Mark 9

¹ Hanchu ama nanakin an kôm han, “Nangni ki ril, hi taka om senkhat ngei hih chu Pathian Rengram hah a sinthotheina leh a zuong tung an mu maka chu thi no ni ngei” a tia.

Mêl Inthûlna

(Mat 17:1-13; Luk 9:28-36)

² Sûn ruk suoleh chu Jisu'n Peter, Jacob leh Johan a tuonga, an then vein muol insanga son ase pui ngeia. An mitmu chung in Jisu mêl a hong inthula, ³ A puonsil ngei khom a chek antera rammuola puon rusûk ngâi ngei murdi khom rusûk senla ngei ama angdor hi chu minchek thei no ni ngei. ⁴ Hanchu, ruaisi inthum ngei han Jisu'n Elizah leh Mosia chongpui laitak an mua. ⁵ Hanchu, Peter in Jisu kôma, “Miminchupu, hi taka om hi ei ta rangin asa! Puon in inthum sin kin ta nangma rang inkhat, Mosia rang inkhat, Elizah rang inkhat sin kin ti” a tia. ⁶ An chi rei sikin ati rang lele khom riat mak ngeia.

⁷ Masuole chu, sûmphai a zuong oma anni ngei hah sûmphai in a zuong mukhu ngeia, sûmphai renga hah chong a zuong inringa, “Ama hih ka Naipasal moroi tak ani—achong rangâi roi!” a tia. ⁸ Hanchu, an en titir nôka, Jisu telloi chu tute dang an kola mu khai mak ngeia.

⁹ Muol chung renga an zuong chum lain Jisu'n an kôma, “Miriam Naipasal thina renga an thoinôk maka chu nin neinun mu hi tute kôm ril no roi” tin chong a be ngeia.

¹⁰ A chong be ngei ha an dôna, nikhomrese, anni leh anni kara chu, “‘Thina renga in thoinnôk’ ti hih khoi tina mi hi?” Ti'n an misir min tuk ngâia. ¹¹ Hanchu, anni han Jisu kôma, “Khoithomo Balam minchupu ngeiin, Elizah zuong bak a ti an ti?” tin an rekela.

¹² Ama'n an kôma, “Neinun murdi cherel rangin Elizah chu a zuong bak nget rang ani. Hankhoma, khoithomo Pathian Lekhabun, Miriam Naipasalin la tuong ok a ta, hengin la om ati a tia? ¹³ Nikhomrese, nangni ki ril Elizah chu a zuong suo keng ani zoi, a chung roi Pathian Lekhabu'n a ril anghan a chunga an nuom murdi an tho pe zoi,” a tia.

Jisu'n Ramkhori sur Naipangte amindam

(Mat 17:14-21; Luk 9:37-43a)

¹⁴ Hanchu, ruaisi ngei kôma an zuong tungin chu an kola loko tamtak ngei leh Balam minchupu ngeiin an lei inkhal pui laitak an zuong mua. ¹⁵ Loko ngei han Jisu an mu lechu an rangâi ankhel oka, Ama tiang an tana chubai an va peka. ¹⁶ Jisu'n a ruaisi ngei kôma, “Anni ngei leh han khoi thurchi mo nin lei in khal ha?” ti'n a rekela.

¹⁷ Loko ngei laia mi inkhatin a kôma, “Miminchupu, ka naipasal ramkhori a sur chongloi no kôm ko hong tuong ani. ¹⁸ A surna murdi a anlet kelen ngâia, a cherhuon a suoka, aha ariela, a ngar tit ngâi. Rujul pei rangin nu ruaisi ngei ke ngenna, nikhomrese thei mak ngei,” ti'n a ril.

¹⁹ Jisu'n an kôma, “Kho anga mi iemna boi mo nin ni! Idorsot mo nin kôm omin nangni ko dônsui thei ranga? Naipangte hah ko kôm hong tuong roi!” a tia. ²⁰ Hanchu, a kôma an hong tuonga.

Ramkhori han Jisu a hong mu'n chu naipangte hah a nunuom a lo bita, hanchu, anleta, avanluoi ahonluoia, a cherhuon a suoka. ²¹ Jisu'n apa kôma, “Hi anga a om phutna hih khotik renga mo ani zoi?” ti'n arekela.

“A naipang chang renga” ²² “Ramkhori hin ama that rang aboka voi tamtak meiah leh tuiah amin leta. Ne thei ngâi inchu mi lungkham inla, misan roh!” ti'n a rila.

²³ Jisu'n a kôma, “Ne thei ngâi inchu a! A taksôn ngei ta rangin chu itinreng sin thei ani,” ti'n a thuona.

²⁴ Hanchu, naipangte apa han harenghan, a heta, “Takosôn, takosôn uol theina rangin misan roh!” a tia.

