Pe 'Piɛri nɛ́ Zanyé cò bèle
4
1 Bà Piɛri nɛ́ Zan pe 'puu nɛ nyu nɛ tíin nɛ́ siɛnnɛ ní bèle,
a kacuɔnrilɔ pe pɛ́nì yiri peli nɛ́ Kulocɛliɛ Gbùʔɔrɔsaʔa wélifɔlilɔ pe kàfɔli ní wè,
nɛ̀ fàri Sadusiɛnnɛ nɛ̄ bèle.
2 Piɛriyé pe tɛnmɛnɛ ni cé laamɛ piɛn pe nī gàa pe 'puu nɛ nyu kàʔa siɛnnɛ mɛ́ bèle,
níɛ Zezi wori jáari dè nɛ́ jo bɛ̀ wi 'nyɛ́ nɛ̀ yiri wè,
dí kúbilo míɛni pe bága nyɛ́ bè yiria,
3 A pe sí pe cò nɛ̀ pe tɔ́n kasuu nī,
níɛ siri kpìɛnmɛ pi ga tuu,
ki 'nyaa pìlige ki cé wúɔ nɛ̀ kúɔ wī.
4 Siɛnniʔɛnɛ cé sí Piɛriyé pe siɛnrɛ lúʔu dè,
nɛ̀ tɛ́ngɛ ti nɛ̄.
A ki 'kpíʔile a tɛ́ngɛfɔlilɔ pe 'niʔɛ nɛ̀ nàguɔlɔ siramuʔɔ sirakogunɔ (5 000) kúɔ.
5 Ki kpìɛnduu gè a Zuufulo pe yiɛgininɛ bèle nɛ́ liɛlɛ ní bèle,
nɛ̀ fàri Fànʔa Siɛnrɛ sɛbɛcɛ́nminɛ nɛ̄ bèle,
a pe 'pìye pínɛ Zerizalɛmi kàʔa mɛ́.
6 Ana 'puu baa,
kacuɔnrilɔ kàfɔli wè,
nɛ́ Kayifa,
nɛ́ Zan,
nɛ́ Alɛgizandiri,
nɛ̀ fàri kacuɔnrilɔ kàfɔli narigɛ wuulo pe mìɛni nɛ̄ bèle.
7 A pe 'Piɛri nɛ́ Zan kɔ́ri bèle nɛ̀ pɛ́nì yérige sunʔɔmɔ nī nɛ́ pe yúgo nɛ́ jo:
«Sé yeli 'kire fànʔa gáà taa gè,
á kire 'laa ŋáa míʔɛ nɛ̄ yeli 'kire baara dáà kúɔ dè ?»
8 A ki 'nyaa bɛ̀ Kulocɛliɛ Pìle ni cé tìgi Piɛri nɛ̄ wè nɛ̀ wi nyì wè,
a Piɛri wi 'jo:
«Mi siinyɛninɛ yeli bèle Isirayɛliyé kàfɔlilɔ bèle nɛ́ liɛlɛ ní bèle,
9 siɛnnɛ piyē nɛ weli cɔ̀rí pàngɛ gè nɛ́ jo gáa nɛ̄ weli 'kacɛ̀ngɛ kpíʔile 'siɛnkpɔliwɔ nɛ̄,
nɛ̀ wi puʔɔ ?
10 Ye- sí weli wori lúʔu dè ye mìɛni bèle,
yeli nɛ́ Isirayɛli kùlo wuulo ní bèle:
Zezi Kirisi wè Nazarɛti wuu wè,
ŋàa yeli 'kóri tiiparigɛ nɛ̄ gè,
á Kulocɛliɛ wi 'koli nɛ̀ wi nyɛ́ nɛ̀ yige kúbilo nī bèle,
wire míʔɛ nɛ̄ nàguɔ ŋáà wiī bile yeli yiʔɛ mɛ́ gè nɛ́ puʔɔ wè.
