Filɛmɔ 1

Sɛbɛ ŋáà Pɔli 'tórigo Filɛmɔ mɛ́ wè

Filɛmɔ

Síɛrilɛ lè

1 Mi wè, kasuulewe wè Zezi baara kɛnmɛ nɛ̄ bè, nɛ́ Timote weli siinyɛni wè, weli nɛ sɛbɛ ŋáà tórigi wè muɔ mɛ́, Filɛmɔ, muɔ ŋáà wī weli baakuɔnyɛni wè nɛ́ weli dɛ́ni wè. 2 Sɛbɛ ŋáà míɛni wiī weli siinyɛjuɔ Apia wuu, nɛ́ sí yē míɛni Arisipi wuu, wire ŋáà wi cáanjɛ̀nrɛ cáanri dè nɛ́ weli ní wè. Sɛbɛ ŋáà míɛni wiī wuu, nàa nī baa muɔ saʔa nī gè. 3 Weli Tuu Kulocɛliɛ wè, nɛ́ Zezi Kirisi ní wè, pe- nɛ́ yanyige kɛn gè yeli mɛ́.

Filɛmɔ wi dɛ́nigɛ gè nɛ́ wi tɛ́ngɛlɛ ní lè

4 Mi nɛ Kulocɛliɛ síɛri wè muɔ wuʔu nɛ̄ gè lɛ̀lɛ ó lɛ̀lɛ nī a mi nɛ náari muɔ mɛ́ wè. 5 Nɛ́ ki cɛ́n mi nɛ muɔ tɛ́ngɛlɛ wuʔu lúru gè nàa nī muɔ mɛ́ Zezi nī wè, nɛ́ muɔ dɛ́nigɛ ní gè gàa gī muɔ mɛ́ Kulocɛliɛ wuulo pe mìɛni kɔli mɛ́ gè. 6 Mi nɛ Kulocɛliɛ náari wè nɛ́ jo, weli pínɛnyɛnigɛ gáà gī weli mɛ́ tɛ́ngɛlɛ nī lè ki- baara muɔ fungo nī gè kire ga buu muɔ- kacɛ̀ngɛlɛ ke mìɛni cɛ́n gàli weli 'taa bɛ̀ weli yē pínɛnɛ nɛ́ Zezi ní wè. 7 Mi siinyɛni, muɔ dɛ́nigɛ ki nyɛ́nì fundaangbuɔrɔ nɛ́ lèbaanna nyɔ́gɔ mi fungo nī gè, nɛ́ ki cɛ́n muɔ nyɛ́nì Kulocɛliɛ wuulo funyɔ gbiʔɛlɛ yè.

Pɔli 'kàsulugo kpíʔile Wonɛzimu wuʔu nɛ̄ gè

8 Kire nɛ̄, bɛ̀ weli yē pínɛnyɛnigɛ nɛ̄ nɛ́ Kirisi nī wè, mi bé gbɛ̀ jáa bè juu nɛ́ muɔ ní bè muɔ yɛ gàa muɔ 'yɛli bè kpíʔile gè, 9 nɛ̀ ki yaʔa ki 'pɔ́ri mi mɛ́ bè muɔ fiɛn wìyedɛnigɛ kɛnmɛ nɛ̄ bè. ʔaan, mi wè, nàgaliɛwɛ wè, nɛ́ ní píra ŋáà nī wè kasuu nī wè Zezi kɛnmɛ nɛ̄ bè, 10 mi nɛ muɔ fiɛn wī mi jaa Wonɛzimu wuʔu nɛ̄ gè. Mi 'kò wi tuu náʔa kasuu nī wè. 11 Faʔa gè, wiì 'puu nɛ yakaa nyuʔɔ muɔ nɛ̄ʔ, nɛ̀ sí ki yaʔa píra ŋáà nī wè, wi bé gbɛ̀ jáa bè baara bè kaala nyuɔ muɔ nɛ̄ nɛ́ mi ní.

