Zudi 1

Sɛbɛ ŋáà Zudi 'sɛbɛ wè

Zudi

Síɛrilɛ lè

1 Mi Zudi wè, Zezi sùkulowo wè, nɛ́ ní Zaki siinyɛni wè, mi mi nyɛ́nì sɛbɛ ŋáà tórigo wè yeli mɛ́, yeli bálì Kulocɛliɛ nyɛ́nì yeri bèle. Yeli 'weli Tuu Kulocɛliɛ dɛ́ni wè, a wiī nɛ yeli wéli Zezi Kirisi kɛnmɛ nɛ̄ bè.

2 Kulocɛliɛ wi- nyinimɛ, nɛ́ yanyige, nɛ́ dɛ́nigɛ kɛn gè yeli mɛ́ nìʔɛgɛ !

Kulocɛliɛ wi bé kàyuʔu juu gè jànvaa tɛnmɛfɔlilɔ nɛ̄ bèle

3 Nɛ siinyɛninɛ, yeli bálì ye 'mi dɛ́ni bèle, ki láa yē mi nɛ̄ kpuʔɔ bè sɛbɛ wáà tórigo yeli mɛ́ weli suɔlɔ wuʔu nɛ̄ gè, lire náà nī weli we mìɛni woli lè. Bɛ̀ sí ki yē píra ŋáà nī wè, mi 'ki nyaa mi 'yɛli bè ki sɛbɛ bè lèbaanna nyɔ́gɔ yeli nī yeli de tɛ́ngɛlɛ ni cáanra cáanri dè, tɛ́ngɛlɛ náà Kulocɛliɛ 'kɛn nɛ̀ láʔa wi wuulo mɛ́ bèle tɔligɔ nigbe péʔ. 4 Nɛ́ ki cɛ́n siɛnnɛ pálì nyɛ́nì làri nɛ̀ jíin yeli sunʔɔmɔ nī, bàli bīɛlɛ pe kàyuʔujuu wori ti yé juu nɛ̀ kúɔ faʔa faʔa gè nī dè. Kpuʔɔrɔ dáà wi kanʔa siɛnnɛ mɛ́ bèle, siɛnpiile bálì pe nɛ̂ ti líɛ majo dùʔɔ ti 'kɛnmɛ kɛn peli mɛ́ wī peri tári cúʔɔmɔ koligo nī gè. Bè ní taʔa kire nɛ̄ gè, piyē nɛ cìʔí Zezi nɛ̄ wè, wire ŋáà nigbe wī weli Kàrigɛfɔli nɛ́ ní weli wè.

5 Yeli 'ti sɔ́migɔ nɛ̀ cɛ́n nɛ̀ kúɔ dàa mi je juu dè. Nɛ̀ ki yaʔa m'bé ní yeli sɔ̀ngirɔ tìrige dè ti nɛ̄. Bà Kàfɔli wi 'wi siɛnnɛ suɔ bèle nɛ̀ yige kùlo nī lè, kire kàduʔumɛ bàli piyè tɛ́ngɛ Kulocɛliɛ nɛ̄ wèʔ, a wi 'pe cúʔɔ. 6 Ye- sɔ̀ngi ye taa nɛ́ ní bèle, bàli piyè yéri pe fànʔa yéridiɛyɛ nī yèʔ, a pe 'cíi bè kò tiʔɛ gáà nī pe 'puu kòrilo bèle. A Kulocɛliɛ 'pe puɔ nɛ́ nyùʔɔdiriye ní yè nɛ̀ yaʔa yebiliwuɔlɔ nī lè súuri bèri kpuʔɔ siri gè.

7 Ye- sɔ̀ngi ye taa nɛ́ kàʔa nɛ́ kàʔa wuʔu ní gè míɛni, nɛ́ kàaya nyáà yi 'puu yi táanni yè. Yire yē fìɛ bɛ̀ yi siɛnnɛ pe 'wuʔɔgɔ taa gè á Kulocɛliɛ 'pe nyɔ́gɔ bànguɔ nī gè súuri, pe cúʔɔmɔ fìɛrɛfun kele kɛnmɛ nɛ̄ bè gàli pe 'puu nɛ kpínʔini gèle, gàli kiyè yɛli gèleʔ, nyìʔɛnɛ tundunminɔ bálì tíɛlɛ bèle, bàli pe 'puu nɛ caa bèri sìnɛ́ nɛ́ siɛnnɛ ní, bàli pe wè peli felige gèʔ.

