَامْ ١٤ وَ مِشْمَعْ وَ دُومَا وَ مَسَّا ١٥ وَ حَدَدْ وَ تِيمَا وَ يَطُورْ وَ نَفِيشْ وَ قِدْمَا. ١٦ وَ دَوْل أَوْلَادْ إِسْمَاعِيلْ الْأَتْنَا عَشَرْ. وَ أَيِّ وَاحِدْ مِنْهُمْ بِقِي شَيْخ هَنَا خَشُمْ بَيْت وَاحِدْ وَ سَمَّوْا حِلَّالْهُمْ وَ فُرْقَانْهُمْ بِأَسَامَيْهُمْ.

١٧ وَ إِسْمَاعِيلْ عَاشْ 137 سَنَةْ وَ مَاتْ وَ لِحِقْ أَبَّهَاتَهْ. ١٨ وَ ذُرِّيَّةْ إِسْمَاعِيلْ سَكَنَتْ مِنْ بَلَدْ حَوِيلَةْ لَحَدِّي بَلَدْ شُورْ الْمُقَابِلْ بَلَدْ مَصِرْ عَلَيْ بَلَدْ أَشُورْ. وَ هُمَّنْ قَعَدَوْا ضِدّ كُلَّ أَخْوَانْهُمْ مِنْ ذُرِّيَّةْ إِبْرَاهِيمْ.

والودة عِيسُو و يَعْقُوب

١٩ دَاهُو تَارِيخْ إِسْحَاقْ وِلَيْد إِبْرَاهِيمْ. إِبْرَاهِيمْ وِلِدْ إِسْحَاقْ. ٢٠ وَ إِسْحَاقْ عِنْدَهْ 40 سَنَةْ وَكِتْ أَخَدْ رِفْقَةْ بِنَيَّةْ بَتُوِيلْ الْأَرَامِي مِنْ بَلَدْ فَدَّانْ أَرَامْ. وَ رِفْقَةْ هِي أَخُتْ لَابَانْ الْأَرَامِي.

٢١ وَ إِسْحَاقْ شَحَدْ اللّٰهْ أَشَانْ مَرْتَهْ رِفْقَةْ عَاقْرَةْ وَ اللّٰهْ قِبِلْ سُؤَالَهْ وَ هِي بِقَتْ غَلْبَانَةْ. ٢٢ لَاكِنْ الْعِيَالْ قَاعِدِينْ يِدَّاوَسَوْا فِي بَطُنْهَا وَ هِي قَالَتْ: «شُنُو الْجَانِي؟» وَ مَشَتْ سَأَلَتْ اللّٰهْ. ٢٣ وَ اللّٰهْ قَالْ لَيْهَا:

«فِي أُمَّتَيْن فِي بَطُنْكِ،

شُعُوبْ إِتْنَيْن يِنْفَرْقُوا.

وَكِتْ تَلْدَيْهُمْ،

الْوَاحِدْ يَبْقَى شَدِيدْ مِنْ الْآخَرْ

وَ الْكَبِيرْ يَخْدِمْ لِلصَّغَيَّرْ.»

٢٤ وَ وَكِتْ رِفْقَةْ وَكِتْهَا تَمَّ، هِي وِلْدَتْ وَ جَابَتْ تِيمَانْ. ٢٥ الْأَوَّلَانِي مَرَقْ وَ جِلْدَهْ كُلَّ مَكْسِي بِصُوفْ. أَشَانْ دَا، سَمَّوْه عِيسُو (مَعَنَاتَهْ أَبُو صُوفْ). ٢٦ وَ بَعَدْ دَا، التَّانِي كُلَ مَرَقْ وَ كَارِبْ كَعَبْ أَخُوهْ عِيسُو. أَشَانْ دَا، سَمَّوْه يَعْقُوبْ (مَعَنَاتَهْ كَارِبْ كَعَبْ وَلَّا النَّجِيضْ).

وَ إِسْحَاقْ عِنْدَهْ 60 سَنَةْ وَكِتْ وِلِدْ الْعِيَالْ دَوْل. ٢٧ وَ الْأَوْلَادْ كِبْرَوْا وَ عِيسُو بِقِي قَنَّاصِي نَشِيطْ وَ يَعَرِفْ الْخَلَاءْ. لَاكِنْ يَعْقُوبْ هُو نَادُمْ هَادِي وَ قَاعِدْ دَايْماً فِي الْبَيْت. ٢٨ وَ إِسْحَاقْ يِرِيدْ عِيسُو أَشَانْ هُو يِجِيبْ لَيَّهْ لَحَمْ الصَّيْد. وَ لَاكِنْ رِفْقَةْ تِرِيدْ يَعْقُوبْ.

٢٩ يَوْم وَاحِدْ، يَعْقُوبْ قَاعِدْ يِسَوِّي أَكِلْ وَ عِيسُو جَاءْ مِنْ الْقَنِيصْ جِيعَانْ مَرَّةْ وَاحِدْ. ٣٠ وَ قَالْ لِيَعْقُوبْ: «مِنْ فَضْلَكْ، أَنْطِينِي الْأَكِلْ الْأَحْمَرْ دَا نَاكُلْ أَشَانْ أَنَا جِيعَانْ.» وَ أَشَانْ دَا بَسْ، لِعِيسُو سَمَّوْه أَدَوْم (مَعَنَاتَهْ أَحْمَرْ).

٣١ وَ يَعْقُوبْ قَالْ لَيَّهْ: «كَنْ تِدَوْر الْأَكِلْ دَا، بِيعْ لَيِّ حَقّ بُكُورِيّتَكْ حَتَّى نَنْطِيكْ تَاكُلْ.» ٣٢ وَ عِيسُو قَالْ: «أَنَا مُتّْ مِنْ الْجُوعْ. نِسَوِّي شُنُو بِحَقّ الْبُكُورِيَّةْ؟» ٣٣ وَ يَعْقُوبْ قَالْ لَيَّهْ: «أَحْلِفْ لَيِّ قَبُلْ!» وَ خَلَاصْ، عِيسُو حَلَفْ وَ بَاعْ لَيَّهْ حَقّ بُكُورِيّتَهْ.

٣٤ وَ خَلَاصْ، يَعْقُوبْ أَنْطَى مُلَاحْ هَنَا عَدَسْ وَ خُبْزَةْ لِعِيسُو وَ هُو أَكَلْ وَ شِرِبْ وَ قَمَّ مَشَى. وَ بِمِثِلْ دَا، مَا لَمَّاهْ بِحَقّ الْبُكُورِيَّةْ.