تكوين 21

والودة إِسْحَاق

١ وَ اللّٰهْ فَكَّرْ لِسَارَةْ بِكَلَامْ الْقَالَهْ لَيْهَا وَ أَنْطَاهَا الشَّيّءْ الْهُو قَالَهْ. ٢ وَ الْوَكِتْ الْحَدَّدَهْ لَيْهَا الرَّبّ جَاءْ. وَ سَارَةْ بِقَتْ غَلْبَانَةْ وَ وِلْدَتْ وِلَيْد لِإِبْرَاهِيمْ وَكِتْ هُو شَيَّبْ خَلَاصْ. ٣ وَ سَمَّى الْوِلَيْد السَّارَةْ وِلْدَتَهْ لَيَّهْ دَا، إِسْحَاقْ (مَعَنَاتَهْ ضِحِكْ). ٤ وَ طَهَّرَهْ وَكِتْ هُو عِنْدَهْ تَمَانَةْ يَوْم مِثِلْ الرَّبّ أَمَرَهْ بَيَّهْ.

٥ وَ إِبْرَاهِيمْ عِنْدَهْ 100 سَنَةْ وَكِتْ سَارَةْ وِلْدَتْ لَيَّهْ إِسْحَاقْ. ٦ وَ هِي قَالَتْ: «الرَّبّ ضَحَّكَانِي وَ أَيِّ نَادُمْ السِّمِعْ الْخَبَرْ دَا يَضْحَكْ مَعَايِ.» ٧ وَ قَالَتْ بَتَّانْ: «أَوَّلْ، نَادُمْ مَا قِدِرْ يُقُولْ لِإِبْرَاهِيمْ كَدَرْ أَنَا سَارَةْ نِرَضِّعْ عِيَالْ! وَ لَاكِنْ دَاهُونِي أَنَا وِلِدْت لَيَّهْ وِلَيْد بَعَدْ هُو شَيَّبْ خَلَاصْ!»

إِبْرَاهِيم طرد هَاجَر و إِسْمَاعِيل

٨ وَ وَكِتْ إِسْحَاقْ كِبِرْ، إِبْرَاهِيمْ سَوَّى عَازُومَةْ كَبِيرَةْ فِي الْيَوْم الْفَرَدَوْه فَوْقَهْ. ٩ وَ فِي نَفْس الْيَوْم دَا، سَارَةْ شَافَتْ الْوِلَيْد الْهَاجَرْ الْمَصْرِيَّةْ وِلْدَتَهْ لِإِبْرَاهِيمْ وَ هُو قَاعِدْ يِسْتَهْبَلْ وِلَيْدهَا إِسْحَاقْ. ١٠ وَ قَالَتْ لِإِبْرَاهِيمْ: «أَطْرُدْ الْخَادِمْ مَعَ وِلَيْدهَا! أَشَانْ وِلَيْد الْخَادِمْ دِي مَا يَوْرِثْ مَعَ وِلَيْدِي إِسْحَاقْ.»

١١ وَ الْكَلَامْ دَا بِقِي قَاسِي بِلْحَيْن لِإِبْرَاهِيمْ أَشَانْ إِسْمَاعِيلْ كُلَ وِلَيْدَهْ. ١٢ وَ لَاكِنْ الرَّبّ قَالْ لِإِبْرَاهِيمْ: «خَلِّي الْكَلَامْ دَا مَا يَبْقَى لَيْك قَاسِي فِي شَانْ الْوِلَيْد وَ خَادْمَكْ. قَصِّدْ بِكُلَّ الْكَلَامْ السَّارَةْ تُقُولَهْ لَيْك أَشَانْ مِنْ إِسْحَاقْ بَسْ تَلْقَى ذُرِّيَّةْ الْبِنَادُوهَا بِأُسْمَكْ. ١٣ وَ كَنْ لِوِلَيْد هَنَا خَادْمَكْ، نِسَوِّي ذُرِّيّتَهْ تَبْقَى أُمَّةْ أَشَانْ هُو كُلَ وِلَيْدَكْ.»

١٤ وَ بِفَجُرْ بَدْرِي، إِبْرَاهِيمْ شَالْ خُبْزَةْ وَ قِرْبَةْ هَنَا أَلْمِي وَ خَطَّاهُمْ لِهَاجَرْ فِي كِتِفْهَا وَ أَنْطَاهَا الْوِلَيْد وَ طَرَدَاهَا. وَ خَلَاصْ، هِي مَشَتْ وَ وَدَّرَتْ فِي صَحَرَاءْ هَنَا بِيرْ سَبْعَةْ. ١٥ وَ بَعَدْ الْأَلْمِي هَنَا الْقِرْبَةْ كَمَّلْ، هَاجَرْ خَطَّتْ الْوِلَيْد فِي قَعَرْ شِدَيْرَةْ وَاحِدَةْ. ١٦ وَ مَشَتْ شِيَّةْ بَعِيدْ مِنَّهْ، قَعَدَتْ وَ قَابَلَتَهْ وَ قَالَتْ: «مَا نَقْدَرْ نِشِيفْ الْوِلَيْد يُمُوتْ قِدَّامِي.» وَ قَمَّتْ تَبْكِي.