12 Mi bé ní koli wi tórigo muɔ mɛ́, majo mi tíimɛ fungo mi bé tórigo muɔ mɛ́. 13 Ki cî mi dɛ́ni bè wi yaʔa náʔa nɛ́ mi ní, wi de baara mi mɛ́ muɔ sìndiʔɛ nī, bɛ̀ mi yē kasuu nī wè kɛnmɛ nɛ̄ bè. 14 Nɛ̀ sí ki yaʔa, kiì mi dɛ́niʔ bè yakaa kpíʔile gàa kiì yɛli muɔ mɛ́ gèʔ, kire ga buu muɔ fǎga ki 'nyaa ŋàʔanigɛ kaala bè kacɛ̀ngɛ kpíʔile mi mɛ́ʔ. Ki 'yɛli bè kɔ́n muɔ fungo nī. 15 Dùʔɔ ki bé sí gbɛ̀ nyaa wi yé líili muɔ nɛ̄ bè lɛ̀lɛ láà cɛ̀ri kúɔ wī, dí muɔ sí koli wi taa wi- puu muɔ wuu súuri, 16 wi fǎga ní puu muɔ mɛ́ sùkulowoʔ; wi 'pɔ́ri nɛ̀ tóri sùkulowo nɛ̄, wi- puu muɔ mɛ́ siinyɛni ŋáà wi 'muɔ dɛ́ni wè. Wi 'tɔ̀ni yē mi mɛ́ siinyɛni kpuɔwɔ, nɛ̀ sí ki yaʔa wi bé ní puu muɔ mɛ́ siinyɛni kpuɔwɔ bè tóri mi nɛ̄, céri kɔli mɛ́ gè nɛ́ bɛ̀ ki 'nyaa wi 'tɛ́ngɛ nɛ̄ wè.

17 A ki yē muɔ nɛ tɔ́ri nɛ́ mi ní bɛ̀ muɔ baakuɔnyɛni tíɛlɛ wè, ma wi kpàli majo mi tíimɛ wī. 18 A ki sí nyaa wi 'yakaa kpíʔile muɔ nɛ̄ wè, á kire bɛ̀ʔ a muɔ fuʔɔ yē wi nɛ̄ wè, ma ki tɛ́ngɛ mi wuʔu. 19 Mi tíimɛ kɔli ní mi nyɛ́nì nyasiɛnkɛniyɛ nyáà sɛbɛ yè: mi Pɔli wè, mi bé ki tɔ́n muɔ mɛ́. Nyùgo ní cɛ wè ki nɛ̄ʔ mi- muɔ sɔ̀ngirɔ tìrige dè bé jo muɔ tíimɛ sìi wiī fuʔɔ mi kɔli mɛ́ gèʔ. 20 ʔaan, mi siinyɛni, mi nɛ muɔ fiɛn wī, ma dáà kɛn dè m'mɛ́ Kàfɔli kɛnmɛ nɛ̄ bè, ma mi fungo nyígi gè bɛ̀ weli yē pínɛnyɛnigɛ nɛ̄ nɛ́ Kirisi ní wè.

21 Bɛ̀ mi 'tɛ́ngɛ ki nɛ̄ muɔ bé lúʔu mi mɛ́ wè, mi 'sɛbɛ ŋáà tórigo wè muɔ mɛ́. Mi 'ki cɛ́n muɔ bé ki kpíʔile fúɔ bè tóri gàa mi 'náari muɔ mɛ́ gè. 22 Lɛ̀nunɔ náà nī lè, mari saasinɛgɛ káà gbòborí m'mɛ́, nɛ́ ki cɛ́n mi sɔ̀ngirɔ yē ki nɛ̄ ki 'kò cɛ̀, Kulocɛliɛ bé ki yaʔa mi- koli bɛn yeli kúrugu, yeli náariyɛ kɛnmɛ nɛ̄ bè.

Síɛrilɛ sɛnnɛ lè

23 Epafirasi yē náʔa nɛ́ mi ní kasuu nī wè, Zezi Kirisi baara kɛnmɛ nɛ̄ bè. Wiī nɛ muɔ síɛri baa, 24 nɛ́ siɛnnɛ bálì ní bèle, mi baakuɔnyɛninɛ bèle, pe mìɛni nɛ muɔ síɛri míɛni: Mariki wè, nɛ́ Arisitariki ní, nɛ́ Demasi ní wè, nɛ́ Luku ní wè.

25 Kàfɔli Zezi wi ti- puu yeli nɛ̄.