Sɛbɛ taanriwuu ŋáà Zan 'sɛbɛ wè
Zan taanriwuu
Síɛrilɛ lè
1
1 Mi ŋáà wī Liɛwɛ wè,
mi nɛ sɛbɛ ŋáà tórigi wè muɔ mɛ́,
mi nàgoricɛnwɛ Gayusi,
muɔ ŋáà ma 'mi dɛ́ni kányiʔɛ nɛ̄ gè.
2 Mi nàgoricɛnwɛ,
mi nɛ ki caa muɔ kele keri nyuʔɔ,
dí muɔ sí puu cériwiimɛ nɛ̄ majo kɛnmɛ bíì nɛ̄ muɔ fungo ki yē gè.
3 Mi nyɛ́nì fundaangbuɔrɔ kpíʔile bà siinyɛninɛ pe 'pɛn náʔa weli mɛ́ wè nɛ́ pɛ́nì muɔ wori juu dè mi mɛ́ wè,
nɛ́ jo kɛnmɛ bíì nɛ̄ muɔ yē puɔwɔ kányiʔɛ nɛ̄ gè,
kire 'jo muɔ yē nɛ tári kányiʔɛ koligo nī gè.
4 Yakaa ní wè fundaanra kanʔa m'mɛ́ nɛ̀ tóriʔ bè ki lúʔu dí mi pìile piyē nɛ tári kányiʔɛ koligo nī gè.
Siinyɛninɛ pálì sáʔala wori dè
5 Mi nàgoricɛnwɛ,
muɔ yē nɛ tári nɛ kacɛ̀ngɛ sɔ́migi nɛ kpínʔini weli siinyɛninɛ mɛ́ bèle,
nɛ̀ sí ki taa piyē nabɔnminɔ.
6 Pe pɛ́nì muɔ wori juu dè tɛ́ngɛfɔlilɔ gboli mɛ́ lè nàa nī náʔa gè kɛnmɛ bíì nɛ̄ muɔ 'dɛ́nigɛ tìɛ gè peli nɛ̄ wè.
Kire nɛ̄ mari waa yiʔɛmɛ mari kacɛ̀ngɛ kpínʔini gè bè pe sáʔa kɛnmɛ páà nɛ̄ bàa pi 'Kulocɛliɛ dɛ́ni wè,
peri waa pe tánʔana nī lè.
7 Ki 'nyaa piyē tánʔana nɛ̄ lè bè Kirisi míʔɛ jáari gè,
kire nɛ̄ piyè fɔ̀li nɛ̀ yakaa suɔ sìndɛngɛlɛ mɛ́ bèleʔ.
8 Weli bèle,
weli 'yɛli bè fɔ̀li bè kire siɛnnɛ bálì tìrige bèle,
kire ga buu weli- puu pe baakuɔnyɛninɛ bèri kányiʔɛ siɛnrɛ jáari dè.
Diyotirɛfu nɛ́ Demɛturusi kaala lè
9 Mi yé sɛbɛ wáà tórigo wè tɛ́ngɛfɔlilɔ gboli mɛ́ lè,
nɛ̀ ki yaʔa Diyotirɛfu wè,
wire ŋáà ki 'wi dɛ́ni bè puu siɛnnɛ pe mìɛni yiʔɛmɛ gè,
a wire 'cíi weli siɛnrɛ nɛ̄ dè dàa weli 'juu dè.
10 Kire kɛnmɛ nɛ̄,
a mi kɛ́nì kɛ́ yeli mɛ́ wè,
m'bé wi kapiʔile wori juu dè gàli wi 'kpíʔile gèle,
wire ŋáà wiī nɛ siɛnpiire nyu dè weli wuʔu nɛ̄ gè.
Nɛ̀ ki yaʔa,
kire yákuɔ sí bɛ̀ʔ !
Wi nɛ̂ cíi bè siinyɛninɛ nabɔnminɔ tìrige bèle.
Bàli sí bīɛlɛ piyē nɛ caa bè pe tìrige bèle,
wi nɛ̂ cíi níɛ̀ pe cìra nɛ̀ yige tɛ́ngɛfɔlilɔ gboli nī lè.
11 Mi nàgoricɛnwɛ,
fǎga de kapiʔi tɛnmɛ gèʔ,
te kacɛ̀ngɛ kire tɛnmɛ.
Siɛn ŋáà wi kacɛ̀ngɛ kpínʔini gè,
wire yē Kulocɛliɛ wuu.
Ŋìi sí wiī nɛ kapiʔi kpínʔini gè,
wire sì Kulocɛliɛ cɛ́n wè wīʔa.
12 Gàa sí ki 'Demɛturusi kúɔ wè,
siɛnnɛ pe mìɛni yē nɛ wire míɛtanʔa yeri gè;
wi tánʔagɛnmɛ pi 'nyuɔ súuri nɛ̀ yɛli nɛ́ kányiʔɛ ní gè.
Weli míɛni nɛ wi míɛtanʔa yeri gè;
muɔ nyɛ́nì ki cɛ́n weli siɛnjuuro tiī kányiʔɛ.
Siɛnsɛnrɛ dè
13 Siɛnniʔɛrɛ yē m'mɛ́ bè sɛbɛ,
nɛ̀ ki yaʔa mi wè nɛ caa bè ki sɛbɛ nɛ́ gòsiige nɛ́ tùnmu luʔɔb níʔ.
14 Mi sɔ̀ngirɔ yē ki nɛ̄ náʔanɛ lɛ̀lɛ láà cɛ̀ri ní we bé wìye nyaa,
bà we bé juu nyuɔ nɛ́ nyuɔ.
15 Yanyige ki- puu nɛ́ muɔ ní !
Muɔ nàgorilo piyē nɛ muɔ síɛri.
Ma weli nàgorilo pe mìɛni nigbe nigbe síɛri baa.