Hubhaavwe abhooziwa abha hu Yelusaleemu
9
Ɨshi,
saga ɨhwanza hubhasimbile tee ɨnongwa ɨzyɨ mbombo yeenyu ɨya hubhaavwe abhooziwa abha hu Yelusaleemu,
2 pɨpo ɨmɨɨnye ʉmwoyo gwenyu ʉgwa hubhaavwe abhanjɨ.
Nanɨ ɨhwibaada hu nongwa yeenyu hwa bhantu abha hu Makedoniya huje,
amwɨ mubhantu bha hu shibhanza ɨsha hu Akaaya,
mwahahwilɨngɨɨnye afumye afume ʉmwaha ʉgwo gwa gushilile.
Ʉmwoyo gwenyu ʉgwo gubhabhombile abhinji mwɨ‑ɨbho abhe nʉ mwoyo ʉgwa‑afumye.
3 Ɨshi ɨmbasonteleziizye abhooziwa abhamwetu ɨbha,
huje mubhombe nanshi ɨsho nahabhasʉmbɨle amwɨ hwa bhantu abha hu Makedoniya.
Ɨmbombile ɨsho huje ɨgo tahabhabhʉzɨɨzye hu nongwa yeenyu gasahaloleshe huje tahali tihubhasʉmba lwene.
4 Enya,
nkashele ɨnɨnze ʉhwo peeka na bhantu abha hu mukowa ʉgwɨ Makedoniya na‑alole saga muhwilɨngɨɨnye,
ɨpo munza‑abhe mwandeetela ɨnsoni hu nongwa yɨ lusʉʉbhɨlo lwetu huliimwɨ.
Nantele,
namwɨ munza‑abhe nɨ nsoni ɨzyo saga ziyangwa.
5 Ɨshi,
ɨndolile shinza ɨmbalaabhe abhooziwa abhamwetu ɨbha,
bhatagaalile ʉhwo huje bhalɨngaanye ɨvintu ɨvyo mwahafinjile huvifumye.
Mwɨ‑ɨlyo munza‑abhe muhwifumiizye hu mwoyo ʉnʼzelu,
saga aje ʉmo ahayibha abhʉmɨlɨzɨɨzye.
Afumye hu mwoyo ʉnʼzelu
6 Mwizuhaje huje,
“Ʉmuntu ʉyo avyala vishe,
avuna vishe,
nantele ʉyo avyala vinji,
avuna vinji.”
7 Ʉmuntu wowonti afumye nanshi ɨsho asɨbhɨlɨɨye mu mwoyo gwakwe,
aleshe afumye hu zugumizu hwope abijiliziwe,
pɨpo ʉNgʉlʉbhɨ ahunʼgana ʉmuntu ʉyo afumya hu mwoyo ʉnʼzelu.
8 Ɨpo ʉNgʉlʉbhɨ ahayibha ahubhasaya mu minji,
huje hu habhaazyo honti mubhe nɨ vintu vyonti ɨvyo mubhuliliilwe,
huje mubhe bhantu bha‑abhombe ɨnyinza ɨnyinji ɨzya hubhaavwe abhanjɨ.
9 Nanshi ɨsho ɨsimbwilwe mu Nsimbo ɨMfinjile huje,
“Afumiizye hu mwoyo gwonti hubhapeele abhapɨɨna,
ʉgolosu waakwe wa wiila.”a
10 ɄNgʉlʉbhɨ ʉyo ahumʼpeela ʉmuntu ɨmbeyu ɨya‑avyale nɨ ntogito ɨya‑alye,
ya yʉʉyo ahayihubhapeela amwɨ ɨmbeyu ɨya‑avyale na hubhonjeelezye.
Hwa huje ahayihubhapeela na hubhonjeelezye ʉmwoyo ʉgwa‑abhombe ɨgo gakhondɨɨye pitagaalila lyakwe.
11 ɄNgʉlʉbhɨ ahayibha ahubhapeela ʉtabhazi mu gonti,
huje mubhanje nɨ nkʉmbʉ ɨnsiku zyonti.
Mwɨ‑ɨlyo abhantu bhahayibha bhahunʼsalifya ʉNgʉlʉbhɨ hu nongwa yɨ vintu ɨvyo tihubhatwalila afume huliimwɨ.
12 Enya,
ɨmbombo ɨyo mubhomba saga huje ɨhubhaavwa abhooziwa bheene ɨbho bhabhuliliilwe,
lyoli ɨhubhabhomba abhantu abhinji bhanʼsalifye tee ʉNgʉlʉbhɨ.
13 Ɨmbombo ɨyo ɨlolesya huje amwɨ muli bhabhomvi bhinza,
mwɨ‑ɨlyo abhantu bhahumʼmwamiha ʉNgʉlʉbhɨ.
Bhahumʼmwamiha hu nongwa yɨ tonsu weenyu ʉwa hwɨtɨshe ɨNongwa ɨNyinza ɨzya Kilisiti pitagaalila lya bhantu.
Nantele,
bhahumʼmwamiha lwa bhalola ɨnkʉmbʉ yeenyu hwi‑idala ɨlya hwavwane na bheene na bhanjɨ bhonti ɨvintu vyenyu.
14 Ɨpo bhahayibha bhahubhapuutila hwa Ngʉlʉbhɨ nʉ mwoyo gwonti hu nongwa yɨ mpyana ɨyo ʉNgʉlʉbhɨ abhapiiye amwɨ.
15 Tibhanje tihunʼsalifya ʉNgʉlʉbhɨ hu nongwa yɨ shikʉnjɨlwa ɨshigoosi ɨsha‑aswijizye,
ɨsho atipiiye.