7
Ɨshi bhakʉndwe bhaanɨ,
pɨpo ʉNgʉlʉbhɨ alapile hutipeele ɨndapo ɨzyo zyonti,
ɨshi tihwisangalusye hu gonti ɨgo gahutibhɨɨha tibhe bhaavu amabɨlɨ na mooyo geetu.
Tibhe bhasangalusu hwi‑idala ɨlya hunʼtinishe ʉNgʉlʉbhɨ.
Ɨnseho ya Paulo
2 Mutigane tee,
pɨpo nʉʉmo ʉmuntu ʉyo timʼmombɨɨye shibhiibhi,
nʉʉmo ʉmuntu ʉyo timʼvwalaziizye hu nongwa ɨmo,
awe ʉmuntu ʉyo tinʼgobɨɨye.
3 Saga ɨyanga amazwi ɨgo huje ɨmbalonje aje muli bhabhiibhi,
pɨpo ɨnjanjile huje,
amwɨ muli mu mooyo geetu,
tikhala peeka namwɨ,
mu fwe awe mu lemvu.
4 Hu habhaazyo hɨ‑ɨyanga naamwɨ saga ɨndi nɨ lyoga,
nantele ɨhwibaada tee hu nongwa yeenyu.
Amwɨ munjinjiziizye ʉmwoyo tee,
poshe tiyɨmba mu minji,
mumbombile ɨmbe nʉ luseshelo ʉlugoosi.
5 Lwa taafiha huula hu mukowa ʉgwɨ Makedoniya,
saga tahali nʉ tʉʉzyo nka hashe,
pɨpo tahali na mayɨmba ɨmbali zyonti.
Atɨ tahali nʉ lʉgʉ na bhantu abhinji,
nantele mu mooyo geetu tahali nʉ wooga.
6 Leelo ʉNgʉlʉbhɨ ʉyo ahubhajinjizya ɨbho bhali mu mayɨmba mu mooyo gaabho,
ahatijinjizya hwi‑idala ɨlya hwɨnze hwa Tiito.
7 Saga huje tahajinjiziiwe ʉmwoyo hwi‑idala ɨlya hwɨnze hwa Tiito lwene,
lyoli nɨ‑ɨsho mwahanʼjinjiziizye ʉmwene.
Ahatibhʉzɨɨzye ɨsho sha mwahanizuushe anɨ,
nɨ‑ɨsho muzugumila na‑ayɨmbe hu nongwa yaanɨ.
Ɨgo gambɨɨshɨle huje ɨnseshele tee.
8 Peeka na huje ɨkalaata ɨyo nahabhasimbiiye yahabhapiiye ʉzugumizu,
saga ɨhwibhuna.
Hwope nkashele nahahwibhunile hashe ʉlwa hwande,
ɨkalaata ɨyo yahabhapiiye ʉzugumizu hu habhaazyo hashe lwene.
9 Leelo ɨndi nʉ luseshelo,
saga hu nongwa ya‑aje mwahali nʉ zugumizu,
ndaadi!
Leelo ɨndi nʉ luseshelo,
pɨpo ʉzugumizu weenyu wubhabhombile huje mulambe ɨmbiibhi zyenyu.
Ʉzugumizu weenyu wahali hu kʉndwe wa Ngʉlʉbhɨ,
mwɨ‑ɨlyo saga tahabhavwalaziizye hwi‑idala lyolyonti.
10 Ʉzugumizu ʉwo wuhwɨnza,
pɨpo yɨ kʉndwe wa Ngʉlʉbhɨ ʉwo wubhomba huje abhantu bhalaate ɨmbiibhi zyabho.
Alaate ʉhwo,
hwa hwʉhwo huleeta ʉfyʉli.
Ʉzugumizu nanshi ʉwo saga wa hwibhune.
Leelo ʉzugumizu ʉwo wufumilana na ga mu nsi ɨnɨ,
wuleeta ʉfwe.
11 Enya!
Ʉzugumizu ʉwo wuhwɨnza hu nongwa yɨ kʉndwe wa Ngʉlʉbhɨ,
wubhaletɨɨye amwɨ ʉdandamazu ʉgoosi.
Wubhabhombile huje mubhe nɨ nsyʉkwo ɨngoosi ɨya‑abhombe ga gahwanziwa,
ahwiyʉʉmɨle huje ɨgo mubhomba gɨ lyoli,
huwukhaane ʉbhiibhi,
hunʼtinishe ʉNgʉlʉbhɨ,
abhe nɨ nsyʉkwo ɨya hundole na‑alole huje ʉyo ananjile ayambɨlɨɨye ʉmʼposheelo gwakwe.
Mwɨ‑ɨgo gonti mulolesya huje saga muli na malando hu nongwa ɨyo.
12 Ɨshi,
hwope nkashele nahabhasimbiiye ɨkalaata ɨla,
saga nahasimbile hu nongwa ya muntu ʉyo amʼmombɨɨye shibhiibhi ʉwamwabho,
awe ʉyo abhombeliilwe shibhiibhi.
Leelo nahali ɨhwanza huje,
mumanye mwɨmwɨ pitagaalila lya Ngʉlʉbhɨ nanshi ɨsho mwahahwidandamiishe ahwifumye hu nongwa yeetu.
13 Mwɨ‑ɨlyo mwahatijinjiziizye.
Peeka nɨ‑ɨlyo,
tahali nʉ luseshelo ʉlugoosi,
ʉTiito lwa‑ahatibhʉʉzya ɨsho amwɨ mwahanʼjinjizya ʉmwoyo.
14 Anɨ nahabhasʉmbɨle tee amwɨ pitagaalila lyakwe,
namwɨ saga mundetɨɨye ɨnsoni.
Gonti ɨgo tahabhabhʉzɨɨzye gahali gɨ lyoli.
Sha shɨɨsho zili,
nɨ‑ɨgo tahabhasʉmbɨle amwɨ hwa Tiito,
gope galolɨɨshe huje gɨ lyoli.
15 Ʉkʉndwa wa Tiito huliimwɨ wujendeelela ahwonjele,
lwa‑ahwizuha ɨnshɨnshɨ yeenyu mwenti na sha mwahamʼmwambɨlɨɨye shinza,
nantele hu wooga.
16 Ɨnsʉngwɨlwe tee hu nongwa yeenyu,
hu nongwa ya‑aje ɨshi ɨhondɨɨye hubhasʉʉbhɨle lwonti.