एहूना कर लिखल तीसरा चिठी
खास चेला एहूना कर लिखल तीसरा चिठी
जोहार
1
1 मंए एहुना जे कलीसीया कर अगुवा लागों, मंए ए चिट्ठी ला अपन मयारू संगता गयूस ला लिखत हों, जेकर जग मंए फुरोंच में मया करथों।2 ए मयारू संगी, मंए पराथना करत हों, कि जेकस तंए आतमिक जीवन में बढ़त जात हस, ओहीच कस तंए सबेच बात में बढ़त जा अऊ भला चंगा रह। 3 तनिक भाई मन आए के, ए गवाही देहींन कि तंए फुरोंच में परमेसवर कर सत बचन में चलत हस, त मंए एला सुईन के ढेरेच खुस होएं। 4 एकर ले बएढ़ के मोर जग अऊ कोनो आनंद कर बात नई होए सके, कि मंए एला सुनों कि मोर लईका मन सत में चलत हवें।
गयुस ला उपदेस देथे
5 ए मयारू संगता, तंए हमर भाई मन बर जे जाएत करत हस, ओमें तंए बिसवास कर लाईक ठहरे हस, खास कएर के जब ओमन तोर बर अनजान हवें। 6 ओमन कलीसिया कर आगु में तोर मया कर बारे में बताईन हवें। अगर तंए ओमन के ओही कस बिदा करबे, जेकस परमेसवर कर लोग मन बर ठीक हवे, त तंए बढ़िहां करबे। 7 काबरकि ओमन मसीह कर सेवा बर निकलीन हवें। ओमन मसीह कर ऊपरे बिसवास नई करें, तेमन जग ले कांही जाएत नई लें। 8 एकरे ले हमके ला अईसन मईनसे मन कर मदेद करेक चाही, ताकि हमू मन सत बरिक एक संगे काम कएर सकी।
दियुतत्रिफेस कलीसिया में अडंगा डालथे
9 मंए कलिसीया ला चिठी लिखे हों, बकिन दियुतत्रिफेस, जेहर ओमन में मुखिया बने बर चाहथे, ओहर मोर बात ला नई माने। 10 एकरे ले जब मंए आहूं, त ओकर काम मन कर सुरता देवाहूं, जेला ओ करत हे। ओहर हमर बदनामी करत हे। ओके एतनोच में संतोस नई होईस, त ओहर भाई मन ला अपनाबो नई करिस, अऊ जेमन भाई मन ला अपनाए बर चाहथें, ओहर ओहू मन ला मना करथे अऊ ओमन ला कलिसीया ले निकाएल देथे।
11 ए मयारू संगता, बुराई कर नहीं बकिन भलाई कर पीछा कर। जेहर भलाई करथे, ओहर परमेसवर कती ले हवे, बकिन जेहर बुराई करथे, ओहर परमेसवर ला नई जानें।
दिमेतिरीयुस बारे में बढियां गवाही
12 दिमेतिरीयुस कर बारे में सबेच झन गवाही देहींन हवें, अऊ खुद सत हर ओकर बारे में गवाही देहीस हे। हमू मन ओकर बारे में गवाही देथन, अऊ तंए जानथस कि हमर गवाही हर सही हवे।
आखरी जोहार
13 मोर जग तोके ला लिखे बर ढेरे ढेरेच अकन बात हवे, बकिन मंए सियाही अऊ कलम ले लिखे बर नई चाहत हों। 14 मोके आसा हवे कि, मंए तोर जग हालूच भेंटाहूं, तब हमरे एक संगे बईठ के गोठियाबो।
15 तोके ला सांती मिले। इहां कर संगता मन तोके जोहार कहत हें। उहां कर संगता मन ला तंए नांव ले-लेके मोर जोहार कईह देबे।