8 Bɛ̀ míɛni sí ki yē ki siɛnnɛ bálì bīɛlɛ yeli sunʔɔmɔ nī bè. A pe 'yakaa nyaa ŋɔ́nigɔ káà felige nī gè, pe nɛ̂ ki kpíʔile majo Kulocɛliɛ wi 'juu nɛ́ peli ní. Pe nɛ̂ pe sɔ̀ngirɔ taʔa dè kire ŋɔ́nigɔ nɛ̄ gè níɛ̀ nɛ pe céri kanɛdanʔana kpínʔini gèle gàli ke 'núʔɔ gèle, níɛ̀ Kulocɛliɛ kàfɔligɔ faʔa gè, níɛ̀ nɛ nyìʔɛnɛ fànʔafɔlilɔ teri bèle, bàli bīɛlɛ kpuɔmɔ ní bè. 9 Nɛ̀ cɛ́nì ki yaʔa, nyìʔɛnɛ tundunminɔ kàfɔli wè, wire sì cɛ́nì fɔ̀li nɛ̀ ki kpíʔileʔ. Bà wi 'puu nɛ cáanri nɛ́ Setɛni ní wè, céri tɔ́n wuʔu nɛ̄ gè bà wi yé kùu wè, Mikayɛli sì fɔ̀li nɛ̀ kàyuʔu juu gè nɛ̄ wèʔ nɛ̀ wi tiʔɛlɛʔ. A wi 'ki juu wi mɛ́ yákuɔ nɛ́ jo: «Kàfɔli wire wi bé muɔ sàri !»

10 Nɛ̀ sí ki yaʔa kire tɛnmɛfɔlilɔ bálì bèle, piyē nɛ yakaa teri gàa piyè cɛ́n gèʔ. Gàa piyē nɛ cɛ́ngi gè, kire yē bɛ̀ nyàʔayɛrɛ ti kacɛ́nnɛ tíɛlɛ, kire ki bága pe cúʔɔ. 11 Yawuʔɔ yē pe nɛ̄, nɛ́ ki cɛ́n pe nyɛ́nì taʔa koligo nɛ̄ gè. Lɔri tàanma nɛ̄ bè, a pe 'taʔa kolimɔ nɛ̄ bè. A pe 'kùu taa wè, bɛ̀ pe 'cíi Kore tíɛlɛ wè.

12 Kire siɛnnɛ bálì bèle, piyē kúrugodiɛyɛ a pe 'pɛn yeli pínɛnyɛnigɛ lìidiɛyɛ nī yè. Pe nɛ̂ pɛ́nì lìi fìɛrɛ fùn, peli yē nàʔavɔlilɔ bálì pe pìye kanʔa yaliire mɛ́ dè yákuɔ wī. Piyē bɛ̀ kàsadibarɛ tíɛlɛ dàa dī kàsaʔa fùn gè; káfaligɛ ki ti líi nɛ waa yákuɔ wī. Piyē bɛ̀ tiire tíɛlɛ dàa ti wè sɛngi dèʔ; a ki cɛ́nì nyaa ti sɛn lɛ̀lɛ nī lè, yasɛnrɛ yafiɛn nɛ̌ taa ti nīʔ. Pe 'nìre tiī kɔ́ligidɔ wī, pe 'kùu nɛ̀ taʔala tɔliyɔ siin. 13 Pe fìɛrɛ kakpiʔiligele kiyē bɛ̀ kuʔɔjii lakuruyo tíɛlɛ nyàa yi yɛ̀gí nɛ kpúɔn yè, nyàa yi kpɔ́rigɔ ŋu gè pe yiʔɛ mɛ́ gè. Piyē bɛ̀ ŋɔgɔlɔ tíɛlɛ gàli ke kɔnigi pìlige nī gè; Kulocɛliɛ nyɛ́nì tiʔɛ káà yaʔa pe mɛ́ súuri yebiliwuɔlɔ dɛ́ndɛn nī lè.

