تكوين 14

المُلوك كربوا لُوط

١-٢ وَ فِي الْوَكِتْ دَاكْ، فِيَّهْ مَجْمُوعْتَيْن هَنَا مُلُوكْ الْقَاعِدِينْ يِلْحَارَبَوْا أَمْبَيْنَاتْهُمْ. الْمَجْمُوعَةْ الْأَوَّلَانِيَّةْ، مُلُوكْهَا هُمَّنْ أَمْرَافَلْ مَلِكْ شِنْعَارْ وَ أَرْيُوكْ مَلِكْ أَلَسَارْ وَ كَدَرْلَعَوْمَرْ مَلِكْ عِلَامْ وَ تِدْعَالْ مَلِكْ قُويِمْ. وَ الْمَجْمُوعَةْ التَّانِيَةْ، مُلُوكْهَا هُمَّنْ بَارَعْ مَلِكْ سَدُومْ وَ بِرْشَعْ مَلِكْ عَمُورَةْ وَ شِنَابْ مَلِكْ أَدْمَةْ وَ شِمِيبَرْ مَلِكْ صَبُويِيمْ وَ مَلِكْ بَالَعْ الْبِنَادُوهَا صُوغَرْ. ٣ وَ الْمَجْمُوعَةْ التَّانِيَةْ لَمَّتْ رُجَالْهَا فِي وَادِي سِدِّيمْ الْبِنَادُوهْ الْيَوْم الْبَحَرْ الْمَيِّتْ. ٤ أَشَانْ مِنْ 12 سَنَةْ قَعَدَوْا تِحِتْ حُكُمْ كَدَرْلَعَوْمَرْ وَ فِي سَنِةْ 13، أَبَوْا حُكْمَهْ.

٥ وَ فِي سَنِةْ 14، كَدَرْلَعَوْمَرْ وَ الْمُلُوكْ الْمَعَايَهْ أَنَّصَرَوْا فِي الرَّفَايِينْ فِي حِلَّةْ عَشْتَرُوتْ قَرْنَايِمْ وَ فِي الزُّزِيِّينْ فِي حِلَّةْ هَامْ وَ فِي الْإِمِيِّينْ فِي سَهَلَةْ قِرْيَتَايِمْ. ٦ وَ أَنَّصَرَوْا فِي الْحُورِيِّينْ كُلَ فِي حَجَرْهُمْ الْفِي سَعِيرْ وَ طَرَدَوْهُمْ لَحَدِّي أَيْل فَارَانْ فِي حُدُودْ الصَّحَرَاءْ. ٧ وَ بَعَدْ دَا، قَبَّلَوْا فِي حِلَّةْ عَيْن مِشْفَاطْ الْبِنَادُوهَا قَادِشْ. وَ هِنَاكْ أَنَّصَرَوْا فِي الْعَمَالِقْ فِي كُلَّ بَلَدْهُمْ وَ أَنَّصَرَوْا فِي الْأَمُورِيِّينْ الْقَاعِدِينْ فِي حَصُّونْ تَامَارْ كُلَ.

٨ وَ خَلَاصْ، الْمَجْمُوعَةْ التَّانِيَةْ الْهُمَّنْ مُلُوكْ سَدُومْ وَ عَمُورَةْ وَ أَدْمَةْ وَ صَبُويِيمْ وَ بَالَعْ الْبِنَادُوهَا صُوغَرْ كُلَ، مَرَقَوْا فِي وَادِي سِدِّيمْ لِيِحَارُبُوا عُدْوَانْهُمْ. ٩ وَ عُدْوَانْهُمْ الْمَجْمُوعَةْ الْأَوَّلَانِيَّةْ، هُمَّنْ كَدَرْلَعَوْمَرْ مَلِكْ عِلَامْ وَ تِدْعَالْ مَلِكْ قُويِمْ وَ أَمْرَافَلْ مَلِكْ شِنْعَارْ وَ أَرْيُوكْ مَلِكْ أَلَسَارْ. خَمْسَةْ مُلُوكْ لَمَّوْا ضِدّ أَرْبَعَةْ مُلُوكْ.

١٠ فِي تُرَابْ سِدِّيمْ، فِيَّهْ نُقَارْ هَنَا زِفْت. وَكِتْ مَلِكْ سَدُومْ وَ مَلِكْ عَمُورَةْ عَرَّدَوْا، وَاحِدِينْ مِنْ رُجَالْهُمْ وَقَعَوْا فِي النُّقَارْ دَوْل وَ الْآخَرِينْ جَرَوْا مِنْ الدُّوَاسْ وَ أَلَّبَّدَوْا فِي الْحَجَرْ. ١١ وَ النَّاسْ الْأَنَّصَرَوْا فِي سَدُومْ وَ فِي عَمُورَةْ شَالَوْا كُلَّ الْغَنِيمَةْ وَ الْمَعَاشْ وَ فَاتَوْا بَيَّهْ. ١٢ وَ لُوطْ السَّاكِنْ فِي سَدُومْ، هُو كُلَ كَرَبَوْه وَ وَدَّوْه مَعَاهُمْ بِكُلَّ خُمَامَهْ. وَ لُوطْ وِلَيْد أَخُو أَبْرَامْ.

