تكوين 15

اللّه سوّى مُعاهدة مع أَبْرَام

١ وَ بَعَدْ دَا، اللّٰهْ حَجَّى لِأَبْرَامْ فِي رُؤْيَةْ وَ قَالْ لَيَّهْ: «أَبْرَامْ! مَا تَخَافْ. أَنَا قَاعِدْ مَعَاكْ. أَنَا دَرَقَتَكْ. وَ نَنْطِيكْ أَجُرْ كَبِيرْ بِلْحَيْن.» ٢ وَ أَبْرَامْ قَالْ: «يَا اللّٰهْ رَبِّي، تَنْطِينِي شُنُو؟ أَنَا مَا عِنْدِي عِيَالْ وَ النَّادُمْ الْيَوْرِثْنِي هُو أَلِعَازَرْ مِنْ حِلَّةْ دِمَشْق.» ٣ وَ بَتَّانْ قَالْ: «إِنْتَ مَا أَنْطَيْتنِي ذُرِّيَّةْ وَ الْعَبِدْ الْمَوْلُودْ فِي بَيْتِي بَسْ يَوْرِثْنِي.»

٤ خَلَاصْ، اللّٰهْ قَالْ لَيَّهْ: «لَا! هُو مَا يَوْرِثَكْ. لَاكِنْ الْيَمْرُقْ مِنْ صُلْبَكْ بَسْ يَوْرِثَكْ.» ٥ وَ اللّٰهْ مَرَقَهْ بَرَّا مِنْ خَيْمِتَهْ وَ قَالْ لَيَّهْ: «صَنْقِعْ وَ شِيفْ السَّمَاءْ وَ أَحْسِبْ النُّجُومْ كَنْ تَقْدَرْ.» وَ قَالْ لَيَّهْ بَتَّانْ: «ذُرِّيّتَكْ كُلَ تَبْقَى كَتِيرَةْ مِثِلْ النُّجُومْ دَوْل.» ٦ وَ أَبْرَامْ آمَنْ بِكَلَامْ اللّٰهْ وَ فِي شَانْ إِيمَانَهْ، اللّٰهْ جَعَلَهْ نَادُمْ صَالِحْ.

٧ وَ قَالْ لَيَّهْ: «أَنَا اللّٰهْ الْمَرَقْتَكْ مِنْ أُورْ حِلَّةْ الْكَلْدَانِيِّينْ لِنَنْطِيكْ الْبَلَدْ دِي لِتَبْقَى لَيْك وَرَثَةْ.» ٨ وَ أَبْرَامْ قَالْ: «يَا اللّٰهْ رَبِّي، كِكَّيْف نَعَرِفْ كَدَرْ الْبَلَدْ دِي تَبْقَى لَيِّ وَرَثَةْ؟» ٩ وَ اللّٰهْ قَالْ لَيَّهْ: «جِيبْ لَيِّ عِجْلَةْ عُمُرْهَا تَلَاتَةْ سَنَةْ وَ غَنَمَايْ عُمُرْهَا تَلَاتَةْ سَنَةْ وَ كَبِشْ عُمْرَهْ تَلَاتَةْ سَنَةْ وَ قِمْرِيَّةْ وَ حَمَامَةْ.»

١٠ وَ أَبْرَامْ جَابْ الْحَيْوَانَاتْ دَوْل وَ شَقَّقَاهُمْ مِنْ أُسُطْ وَ أَيِّ نُصّ قَابَلَهْ مَعَ النُّصّ الْآخَرْ. وَ لَاكِنْ الطُّيُورْ، مَا شَقَّقَاهُمْ. ١١ وَ فِي الْبَكَانْ دَا، الصُّقُورَةْ طَوَّالِي نَزَلَوْا فِي الرِّمَمْ دَوْل وَ لَاكِنْ أَبْرَامْ طَرَدَاهُمْ.

١٢ وَ وَكِتْ الْحَرَّايْ قَرِيبْ تَقَعْ، أَبْرَامْ نَامْ نَوْم شَدِيدْ. وَ جَاءْ ضَلَامْ شَدِيدْ وَ مُخِيفْ غَطَّاهْ. ١٣ وَ اللّٰهْ قَالْ لِأَبْرَامْ: «أَعَرِفْ تَمَامْ كَدَرْ بَعَدَيْن ذُرِّيّتَكْ يَبْقَوْا أَجَانِبْ وَ يَسْكُنُوا فِي بَلَدْ الْمَا هِنْتُهُمْ. وَ سِيَادْ الْبَلَدْ دِي يِعَبُّدُوهُمْ وَ يِضَايُقُوهُمْ مُدَّةْ 400 سَنَةْ. ١٤ وَ لَاكِنْ أَنَا نِعَاقِبْ الْأُمَّةْ التِّعَبِّدْهُمْ لِذُرِّيّتَكْ. وَ بَعَدْ دَا، ذُرِّيّتَكْ يَمُرْقُوا مِنْ الْبَلَدْ دِي بِمَالْ كَتِيرْ. ١٥ وَ كَنْ لَيْك إِنْتَ، تِشَيِّبْ وَ تَلْحَقْ أَبَّهَاتَكْ بِسَلَامْ وَ بِفَرْحَةْ، وَ يَدْفُنُوكْ. ١٦ وَ ذُرِّيّتَكْ الرَّابْعَةْ يِقَبُّلُوا هِنِي فِي بَلَدْ الْأَمُورِيِّينْ. أَشَانْ ذَنِبْ الْأَمُورِيِّينْ لِسَّاعْ مَا لِحِقْ حَدَّهْ.»

١٧ وَ وَكِتْ الْحَرَّايْ وَقَعَتْ وَ الضَّلَامْ سَدَّ الْبَكَانْ دَا، دَاهُو كَانُونْ عِنْدَهْ جَمُرْ وَ دُخَّانْ وَ مُشْهَابْ هَنَا نَارْ فَاتَوْا أَمْبَيْنَاتْ الْبَهَايِمْ الْمُشَقَّقِينْ. ١٨ وَ بِمِثِلْ دَا، اللّٰهْ سَوَّى مُعَاهَدَةْ مَعَ أَبْرَامْ فِي الْيَوْم دَا وَ قَالْ: «أَنَا نَنْطِي الْبَلَدْ دِي لِذُرِّيّتَكْ مِنْ بَحَرْ مَصِرْ لَحَدِّي الْفُرَاتْ الْبَحَرْ الْكَبِيرْ. ١٩ وَ هَسَّعْ، الْبَلَدْ دِي سَاكْنِينْ فَوْقهَا الْقِينِيِّينْ وَ الْقِنَازِيِّينْ وَ الْقَدْمُونِيِّينْ ٢٠ وَ الْحِتِّيِّينْ وَ الْفِرِزِّيِّينْ وَ الرَّفَايِينْ ٢١ وَ الْأَمُورِيِّينْ وَ الْكَنْعَانِيِّينْ وَ الْقِرْقَاشِيِّينْ وَ الْيَبُوسِيِّينْ.»