Tiiti 1

Sɛbɛ ŋáà Pɔli 'tórigo Tiiti mɛ́ wè

Tiiti

Síɛrilɛ lè

1 Sɛbɛ ŋáà wi 'kɔ́n mi mɛ́, mi ŋáà wī Kulocɛliɛ sùkulowo wè nɛ́ ní Zezi Kirisi tundunwɔ wè. Kulocɛliɛ wi 'mi tun mi de wi siɛnnyiɛnɛgɔnminɔ sári bèle peri waa yiʔɛmɛ tɛ́ngɛlɛ nī lè pe- kányiʔɛ cɛ́n gè. Kire kányiʔɛ kire ki 'ki yaʔa pe pe sìi tári wè bè puu puɔlɔ Kulocɛliɛ nɛ̄ wè. 2 Kire bé ki yaʔa pe sɔ̀ngirɔ taʔadiʔɛ taa, bànguɔ sìi wuʔu nɛ̄ gè. Kulocɛliɛ wi wè nɛ finɛnɛʔ; wi yé nyuɔ fɛ̀ni weli mɛ́ kire sìi wi wori nɛ̄ dè nɛ̀ ki yaʔa duniya wiì cé fìɛ faanʔ. 3 Nɛ̀ yɛli nɛ́ lɛ̀lɛ náà ní wire tíimɛ yé tɛ́ngɛ lè, a Kulocɛliɛ wi 'ki kpíʔile a wire siɛnrɛ ti 'cɛ́n tunduro tire kɛnmɛ nɛ̄, dàa wi 'kɛn mi mɛ́ dè, dàa Kulocɛliɛ weli Suɔfɔli wi 'juu nɛ̀ gbɛ̀ngɛ mi mɛ́ nɛ́ jo mi de ti jáari dè.

4 Mi 'sɛbɛ ŋáà tórigo wè muɔ mɛ́, Tiiti, muɔ ŋáà wī mi jaa kányiʔɛ wuu wè, bɛ̀ weli siin we 'wúɔ tɛ́ngɛlɛ nī lè. nɛ́ yanyige- puu muɔ nɛ̄, Tuufɔli Kulocɛliɛ nɛ́ Zezi weli Suɔfɔli wè, peli kɛnmɛ nɛ̄ bè !

Tiiti baara dè tɛ́ngɛfɔlilɔ gbuʔulo nī gèle Kirɛti kùlo nī lè

5 Kaala náà kɛnmɛ nɛ̄ mi 'muɔ yaʔa Kirɛti tɛ́nimɛ nī bè, kire yē muɔ- baara sɛnrɛ kúɔ dè baa. Má sí tɛ́ngɛ bèle nī gèle kàʔa ó kàʔa nī majo bɛ̀ mi 'ki juu muɔ mɛ́ gè. 6 Liɛwɛ ó liɛwɛ 'yɛli wi- puu dìgire fùn, wi sí puu cɛliwɛ nigbefɔli, dí wi pìile pe sí puu tɛ́ngɛfɔlilɔ, kolimɔ fǎga puu pe nɛ̄ʔ, bé nɛ́ cɛ ga jo cíimɛʔ.

7 Nɛ́ ki cɛ́n tɛ́ngɛfɔlilɔ gboli ni yiɛginiwɛ wè, wiī Kulocɛliɛ siɛnnɛ kàrigɛfɔli. Kire nɛ̄ wi sìi wi 'yɛli wi- puu dìgire fùn. Wiì yɛli wi de wìi nyíɛnɛʔ, kire ga laa bè puu funyɛrigɛfɔliʔ. Wiì yɛli bè puu sungbuɔwɔʔ, á kire bɛ̀ʔ kàsiitunwɔʔ. Wiì yɛli bè puu ŋàa wi wali nùʔɔrɔ́ nɛ caa wèʔ.

8 Gìi sí ki 'yɛli gè, wi- puu nabɔndirigiwe, dí kacɛ̀ngbiʔilige ki- wi dɛ́ni. Wi 'yɛli bèri wìi ciʔige, bé sí puu siɛnsinwɛ bè puu wàlidɛngɛwɛ Kulocɛliɛ mɛ́ wè, bé wìi cògɛnmɛ cɛ́n. 9 Wi 'yɛli bè kányiʔɛ siɛnrɛ cò dè kpuʔɔ dàa ti 'yɛli nɛ́ dìi ní pe 'wi tɛnmɛ dè. Bɛ̀ wi bé gbɛ̀ jáa bèri lèbaanna nyɔ́gi bìli nī bèle nɛ̀ yɛli nɛ́ kányiʔɛ tɛnmɛnɛ ní lè, bé sí siɛnnɛ pùunnidiɛyɛ tìɛ yè pe nɛ̄, bàli piyē nɛ kàkiɛrɛ kpínʔini kire tɛnmɛnɛ nɛ̄ lè.

10 Nɛ́ ki cɛ́n pe nìʔɛnɛ yē baa bàli bīɛlɛ pe 'cíi kányiʔɛ siɛnrɛ nɛ̄ dè, níɛ nyùgofun siɛnniʔɛrɛ nyu dè nɛ siɛnnɛ fáanni bèle. Peli cɛ́nì niʔɛ Zuufulo tɛ́ngɛfɔlilɔ sunʔɔmɔ nī bè. 11 Ma pe nyuɔyɔ tɔ́n yè, nɛ́ ki cɛ́n piyē nɛ nariyɛ sáamɛ nyaʔami bɛ̀ pe tɛnmɛnɛ kanʔa lè nàa niì yɛli lèʔ. Piyē nɛ kire kpínʔini nɛ wali nùʔɔrɔ́ wè nɛ caa. 12 Kirɛti wuu wáà, pe kanyaajuuwo wáà wī, wi cɛ́nì ki juu nɛ́ jo:

Kirɛti siɛnnɛ pe mìɛni yē káfinɛvinɛnɛ súuri,

nɛ́ ní nyàʔayawiipiire tíɛlɛ,

nɛ́ ní sàliyɛfɔlilɔ bálì pe sɔ̀ngí bèri líi yákuɔ wè.

13 Gàa sí wi 'juu nɛ̀ ceri gè, kiī kányiʔɛ. Kire nɛ̄ ma ti juu ma gbɛ̀ngɛ pe nɛ̄, kire ga buu pe tɛ́ngɛlɛ ni- puu cìilile, 14 pe fǎga pìye kɛn bèri Zuufulo pe múʔurudo siɛnrɛ lúru dèʔ, pe fǎga pìye kɛn bèri siɛnnɛ pe fànʔa kajuʔulo wori lúru dèʔ, bàli pe 'kàduʔu wáa kányiʔɛ mɛ́ gèʔ.

15 Bàli funyɔ yi 'cìile yè, peli mɛ́ bèle, yɛrɛ ti mìɛni yē cìilide. Nɛ̀ ki yaʔa bìli pe 'núʔɔ bèle, nɛ́ cíi, piyè tɛ́ngɛ wèʔ, peli mɛ́ bèle, yɛrɛ ti mìɛni yē núʔɔrɔ. Gìi sí gī baa gè, pe sìnjilige nɛ́ pe funyɔ yiī núʔɔyɔ. 16 Pe 'jo peli nyɛ́nì Kulocɛliɛ cɛ́n, nɛ̀ ki yaʔa pe kakpiʔiligele gèle kiyē nɛ ki tìí pe 'cíi wi nɛ̄ʔ. Piyē laabiri wuulo, nɛ́ ní siɛnciile; piyě gbɛ̀ jáa bè kacɛ̀nnɛ láà fáala kpíʔileʔ.