²⁵ Hanchu, Jisu'n loko an hong nai titir amu'n chu ramkhori kôm han, “Nangma ramkhori kuorset leh chongloi, naipangte sung renga hong jok roh, a sunga lut nok tet khailoi rangin chong nang ke pek,” a tia.

²⁶ Hanchu, ramkhori hah a het raka, naipangte hah a nunuom alo bit suole chu a mojoka. Hanchu, naipangte hah athi rang dorin a oma, mi tamtakin chu, “Athi zoi ke!” an tia. ²⁷ Hannirse, Jisu'n a kuta a sura, a keithoia, masuole chu an ding zoia.

²⁸ Hanchu, Jisu in sunga a luta, a ruaisi ngeiin inrukte an rekela, “Ithomo keini inte Ramkhori kin rujul pai theiloi?” an tia.

²⁹ Jisu'n an kôma, “Hi anga hi chu chubai niloi'n chu khoite rujul thei nimak,”^a tin a thuona.

Jisu athi rang amisir nokna

(Mat 17:22-23; Luk 9:43b-45)

³⁰ Jisu leh a ruaisi ngeiin ha mun hah makin Galilee ram sirin an sea, a omna tute'n an riat rangin Jisu'n nuom maka; ³¹ Masika han, “Miriam Naipasal hih miriam ngei kuta surin om a ta, that an ta. Nikhomreseh, sûn thum suo lechu inthoi nôka ta” ti chong a ruaisi ngei a minchu ngei sika.

³² Hannirese, a chongril omzia hah riat thei mak ngeia, a rekel rang khom ngam mak ngeia.

Tumo Aliantak?

(Mat 18:1-5; Luk 9:45-48)

³³ Hanchu kapernuam an hong tunga, in sunga an lut lechu a ruaisi ngei kôma, “Lampuia han khoi roi mo nin rila nin inkhal hah?” ti'n arkela.

³⁴ Hannirese, anni han thuon mak ngei, lampuia an hong inkhal hah “Ei laiah hin tumo aliantak rang?” ti roi ani sikin. ³⁵ Hanchu, Jisu an sunga, ruaisi somleinik ngei hah a koia, an kôma, “Tutukhom aliantak ani nuom inchu achintak changin mi murdi suak ani nget rang ani” a tia. ³⁶ Hanchu, naipangte a koia, an laiah amin ding pe ngeia, a kuo a, an kôma, ³⁷ “Tutukhom, kirming sika hi anga naipangte inkhat khom a modômpu chu, keima mi modôm ani. Hanchu, tutukhom keima mi modômpu chu mi tîrpu khom a modôm ani sa” a tia.

Mi chakal loi chu ei tianga kop ani

(Luk 9:49-50)

³⁸ Johan in a kôma, “Miminchupu, mi inkhat ni riminga ramkhori rujul kin mua, ei laia mi ani loi sikin kin hong khap” a tia.

³⁹ Jisu'n an kôma, “Khap rang bôk noroi, tute kirminga sininkhel a sina hareng han mi ero thei kelen rang reng omak ngei. ⁴⁰ Tutukhom mi chakal loi chu ei tianga kop ani. ⁴¹ Tutukhom, keima mi nin ni sika tuidai kilat khat khom nangni a min nekin chu nangni ki ril, ha mi hah raisanman chu man nget a ti.

Saloina Methemna

(Mat 18:6-9; Luk 17:1-2)

⁴² “Tutukhom taksôn mi innoi ngei laia mi inkhat khom mi minba inchu a ringa bunoi lung a lianpa min orin tuikhangliana inchom senla ata rangin sa uol ati. ⁴³ Masikin nu kutin nang a minchai inchu tanpei roh! Kut inik dôna dukmun meidila se nekin kut boia ringna lut nata rangin asa uol. ^b ^45-46 Hanchu, neke'n ni iemna nang a minba inchu tanpai kelen roh! Ke innik dôna dukmuna peia om nekin chu ke boia ringna a lut chu nata rangin asa uol. ⁴⁷ Hanchu, ni mit'n na taksôn nang a mindok inchu kelpei roh! Mit kangkhat dôna Pathian Rengrama lut nata rangin asa uol mit innik dôna dukmuna peia om nekin chu. ⁴⁸ Ha munah han chu an rulung khom thi khai ngâi maka, mei khom thi khai ngâi mak.

⁴⁹ “Inbolna michi al an minthar ngâi angin mi murdi meiin minthar la ning anti.

⁵⁰ “Michi hih a al; nikhomrese, a dông nuk inchu khoi le mo nin min al nok ranga?

“Nin laia mal inchangna michi nei ungla, insûkir in om roi” atia.