Sɛbɛ siinwuu ŋáà Zan 'sɛbɛ wè
Zan siinwuu
Síɛrilɛ lè
1
1 Mi ŋáà wī Liɛwɛ wè,
mi 'sɛbɛ ŋáà tórigo wè muɔ mɛ́,
cɛliwɛ,
muɔ ŋáà Kulocɛliɛ 'nyíɛnɛ nɛ̀ kɔ̀n wè,
nɛ́ muɔ pìile ní bèlea,
yeli bálì ye 'mi dɛ́ni bèle kányiʔɛ nī gè.
Mi yákuɔ bɛ̀ʔ,
nɛ́ ki cɛ́n bàli pe mìɛni pe 'kányiʔɛ cɛ́n gè,
yeli 'pe dɛ́ni míɛni.
2 Yeli 'weli dɛ́ni kányiʔɛ kire kɛnmɛ nɛ̄,
kányiʔɛ gáà gī weli nī gè,
nɛ́ ki bé puu nɛ́ weli ní súuri gè.
3 Tuufɔli Kulocɛliɛ nɛ́ wi Jaa Zezi Kirisi wè,
pe bé kpuʔɔrɔ nɛ́ nyinimɛ nɛ́ yanyige kɛn gè weli mɛ́,
kire ga buu weri tári kányiʔɛ nɛ̄ nɛ́ dɛ́nigɛ ní gè.
Kajuudiɛlɛ lè wìyedɛnigɛ woli lè
4 Ki yé buu fundaangbuɔrɔ mi mɛ́ bè ki 'nyaa muɔ pìile pálì yē baa nɛ tári kányiʔɛ nī gè,
majo bɛ̀ Tuufɔli wi 'ki juu nɛ̀ gbɛ̀ngɛ weli mɛ́ gè.
5 Píra ŋáà nī wè,
mi nàgori cɛliwɛ,
kajuudiɛlɛ fɔnnɔ bɛ̀ʔ mi nɛ nyu muɔ mɛ́ʔ,
nɛ̀ ki yaʔa kajuudiɛlɛ láà nī nàa weli 'kíni nɛ̀ taa ki sélimɛ nɛ̄ bè.
Mi nɛ yeli náari wī,
ye mìɛni nigbe nigbe ye- yìye dɛ́nib.
6 Ki n'gɛ gàa gī dɛ́nigɛ gè:
weli nɛ tári nɛ̀ yɛli nɛ́ Kulocɛliɛ kajuudiʔɛlɛ ní gèle.
Kajuudiɛlɛ náà ni 'jo weri tári dɛ́nigɛ koligo nī gè,
yeli yé kíni nɛ̀ ni lúʔu ki sélimɛ nɛ̄ bèc.
Ye- kò puɔlɔ kányiʔɛ nɛ̄ gè
7 Mi 'tire juu wī nɛ́ ki cɛ́n káfinɛvinɛnɛ sáamɛ nyɛ́nì cɛrigɛ nɛ̀ màʔa duniya nī wè,
bàli bīɛlɛ pe 'cíi,
piyè yéri ki nɛ̄ nɛ̀ jo Zezi Kirisi wi nyɛ́nì pɛn siɛn céri nī dèʔ.
A siɛn ó siɛn 'nyaa pe tíɛlɛ wè,
kire siɛn wi yē káfinɛvinɛwɛ wī nɛ́ ní Kirisi leguuwod.
8 Yeri yìye ciʔige díɛʔ yeli tíimɛ bèle,
kire ga buu yeli fǎga sa fɔ̀n weli baara ti yasɛnrɛ nī dèʔ.
Nɛ́ ki cɛ́n weli nɛ ki caa yeli sa tɔ̀ni foriwo taa.
9 Bàli pe mìɛni bīɛlɛ piyè kò puɔlɔ Kirisi tɛnmɛnɛ nī lèʔ,
níɛ pe woli fàrí lè baa wè,
pe wè pínɛnyɛnigɛ nɛ̄ nɛ́ Kulocɛliɛ ní wèʔ.
Ŋàa wi sí kò puɔwɔ tɛnmɛnɛ nɛ̄ lè,
wire yē pínɛnyɛnigɛ nɛ̄ nɛ́ Tuufɔli nɛ́ Jaafɔli ní wèe.
10 A siɛn wáà sí pɛn yeli mɛ́ wè nɛ́ sɛ́ni tɛnmɛnɛ láà niiyɛ kanʔa wè,
ye fǎga wi tìrige yeli saaya nī yèʔ,
ye fǎga cɛ wi síɛriʔ.
11 Nɛ́ ki cɛ́n a yeli nɛ wi síɛri wè,
yeli nɛ liɛlɛ líi wi kakpiʔiligele nī gèle gàli ke 'pii gèle.
Siɛnsɛnrɛ dè
12 Siɛnniʔɛrɛ nɛ tíin mi mɛ́ bè juu yeli mɛ́,
nɛ̀ ki yaʔa mi sí wè caa bè ki sɛbɛ kaliwɛgɛ nɛ̄ gè nɛ́ tùnmu luʔɔf níʔ.
Mi nɛ caa bàga kɛ́ baa yeli mɛ́ bè sa juu nɛ́ yeli ní nyuɔ nɛ́ nyuɔ,
kire ga buu weli fundaanra ti sí fori.
13 Muɔ siinyɛjuɔ ŋáà Kulocɛliɛ 'nyíɛnɛ nɛ̀ kɔ̀n wè,
wi pìile piyē nɛ muɔ síɛri.