5
1 Nɛ siinyɛninɛ,
gìi sí kire lɛ̀lɛ ni kɛnmɛ kúɔ bè nɛ́ sunʔɔmɔ bíì nī ki kele ke bága kpíʔile gèle,
kire wuʔu ki wè gbɛ̀ligɛ yeli mɛ́ʔ we- yakaa juu ki wori nɛ̄ dèʔ.
2 Nɛ̀ taʔa gíi nɛ̄,
yeli tíimɛ nyɛ́nì ki sɔ́migɔ nɛ̀ cɛ́n cɛ̀ngɛ,
nɛ̀ ki cɛ́n Kàfɔli wi cɛngɛ ki bága puu majo bɛ̀ kàyuuwo sî kɛ́nì fuu nɛ̀ pɛn pìlige nī gèa.
3 A siɛnnɛ pe kɛ́ni ki nyu lɛ̀lɛ níì nī nɛ́ jo:
«Wiyē yanyige nɛ̄,
fíɛrɛ wè baaʔ !»,
kire lɛ̀lɛ nī lè,
cúʔɔgbuɔmɔ páà bé fuu bè pe taa majo bɛ̀ cesiiwe liyɛyaara ti sî puu wè,
bè pe cúʔɔ bè láʔa;
piyè sí je jáa bè fɛ̀ bè suɔ wī díɛ !
4 Yeli bèle,
siinyɛninɛ,
yeli sí wè yebilige nīʔ,
ki- nyaa ki cɛngɛ ki ga yeli fuu bɛ̀ kàyuuwo tíɛlɛʔ.
5 Ki 'nyaa yeli ye mìɛni bèle,
yeli yē cɛngɛ wuulo nɛ́ ní kpìɛnmɛ pìile.
Weli wè yebilige nīʔ,
bèri tári yebilige nīʔ.
6 A ki sí yē bɛ̀ gè,
ye fǎga tí weri ŋɔ́niʔ bɛ̀ sɛnminɛ tíɛlɛ bèleʔ;
gìi ki 'pɔ́ri gè,
ye- tí we puu nyɛminɛ,
we gbòbori we yaʔab.
7 Bìli pe nyɛ́ni ŋɔ́ni bèle,
pìlige nī pe sî nɛ ŋɔ́ni;
bìli míɛni pe nyɛ́ni gbun nɛ tun bèle,
pìlige nī pe sî nɛ gbun nɛ tun.
8 Weli bálì sí bīɛlɛ cɛngɛ wuulo bèle,
ye tí we- puu gbòboriyaʔala,
we- tɛ́ngɛlɛ le lè wìye nɛ̄ nɛ́ dɛ́nigɛ ní gè bɛ̀ timɔzigeyɛgɛ tíɛlɛ,
wé sí kapiɛngbuɔn ndɔ̀ngɔ tɔ́n gè nyùgo nī gè,
dí suɔlɔ sɔ̀ngirɔ taʔadiʔɛ ki sí puu we mɛ́ bɛ̀ kapiɛngbuɔn ndɔ̀ngɔ tíɛlɛc.
9 Nɛ́ ki cɛ́n Kulocɛliɛ wiì weli líɛ wi funyɛrigɛ ki- puu weli kúrugu wīʔ;
ʔéʔe,
wi 'weli líɛ we- suɔlɔ taa lè weli Kàfɔli Zezi Kirisi wire fànʔa nɛ̄ wī,
10 wire ŋáà wi 'kùu weli kɛnmɛ nɛ̄ bè dí weli sí pínɛ bè puu wiile nɛ́ wi ní wè,
a weli yē wiile yo,
a weli yē kùulo yo.
11 Kire kɛnmɛ nɛ̄,
yeri yìye gbiʔɛlɛ ye mìɛni nigbe nigbe bèle,
yeri ŋɔri nyɔ́gi yìye nī,
majo bɛ̀ yeli nɛ ki kpínʔini nɛ kúu gè.