11 Wire sí wī bɛ̀ Kulocɛliɛ siɛnsɛbɛrɛ ti 'ki juu nɛ́ jo:
Sìndɛnigɛ gíì yeli cé kɛ́n nɛ̀ wáa gè,
yeli bèle saafaanna bèle,
kire sí ki kɛ́nì kò saʔa kàluulo kàdɛnipelige gè,
gàa ki 'saʔa cò gè nɛ̀ yérige gèb.
12 «Ki 'nyaa suɔlɔ niǐ gbɛ̀ taa siɛn wáà mɛ́ wiiyɛʔ,
nɛ̀ yiri Zezi wire nīʔ,
nɛ̀ taʔa gíi nɛ̄,
míʔɛ káà wè baa duniya nī wèʔ,
bè jo Kulocɛliɛ wi 'ki kɛn siɛnnɛ mɛ́ bèle ki- gbɛ̀ weli suɔʔ.»
13 A Piɛriyé kɛnmɛ pi 'kàyuʔujuulo gboli wuulo pe fungo wúɔ kátii wire nɛ́ Zan ní wè,
bɛ̀ ki 'nyaa pe 'puu nɛ pe siɛnrɛ nyu dè nɛ́ nàzorido ní dè,
nɛ̀ sí ki taa piyè cé tɛnmɛnɛ kpíʔile Fànʔa Siɛnrɛ ti wori nɛ̄ dèʔ,
nɛ̀ pínɛ piyè puu siɛnnɛ nɛ tɔ́ri nɛ́ pe níʔ.
Kàyuʔujuulo gboli wuulo pe cé pe nyaa nɛ̀ cɛ́n,
nɛ̀ ki cɛ́n Zezi kòrinyɛninɛ pálì pe 'puu.
14 Nɛ́ sí nàguɔ nyaa wè nɛ́ pe ní,
ŋàa wi cé kíni nɛ̀ puu mɔ̀nigiwɔ wè,
á pe 'wi puʔɔ wè.
A siɛnrɛ ti 'kúɔ pe nyuɔyɔ nī yè.
15 A pe 'pe cìra nɛ̀ yige kàyuʔujuulo gboli saʔa nī gè,
nɛ́ sí pìye nyaa nɛ̀ siɛnrɛ cáan dè nigbe nɛ̄.
16 A pe 'jo:
«Gáa cɛ we bé kpíʔile nàguɔlɔ bálì nɛ̄ bèle,
bɛ̀ ki 'nyaa pe 'fìɛ ŋáà kpíʔile wè a Zerizalɛmi kàʔa wuulo pe mìɛni 'wi nyaa wè ?
Weli sǐ gbɛ̀ jo wiyè tire cɛ́nʔ.
17 Kiì sí yɛli kaala náà ni wori ti- yiri kùlo nī lèʔ.
We bé ti juu bè láʔa pe nɛ̄,
pe fǎga ní yakaa juu siɛn mɛ́ míʔɛ gáà ki wori nɛ̄ dèʔ,
Zezi wèʔ.»
18 A pe 'koli nɛ̀ Piɛri nɛ́ Zanyé yeri bèle nɛ̀ pɛ́nì ki juu nɛ̀ gbɛ̀ngɛ pe nɛ̄ nɛ́ pe yɛ pe fǎga ní tíi bé yakaa juuʔ,
bé nɛ́ ga jo bè tɛnmɛnɛ kɛn siɛn mɛ́ Zezi míʔɛ nɛ̄ gèʔ.
19 A Piɛri wè,
nɛ́ Zan ní wè,
a pe 'pe siɛnnugoro kɛn dè kàyuʔujuulo gboli wuulo mɛ́ bèle nɛ́ pe yɛ:
«Ye- ki sɔ̀ngi wêli yeli tíimɛ bèle,
yeli ki 'nyaa lé a ki 'sín Kulocɛliɛ yiʔɛ mɛ́ gè,
siɛn de lúru yeli nɛ̄ lé,
dí wiri lúru Kulocɛliɛ nɛ̄ ?