١٧ وَ لَاكِنْ الرَّبّ سِمِعْ بَكِي هَنَا الْوِلَيْد. وَ مِنْ السَّمَاءْ، مَلَكْ اللّٰهْ نَادَاهَا لِهَاجَرْ وَ قَالْ لَيْهَا: «مَالْكِ، يَا هَاجَرْ؟ مَا تَخَافَيْ. الرَّبّ سِمِعْ بَكِي هَنَا الْوِلَيْد فِي الْبَكَانْ الْقَاعِدْ فَوْقَهْ. ١٨ قُمِّي شِيلِي الْوِلَيْد وَ أَكُرْبِيهْ عَدِيلْ. أَشَانْ أَنَا نِسَوِّيهْ يَبْقَى أَبُو هَنَا أُمَّةْ كَبِيرَةْ.» ١٩ وَ فِي الْبَكَانْ دَا، الرَّبّ وَصَّفْ لِهَاجَرْ بِيرْ عِنْدَهَا أَلْمِي. وَ مَشَتْ مَلَتْ الْقِرْبَةْ أَلْمِي وَ أَنْطَتْ وِلَيْدهَا شِرِبْ.

٢٠ وَ الرَّبّ كَانْ مَعَ الْوِلَيْد. وَ الْوِلَيْد كِبِرْ وَ سَكَنْ فِي الصَّحَرَاءْ وَ بِقِي سِيدْ النُّبَّالْ. ٢١ وَ سَكَنْ فِي صَحَرَاءْ هَنَا فَارَانْ وَ أَمَّهْ جَوَّزَتَهْ مَرَةْ مَصْرِيَّةْ.

المُعاهدة هنا بير سبْعة

٢٢ وَ فِي الْوَكِتْ دَا، أَبِيمَلِكْ وَ مَسْؤُولْ عَسْكَرَهْ فِكُولْ مَشَوْا لِإِبْرَاهِيمْ. وَ أَبِيمَلِكْ قَالْ لَيَّهْ: «الرَّبّ قَاعِدْ مَعَاكْ فِي كُلَّ شَيّءْ الْإِنْتَ قَاعِدْ تِسَوِّيهْ. ٢٣ فِي شَانْ دَا، أَحْلِفْ لَيِّ بِأُسُمْ الرَّبّ مَا تُغُشِّنِي أَنَا وَ عِيَالِي وَ ذُرِّيّتِي. أَشَانْ أَنَا سَوَّيْت لَيْك الْخَيْر وَ إِنْتَ كُلَ سَوِّي الْخَيْر لَيِّ أَنَا وَ لِبَلَدِي الْإِنْتَ قَاعِدْ فَوْقهَا.» ٢٤ وَ إِبْرَاهِيمْ رَدَّ لَيَّهْ وَ قَالْ: «أَيْوَى! أَنَا نَحْلِفْ.»

٢٥ وَ لَاكِنْ إِبْرَاهِيمْ شَكَى لِأَبِيمَلِكْ فِي شَانْ الْبِيرْ النَّاسْ أَبِيمَلِكْ قَلَعَوْهَا مِنَّهْ. ٢٦ وَ أَبِيمَلِكْ قَالْ: «أَنَا مَا نَعَرِفْ يَاتُو السَّوَّى الشَّيّءْ دَا. وَ إِنْتَ ذَاتَكْ مَا حَجَّيْتنِي بَيَّهْ وَ دَهَابَهْ أَنَا سِمِعْتَهْ.»

٢٧ وَ خَلَاصْ، إِبْرَاهِيمْ شَالْ بَقَرْ وَ غَنَمْ وَ أَنْطَاهُمْ لِأَبِيمَلِكْ وَ سَوَّوْا الْمُعَاهَدَةْ. ٢٨ وَ إِبْرَاهِيمْ عَزَّلْ سَبْعَةْ حُمْلَانْ وَ خَطَّاهُمْ طَرَفْ. ٢٩ وَ أَبِيمَلِكْ قَالْ: «مَالَا خَطَّيْت السَّبْعَةْ حُمْلَانْ دَوْل طَرَفْ؟» ٣٠ وَ إِبْرَاهِيمْ قَالْ لَيَّهْ: «شِيلْ السَّبْعَةْ حُمْلَانْ النَّنْطِيهُمْ لَيْك وَ كَنْ قِبِلْتُهُمْ مِنِّي، دَا يَشْهَدْ كَدَرْ الْبِيرْ دِي، أَنَا بَسْ نَكَتَّهَا.»

٣١ فِي شَانْ دَا بَسْ، الْبَكَانْ دَا سَمَّوْه بِيرْ سَبْعَةْ (مَعَنَاتَهْ بِيرْ الْحَلِيفَةْ) أَشَانْ إِبْرَاهِيمْ وَ أَبِيمَلِكْ كُلُّهُمْ حَلَفَوْا فِي الْبَكَانْ دَا. ٣٢ خَلَاصْ، سَوَّوْا مُعَاهَدَةْ فِي بِيرْ سَبْعَةْ. وَ بَعَدْ دَا، أَبِيمَلِكْ وَ فِكُولْ مَسْؤُولْ عَسْكَرَهْ قَبَّلَوْا فِي بَلَدْ الْفِلِسْطِيِّينْ. ٣٣ وَ إِبْرَاهِيمْ مَقَّنْ أَرْدَيْبَايْ فِي بِيرْ سَبْعَةْ وَ سَأَلْ بِأُسُمْ اللّٰهْ الرَّبّ الدَّايِمْ. ٣٤ وَ إِبْرَاهِيمْ سَكَنْ مُدَّةْ طَوِيلَةْ فِي بَلَدْ الْفِلِسْطِيِّينْ.