Ʉmwoyo ʉgwa hubhaavwe abhanjɨ
8
Bhooziwa bhamwetu,
ɨshi tihwanza mumanye ɨnongwa yɨ mpyana ɨyo ʉNgʉlʉbhɨ avipiiye ɨvibhanza ɨvyɨ mukowa ʉgwɨ Makedoniya ʉmwoyo ʉgwa‑afumye.
2 Poshe abhooziwa ɨbho bhahali bhapɨɨna tee na‑abhe mu mayɨmba ɨgo gahali nʉ waaji wuwinji wuwinji,
bhahali nʉ luseshelo ʉlugoosi ʉlwo lwahabhasonziizye abhe nɨ nkʉmbʉ tee afumye ɨvintu vyabho.
3 Ɨhubhasimishizya huje bhahafumya ɨvintu ɨvinji,
hwope ashile ɨvyo bhahali navyo.
Nantele bhahafumya hu kʉndwe waabho
4 na hutikʉndɨɨlɨzye tee huje tibhe nɨ mpyana yɨ lwʉmvwano mu mbombo ɨya hubhaavwe abhooziwa abha hu Yelusaleemu.a
5 Bhahabhombile ɨsho ashile ɨsho tahali tisʉʉbhɨla.
Bhahahwifumya nasʉʉti hwa Mwɨnɨ ʉYeesu,
nantele bhahahwifumya huliitɨ.
Bhahabhombile ɨsho nanshi ɨsho asʉngwa ʉNgʉlʉbhɨ.
6 Ɨshi tahakʉndɨɨlɨzya ʉTiito huje ayɨnze,
abhaavwe amwɨ huje amalɨɨzɨzye ɨmbombo ɨyo ɨyɨ mpyana,
pɨpo ya yʉʉyo ahandile ɨmbombo ɨyo huliimwɨ.
7 Leelo nanshi ɨsho muli nʉ tabhazi mu gonti,
mu lwɨtɨho,
mu mpeesya ɨya‑alʉmbɨɨlɨle,
mu tengulizu,
mu dandamazu ʉwa‑abhombe aminza,
nantele mu kʉndwa weenyu huliitɨ,
b ɨshi mubhanje bhatabhazi mu mbombo ɨnɨ ɨya hubhaavwe abhanjɨ.
8 Lwɨ‑ɨyanga ɨga saga huje ɨhwanza hubhabijiilizye,
lyoli ɨhwanza ɨnsimishizye nkashele ʉkʉndwa weenyu wɨ lyoli.
Ɨbhomba ɨsho hwi‑idala ɨlya‑akholanye ɨsho abhanjɨ bhali nʉ dandamazu ʉwa hwavwe.
9 Enya,
mumɨɨnye ɨsho ʉMwɨnɨ weetu ʉYeesu ʉKilisiti sha‑ahabhapiiye ɨmpyana amwɨ.
Hwope poshe ahali nʼtabhazi,
ahahwibhɨɨha mʼpɨɨna hu nongwa yeenyu,
huje mu pɨɨna waakwe,
amwɨ mubhe bhatabhazi pitagaalila lya Ngʉlʉbhɨ.
10 Ɨshi,
hu nongwa yɨ nongwa ɨnɨ,
ɨhubhabhʉʉzya ɨlyo likhondɨɨye huliimwɨ.
Ɨkhondɨɨye amale ɨgo mwahandile ʉmwaha ʉgwo gwahashilile.
Ʉmwaha ʉgwo,
amwɨ mwahali bha hwande alolesye ʉmwoyo ʉgwa hwifumye ɨvintu ɨvya hubhaavwe abhanjɨ na hwande abhombe ɨsho.
11 Ɨshi,
mumalɨɨzye ɨmbombo ɨyo hu nsyʉkwo,
nanshi ɨsho mwahali nɨ nsyʉkwo hu habhaazyo lwa muhwanda abhombe,
nantele muhwifumyaje alɨngaane nɨ‑ɨvyo muli navyo.
12 Nkashele ʉmuntu ali nʉ mwoyo ʉgwa hwavwe,
ʉNgʉlʉbhɨ ahwejeelela shila ɨsho afumya alɨngaane nɨ‑ɨvyo ʉmuntu ali navyo.