20 Gìi ki 'weli kúɔ bèle,
weli sǐ gbɛ̀ kò ga weli sì ki juuʔ,
gàa weli 'nyaa gèʔ,
nɛ́ gàa weli 'lúʔu gèʔ.»
21 A kàyuʔujuulo gboli wuulo pe 'koli nɛ̀ pe fígiri nɛ́ nyasiɛnrɛ ní dè nɛ̀ ti juu nɛ̀ gbɛ̀ngɛ pe nɛ̄,
nɛ́ sí pe yaʔa a pe 'kɛ́.
Ki 'nyaa piyè cé kɛnmɛ taaʔ mɛni pe bé pe wuʔɔ síɛ bèleʔ,
bɛ̀ siɛnnɛ pe 'puu baa bèle.
Kàʔa siɛnnɛ pe mìɛni tɔ̀ni nɛ̀ puu nɛ Kulocɛliɛ gbùʔɔrɔ́ wè nàguɔ ŋáà wi puʔɔlɔ ni wori nɛ̄ dè.
22 Ki 'nyaa nàguɔ ŋáà nɛ̄ kakpuʔɔ gáà ki cé kpíʔile á wi 'puʔɔ wè,
wi yiʔɛlɛ ke cé tóri yiʔɛlɛ togosiin nɛ̄.
Tɛ́ngɛfɔlilɔ gboli ni 'Kulocɛliɛ náari wè
23 Bà pe 'pe yaʔa bèle,
a Piɛri nɛ́ Zan ní wè a pe 'koli nɛ̀ kɛ́ pe wuulo kúrugu bèle,
nɛ̀ sɛ́nì ti mìɛni juu nɛ̀ tìɛ pe nɛ̄,
gìi ki 'peli taa kacuɔnrilɔ kàfɔlilɔ tiʔɛ nī gè nɛ́ Zuufulo pe liɛlɛ ní bèle.
24 Bà pe 'siɛnrɛ dáà lúʔu dè,
a pe 'funyɔ pínɛ yè nɛ́ wúɔ nɛ̀ yékpuʔulo yɛ̀gɛ gèle nɛ̀ Kulocɛliɛ náari wè,
nɛ́ jo:
«ʔé,
Kàfɔli,
muɔ wī ma 'nyìʔɛnɛ nɛ́ dàala yige lè,
nɛ́ kuʔɔjii lakpuʔɔ ní gè,
nɛ́ ti laamɛ yɛrɛ ti mìɛni ní dè !
25 Muɔ ma 'siɛnrɛ dáà le dè weli tuuliʔɛ Dawuda nyuɔ nī gè muɔ Pìle ni fànʔa nɛ̄ gè,
muɔ baakuɔwɔ sí wī.
Wi cé jo:
Gáa kɛnmɛ nɛ̄ kùlogolo kálì nɛ kìye gbunʔuni nɛ tùngú mmɛ gè ?
Gáa nɛ̄ siɛnnɛ bálì pe 'pìye pínɛ nɛ̀ nyuɔ le waʔanɛ ?
26 Duniya kùlofɔlilɔ bèle nɛ́ yiɛgininɛ ní bèle,
pe 'pìye pínɛ nɛ̀ yɛ̀ nɛ̀ yéri nɛ̀ nyuɔ le Kàfɔli nɛ̄ wè nɛ́ wi Siɛnnyiɛnɛgɔnwɔ ní wèc.
27 «Ki 'nyaa Erodi wè nɛ́ Pɔnsi Pilati ní wè,
pe 'pìye pínɛ kàʔa gáà nī gè,
peli nɛ́ kùlogolo kálì siɛnnɛ pe yiɛgininɛ ní bèle,
nɛ̀ fàri Isirayɛli siɛnnɛ nɛ̄ bèle,
a pe 'nyuɔ le muɔ tiɛlɛfun baakuɔwɔ nɛ̄ wè,
Zezi wè,
wire ŋáà muɔ 'nyíɛnɛ nɛ̀ kɔ̀n wè.