Pɔli síɛrilɛ lè nɛ́ wi siɛnsɛnrɛ dè
12 Siinyɛninɛ,
weli nɛ ki caa yeli mɛ́,
bìli pe nyɛ́ni baara yeli sunʔɔmɔ nī bè,
níɛ yeli tìí Kàfɔli wi koligo nɛ̄ gè,
nɛ nyu nɛ yeli yɛrigi wè,
yeri pe kpóri.
13 Nɛ̀ pínɛ yeri kpuʔɔrɔ tari pe nɛ̄,
ye- pe woli yaʔa lè ni- yeli dɛ́ni pe baara tire kɛnmɛ nɛ̄ bè.
Ye- puu yanyige nɛ̄ nɛ́ yìye ní.
14 Siinyɛninɛ,
weli nɛ yeli fiɛn wī,
bìli bīɛlɛ sàliyɛfɔlilɔ bèle,
yeri nyu de tìí pe nɛ̄.
Bìli bīɛlɛ céri ti 'kùu pe nɛ̄ bèle,
yeri nyu yeri ŋɔri nyɔ́gi pe nī.
Bìli fànʔa ki 'cɛ́ri gè,
yeri pe tuʔɔlɔ,
ye- puu funnyige ní siɛnnɛ pe mìɛni kúrugu bèle.
15 Ye- yìye cò,
siɛn fǎga kapiʔi tíʔɛ bè kapiʔi fuʔɔ tɔ́n wàa mɛ́ʔ.
Gìi ki 'pɔ́ri gè,
yeri cɛ̀ngɛ kire caa súuri,
ye puu yeri kacɛ̀ngɛ kire caa ki- puu yeli sunʔɔmɔ nī,
nɛ̀ pínɛ yeri ki caa nɛ́ siɛnnɛ pe mìɛni ní.
16 Ye- puu fundaanra nɛ̄ lɛ̀gɛlɛ ke mìɛni nī.
17 Yeri náari súuri.
18 Kele ke mìɛni nī gèle yeri Kulocɛliɛ síɛri wè,
kire gáà kire Kulocɛliɛ wiī nɛ caa yeli mɛ́ bɛ̀ yeli yē Zezi Kirisi wuulo bèle.
19 Ye fǎga de Kulocɛliɛ Pìle kàsun fíri gèʔ.
20 Kele gílì ke 'juuKulocɛliɛ siɛnjuulo siɛnrɛ nī dè,
ye fǎga de ti cùɔnnɔ́ʔ.
21 Gìi sí ki 'pɔ́ri gè,
yeri kele ke mìɛni siʔɛ,
ye ke cɛ́n,
a gìi yē cɛ̀ngɛ gè,
ye- kire cò.
22 Sìpiire felide ti mìɛni dè,
ye- yìye cò ti nɛ̄.
23 Kulocɛliɛ wè,
wire ŋáà wī yanyige kàfɔli wè,
wire tíimɛ wè wi- yeli kpíʔile ye- puu wàlidɛngɛlɛ Kulocɛliɛ mɛ́ wè,
dí yeli pìle ni mìɛni lè,
nɛ́ yeli fungo ní gè,
nɛ́ yeli cetinnɛ ní lè,
ti- puu tiɛlɛ fùn,
ti- gbòbori ti yaʔa cɛngɛ gíì weli Kàfɔli Zezi Kirisi wi kɛ́nì pɛn wè.
24 Ŋàa wi 'yeli yeri wè,
wiī tɛ́ngɛmɛ siɛn,
wi bé sí ki kpíʔile wī.
25 Siinyɛninɛ,
yeri náari weli mɛ́ de pínɛ.
26 Ye- weli siinyɛninɛ pe mìɛni síɛri baa,
ye pe suɔn nɛ́ siinyɛnigɛ dɛ́nigɛ ní.
27 Mi nɛ yeli fiɛn wī,
weli Kàfɔli wire kɛnmɛ nɛ̄ bè,
ye- sɛbɛ ŋáà wi siɛnrɛ kàla dè ye tìɛ siinyɛninɛ pe mìɛni nɛ̄.
28 Weli Kàfɔli Zezi Kirisi wi kpuʔɔrɔ ti- puu nɛ́ yeli ní.