ɄNgʉlʉbhɨ saga ahwɨsya ɨsho ʉmuntu saga ali nasho.
13 Ɨnsɨɨbho zyetu,
saga aje amwɨ muyɨmvwe ni‑izigo ɨlya hubhaavwe abhanjɨ,
huje abheene bhabhe nʉ pʉpʉʉsu,
14 lyoli ɨhwanza mubhe hantu heeka.
Hu habhaazyo ɨha lwa muli nɨ vintu ɨvinji,
mubhavwaje ɨbho saga bhali navyo,
huje bhope lwa bhahayibha nɨ vintu ɨvinji,
bhahayihubhaavwa amwɨ.
Mwɨ‑ɨlyo mwahayibha mulɨngɨɨne,
15 nanshi ɨsho ɨsimbwilwe mu Nsimbo ɨMfinjile huje,
“Ʉyo ahabhʉngɨɨnye vinji,
saga ahali nɨ vya‑asyale,
ʉyo ahabhʉngɨɨnye hashe saga ahabhuliliilwe.”c
ɄTiito na bhamwabho bhasontelezewa hu Kolinto
16 Ɨhunʼsalifya ʉNgʉlʉbhɨ ʉyo amʼpiiye ʉTiito ʉmwoyo ʉgwa hubhaavwe amwɨ ʉgwo ɨndi nagwo nanɨ.
17 Ɨnjanjile ɨsho,
pɨpo hu habhaazyo lwa tihunʼnaabha huje ayɨnze huliimwɨ,
ahɨtɨɨshe.
Ahwɨnza huliimwɨ hu nsyʉkwo ɨngoosi nantele hu lusʉngwo lwakwe yʉʉyo hubhaavwe.
18 Tihunʼsonteelezya ʉTiito peeka nʉ mwoziwa ʉwamwetu ʉwɨnjɨ ʉyo ɨvibhanza vyonti ɨvya bhooziwa vihunʼsʉmba hu mbombo ɨya‑alʉmbɨɨlɨle ɨNongwa ɨNyinza ɨzya Yeesu.
19 Nantele ɨvibhanza vyahasalula ʉmwoziwa ʉwamwetu ʉyo huje,
abhe peeka naatɨ lwa titwala ɨvintu ɨvya hubhaavwe abhooziwa ʉhwo hu Yelusaleemu.
Ɨmbombo ɨyo ɨhumʼmwamiha ʉMwɨnɨ,
nantele ɨlolesya ɨsho tibhomba ʉdandamazu hubhaavwe abhanjɨ.
20 Tishʉʉla peeka nʉ wamwetu huje tavwane shinza agabhe ɨvintu ɨvyo abhantu bhafumiizye hu nkʉmbʉ yaabho,
pɨpo saga tihwanza huje tibhunwe nʉ muntu wowonti.
21 Ɨnsɨɨbho zyetu,
tihwanza abhombe shinza pitagaalila lya Mwɨnɨ na pitagaalila lya bhantu.
22 Tihunʼsonteelezya ʉmwoziwa ʉwamwetu ʉwɨnjɨ abhe peeka nʉ Tiito.
Ʉmwoziwa ʉyo hahinji tinʼnolile huje ali nʉ mwoyo ʉgwa‑abhombe ɨmbombo,
leelo ali nɨ nsyʉkwo ɨngoosi ashile hu wandilo,
pɨpo ahubhasʉʉbhɨla tee amwɨ.
23 Ɨshi nkashele ʉmuntu ahwanza amanye ɨnongwa ɨzya Tiito,
mʼmʉʉzyi huje ʉnʉ mʼmomvi peeka naanɨ hwi‑idala ɨlya hubhaavwe amwɨ.
Nantele nkashele ahwanza amanye ɨnongwa ɨzya bhanjɨ,
mʼmʉʉzyi huje ɨbho bhooziwa bhamwetu,
bhasonteleziiwe nɨ vibhanza,
bhope bhahumʼmwamiha ʉKilisiti.
24 Ɨshi,
mubhalolesye abhantu ɨbho ʉkʉndwa weenyu,
huje ɨvibhanza ɨvya bhooziwa vimanye huje ɨgo tihwibaada hu nongwa yeenyu,
ga gɨɨgo.