Ɨkalaata ɨya taatu ɨya
Yoohani
ɄYoohani ahunʼnamuha ʉGaayo
1
Ɨkalaata ɨnɨ ɨfuma huliinɨ anɨ nɨnʼgoosi wɨ shibhanza.
Ɨhusimbila aawe Gaayo wʉ‑ʉli nʼkʉndwe waanɨ,
wɨ‑ɨʼgɨɨne hu lyoli.
2 Nʼkʉndwe waanɨ,
ɨhupuutila hwa Ngʉlʉbhɨ huje ʉjendelelaje shinza hu shila hantu mu wʉʉmi waaho.
Ɨhupuutila,
huje ʉmʼbɨlɨ gwaho gubhe shinza,
nanshi shʉ‑ʉjendeelela shinza mu lwɨtɨho hwa Ngʉlʉbhɨ.
3 Nahasʉngwɨlwe tee abhooziwa abhamwetu bhamo lwa bhahɨnzɨle na humbʉʉzye huje,
ʉjendeelela akhate ɨlyoli na‑alembe mu lyoli.
4 Nahamo ahantu ha hahumpeela ʉluseshelo ʉlugoosi tee,
ashile lwɨ‑ɨhwʉmvwa huje abhaana bhaanɨ bhajendeelela alembe mu lyoli.
Ʉgolosu wa Gaayo
5 Nʼkʉndwe waanɨ,
aawe ʉli nʼgolosu hu gaala gʉ‑ʉhubhabhombela abhooziwa abhamwetu mu lwɨtɨho,
hwope na hu bhajenu.
6 Abhooziwa ɨbho bhashimamiiye ɨshibhanza ɨshɨ‑ɨpa ʉkʉndwa waaho.
Ɨshi ɨhulaabha huje ʉjendelelaje hubhaavwe shinza shɨnɨɨsho,
nanshi ʉNgʉlʉbhɨ sha‑ahwanza.
7 Abhantu ɨbho bhashʉʉla humʼmombele ʉMwɨnɨ ʉYeesu.
Hu nshʉʉla yaabho ɨyo,
saga bhahwambɨɨlɨla ahantu hohonti aha hubhaavwe afume hwa bhantu ɨbho saga bhamʼmwɨtɨɨshe ʉNgʉlʉbhɨ.
8 Ɨshi leelo,
atɨ tihwanziwa hubhaavwe abhantu nanshi ɨbho,
huje tibhombe peeka nabho ɨmbombo ɨya‑anyampaanye ɨlyoli.
Ɨshifwani ɨshibhiibhi ɨsha Diyotileefe
9 Nahashisimbiiye ɨshibhanza sheenyu ɨkalaata,
leelo ʉDiyotileefe wa‑ahwibhɨɨha hwitagaalila nkati yʉ nʼgoosi waabho,
saga ahuzisaaga ɨzyo ɨmbasimbiiye.
10 Ɨshi,
lwa nɨnza ʉhwo,
nahayiyanga pa pazelu gonti ga‑abhomba,
aga hubhayanje abhanjɨ ni‑ilenga ɨlyo ahutiyanjila atɨ.
Saga ga gɨɨgo lwene,
leelo ʉmwene akhaana hwope na hubhambɨɨlɨle abhooziwa abhamwetu ɨbho bhahubhayaatila ʉhwo.
Nantele ahubhakhaana na bhantu abhanjɨ bha bhahwanza hubhambɨɨlɨle,
hwope na hubhadaje mu shibhanza.
11 Nʼkʉndwe waanɨ,
ʉgandi alondolezye ɨshifwani ɨshibhiibhi ɨsha muntu ʉyo,
leelo ʉbhombaje ɨnyinza.
Ʉmuntu wowonti wa‑abhomba ɨnyinza,
ʉyo muntu wa Ngʉlʉbhɨ.
Leelo wowonti wa‑abhomba ɨmbiibhi,
ʉyo saga amʼmɨɨnye ʉNgʉlʉbhɨ huje yʉ naanu.
Ɨshifwani ɨshinza ɨsha Demetiliiyo
12 Abhantu bhonti bhasimishizya huje ʉDemetiliiyo muntu mwinza,
nantele ɨmbombo zyakwe zyɨ golosu.
Lyoli zisimishizya huje ali muntu wa‑akhata ɨlyoli.
Hwope natɨ tisimishizya huje ali muntu mwinza,
nawe ʉmɨɨnye huje ʉsimishizi weetu wɨ lyoli.
Amazwi aga hu malishilo
13 Ɨndi na mazwi gaminji ga nahanzaga huje ɨʼsimbile,
leelo saga ɨhwanza aje ɨnsimbe ɨgo mu kalaata.
14 Leelo ɨsʉʉbhɨla huyaatile sinta akhaabhe,
huje tahayanje lwa tahayilolana.
15 Ʉtengaanu wubhe peeka naawe.
Abhamanyani bheetu abhɨ‑ɨpa bhahulamuha.
Nawe,
ʉtilamushile abhamanyani bheetu ʉhwo,
shila weeka hwi‑itaawa lyakwe.