14  wè, wire ŋáà wi 'puu saʔa tùlugo nī gè siɛnnɛ kɔlisiinwuu wè, a wi 'Kulocɛliɛ siɛnrɛ juu dè peli wuʔu nɛ̄ gè nɛ́ jo: «Ki n'gɛ, Kàfɔli wi bé pɛn nɛ́ wi nyìʔɛnɛ tundunminɔ wàlidɛngɛlɛ siramuʔɔyɔ siramuʔɔyɔ ní yè, 15 kire ga buu bè kàyuʔu juu lewiile nɛ̄ bèle. Wi bé kàyuʔu juu bè ceri siɛn ó siɛn nɛ̄ wi kapiʔile wuʔu nɛ̄ gè gàli wi 'kpíʔile gèle nɛ́ cíi Kulocɛliɛ nɛ̄ wè, nɛ́ siɛncuʔɔrɔ ti mìɛni ní dàa kapiigbiʔilile bálì pe 'juu nɛ̀ wáa Kulocɛliɛ mɛ́ wè.»

16 Kire siɛnnɛ bálì bèle, piyē nɛ kúnʔɔri súuri peli tíimɛ wuʔu nɛ̄ gè. Piyē nɛ tári pe nyɛ́ni koliyo nī yè nyàa yi 'pe dɛ́ni yè. Piyē nɛ pìye nyíɛnɛ pe juugɛnmɛ nī bè, níɛ siɛnnɛ fáanni bèle bè tɔ̀ni taa.

Yeli tɛ́ngɛfɔlilɔ bèle yeri waa yiʔɛmɛ tánʔagɛnjɛ̀nmɛ nī bè

17 Nɛ siinyɛninɛ, yeli bálì ye 'mi dɛ́ni bèle, yeri sɔ̀ngí de taʔa nɛ́ dàa ní weli Zezi wi pe 'juu dè nɛ́ jo ki bé kpíʔile gè. 18 Pe 'ti juu yeli mɛ́ nɛ́ jo: «Cɛnzɛnyɛ nī yè, siɛncuʔɔrɔjuufɔlilɔ bé puu baa bàli pe bé ba taʔa pe tíimɛ kanɛdanʔana nɛ̄ gèle, gàli kiyè yɛli nɛ́ Kulocɛliɛ fíɛrɛ ní dèʔ.» 19 Peli piyē nɛ wàlimɛ nyɔ́gi bè yeli sunʔɔmɔ nī bè. Pe duniya kasɔngilɔ ke 'fànʔa taa pe céri nɛ̄ dè. ni wè pe nīʔ.

20 Nɛ siinyɛninɛ, ye- ŋɔri nyɔ́gɔ yìye nī yeli gboli nī lè, yeri waa yiʔɛmɛ yeli tiɛlɛfun tɛ́ngɛlɛ nī lè. Kulocɛliɛ Pìle ni- yeli yiʔɛ kíni yeli náariyɛ nī yè. 21 Ye- kò Kulocɛliɛ dɛ́nigɛ nī gè, bà yeli nɛ ki siri weli Kàfɔli Zezi Kirisi wi- bànguɔ sìi kɛn wè yeli mɛ́ wi nyinimɛ kɛnmɛ nɛ̄ bè.

22 Yeri nyinimɛ taʔa bàli nɛ̄ pe káala nɛ tíin pe funyɔ nī yè pe tɛ́ngɛlɛ wuʔu nɛ̄ gè. 23 Ye- pàli píle ye suɔ kàsun mɛ́ gè. Ye- nyinimɛ taa pàli nɛ̄ nɛ́ fíɛrɛ ní. Ye- cɛri yìye ciʔige pe burudo nɛ̄ dè dàa ti 'núʔɔ pe céri kapiʔile kɛnmɛ nɛ̄ bè, tire dáà ti bé gbɛ̀ yeli núʔɔ dè.

Gbùʔɔrilɔ lè

24  ti 'yɛli Kulocɛliɛ nɛ̄, wire ŋáà mɛ́ fànʔa ki yē gè bè yeli cò yérige wè yeli fǎga tuuʔ wè, bè ki yaʔa yeli sa yéri wi kpuɔmɔ yiʔɛ mɛ́ gè, tiɛlɛ fùn nɛ́ fundaangbuɔrɔ ní. 25 Kpuʔɔrɔ ti 'yɛli Kulocɛliɛ nigbe nɛ̄, wire ŋáà wi 'weli suɔ weli Kàfɔli Zezi kɛnmɛ nɛ̄ bè. Kpuɔmɔ nɛ́ kpuʔɔrɔ, nɛ́ fànʔa nɛ́ kàfɔligɔ tire yé puu wi mɛ́ náʔanɛ duniya wi- faan wè, nɛ́ lɛ̀lɛ náà nī lè, nɛ́ lɛ̀lɛ ó lɛ̀lɛ nī láʔala fùn.  !