أَبْرَام نجّى لُوط

١٣ بَعَدْ شِيَّةْ كَيْ، نَادُمْ وَاحِدْ عَرَّدْ مِنْ الدُّوَاسْ جَاءْ خَبَّرْ أَبْرَامْ الْعِبْرَانِي السَّاكِنْ جَنْب الشَّدَرْ الْكُبَارْ هَنَا مَمْرَا الْأَمُورِي. وَ مَمْرَا الْأَمُورِي دَا، هُو أَخُو أَشْكُولْ وَ عَنِيرْ. هُمَّنْ كُلُّهُمْ عِنْدُهُمْ عَلَاقَةْ مَعَ أَبْرَامْ.

١٤ مِنْ أَبْرَامْ سِمِعْ كَدَرْ لُوطْ وِلَيْد أَخُوهْ كَرَبَوْه، قَمَّ لَمَّ كُلَّ رُجَالَهْ الْيَقْدَرَوْا يِحَارُبُوا وَ قَاعِدِينْ فِي بَيْتَهْ. وَ عَدَدْهُمْ 318 رَاجِلْ. وَ شَالْ دَرِبْ هَنَا عُدْوَانَهْ لَحَدِّي بَلَدْ دَانْ. ١٥ وَ أَبْرَامْ قَسَّمْ نَاسَهْ وَ هَجَمَوْا عُدْوَانْهُمْ بِاللَّيْل. وَ أَنَّصَرَوْا فَوْقهُمْ وَ طَرَدَوْهُمْ لَحَدِّي حِلَّةْ حُوبَةْ الْقَاعِدَةْ مُنْشَاقْ لِحِلَّةْ دِمَشْق. ١٦ وَ خَلَاصْ، أَبْرَامْ قَلَعْ مِنْهُمْ كُلَّ الْمَالْ الشَّالَوْه وَ لُوطْ وِلَيْد أَخُوهْ وَ كُلَّ مَالَهْ وَ الْعَوِينْ وَ النَّاسْ الْكَرَبَوْهُمْ فِي الْحَرِبْ.

مَلْكِصَادِق بارك أَبْرَام

١٧ وَ بَعَدْ أَبْرَامْ أَنَّصَرْ فِي كَدَرْلَعَوْمَرْ وَ الْمُلُوكْ الْمَعَايَهْ، مَلِكْ سَدُومْ مَرَقْ وَ لَاقَاهْ لِأَبْرَامْ فِي وَادِي شَوَى، مَعَنَاتَهْ وَادِي الْمَلِكْ. ١٨ وَ مَلْكِصَادِقْ مَلِكْ حِلَّةْ شَالِيمْ جَابْ لِأَبْرَامْ خُبْزَةْ وَ خَمَرْ. وَ مَلْكِصَادِقْ دَا، هُو رَاجِلْ دِينْ هَنَا اللّٰهْ الْعَالِي. ١٩ وَ بَارَكْ أَبْرَامْ وَ قَالْ:

«يَا أَبْرَامْ، خَلِّي اللّٰهْ الْعَالِي

خَالِقْ السَّمَاوَاتْ وَ الْأَرْض يِبَارِكَكْ!

٢٠ بَارَكْ اللّٰهْ الْعَالِي

النَّصَرَاكْ فِي عَدُوكْ.»

وَ خَلَاصْ، أَبْرَامْ أَنْطَاهْ الْعُشُرْ مِنْ كُلَّ شَيّءْ الشَّالَهْ فِي الْحَرِبْ.

٢١ وَ بَعَدْ دَا، مَلِكْ سَدُومْ قَالْ لِأَبْرَامْ: «أَنْطِينِي نَاسِي وَ شِيلْ كُلَّ الْمَالْ لِنَفْسَكْ.» ٢٢ وَ أَبْرَامْ رَدَّ لَيَّهْ وَ قَالْ: «نَرْفَعْ إِيدِي لِلّٰهْ إِلٰـهْ الْعَالِي خَالِقْ السَّمَاوَاتْ وَ الْأَرْض. ٢٣ وَ نَحْلِفْ أَنَا مَا نِشِيلْ شَيّءْ مِنَّكْ وَ لَا خَيْط وَ لَا سَيْر هَنَا نَعَالْ أَشَانْ بَعَدَيْن مَا تُقُولْ: ‹أَنَا سَوَّيْت أَبْرَامْ غَنِيْ.› ٢٤ أَنَا مَا نِشِيلْ شَيّءْ إِلَّا الْأَكِلْ النَّاسِي أَكَلَوْه. وَ النَّاسْ الْجَوْا مَعَايِ عَنِيرْ وَ أَشْكُولْ وَ مَمْرَا، هُمَّنْ دَوْل، خَلِّيهُمْ يِشِيلُوا حَقُّهُمْ.»