28 A kire 'kpíʔile a pe 'muɔ nyɛ́ni kele ke mìɛni fori nɛ́ muɔ fànʔa ní gè,
gàli muɔ cé kíni nɛ̀ yɛ̀gɛ muɔ fungo nī gè nɛ̀ yaʔa gèle.
29 Bɛ̀ sí ki yē píra ŋáà nī wè,
Kàfɔli,
-ki wéli bà pe 'nyuɔ le weli nɛ̄ wè.
Ma sí ki kpíʔile muɔ baakuɔlɔ pe- gbɛ̀ jáa bè muɔ siɛnrɛ juu dè bè láʔa nɛ́ nàzorido ní.
30 Ma tí muɔ fànʔa ki- cɛ́n dí yaala de pori,
fìɛlɛ nɛ́ kakpoliyo de kpínʔini muɔ tiɛlɛfun baakuɔwɔ wire míʔɛ ki fànʔa nɛ̄ gè,
Zezi wè.»
31 Bà pe kɛ́nì náari nɛ̀ kúɔ mmɛ gè,
a tiʔɛ ki 'cúungo nɛ́ pe ní baa pe 'puu gbuʔulibolo bèle.
A Kulocɛliɛ Pìle ni 'tìgi pe mìɛni nɛ̄ nɛ̀ pe nyì,
a nàzorido 'jíin pe nī a pe 'yɛ̀ nɛ Kulocɛliɛ siɛnrɛ nyu dè.
Faʔa gè tɛ́ngɛfɔlilɔ pe 'puu nɛ pe kɔliyɛrɛ pínɛ dè
32 Kire lɛ̀lɛ nī lè,
tɛ́ngɛfɔlilɔ pe mìɛni funyɔ yi 'puu nigbe,
sɔ̀ngirɔ ní dè nuro pe mɛ́.
A wàa cé puu yakaafɔli wè,
siɛn wi nɛ̌ cé de ki kàfɔlimɔ táriʔ.
Gìi cɛ pe 'puu nɛ kpínʔini gè,
pe nɛ̂ cé pe kɔliyɛrɛ ti mìɛni pínɛ.
33 Fànʔa káà 'puu Zezi tundunminɔ mɛ́ bèle kpuʔɔ pe Kàfɔli Zezi nyɛ́yirile wori tìí dè,
nɛ̀ pínɛ pe mìɛni bèle Kulocɛliɛ kajɛ̀ngɛ ki 'puu pe nɛ̄ kpuʔɔ.
34 Wàa sì puu yakaa fùnʔ.
Bìli pe 'puu dàʔalafɔlilɔ bèle,
á kire 'laa kpáayafɔlilɔ bèle,
pe nɛ̂ cé ti pári nɛ̀ wali pínɛ wè,
35 nɛ̀ sɛ́nì wi kɛn Zezi tundunminɔ mɛ́ bèle.
Peli pe nɛ̂ cé wi liɛlɛ,
nɛ̀ yɛli nɛ́ siɛnnɛ pe màakuu nyuɔrɔ ní dè.
36 Nàguɔ wáà 'puu baa pe 'puu nɛ wi ye Yusufu,
a tundunminɔ pe 'míʔɛ káà le wi nɛ̄ nɛ wi ye Barinabasi,
kire kɔri wi 'jo:
siɛn ŋáà wi sî juu nɛ̀ ŋɔri nyɔ́gɔ siɛn nī wè.
Leviiyé wuu wi 'puu,
Siipiri kàʔa ki 'puu wi kàsiʔi gè.
37 Siʔi 'puu ki nàguɔ mɛ́ wè,
a wi 'ki pári nɛ̀ sɛ́nì wali kɛn wè Zezi tundunminɔ mɛ́ bèle.