6
Ɨshi,
atɨ tibhomba ɨmbombo peeka nʉ Ngʉlʉbhɨ,
hu nongwa ɨyo,
tihubhalaabha huje ɨmpyana ya Ngʉlʉbhɨ ɨyo mwambɨlɨɨye,
mugandi huyileshe huje ɨteeje lwene.
2 ɄNgʉlʉbhɨ ayanga mu Nsimbo ɨMfinjile huje,
“Ahabhaazyo ɨho hakhondɨɨye,
nahahwʉmvwɨzye,
isiku ɨlyɨ fyʉli,
nahahwavwizye.”
a
Tejeelezya,
ahabhaazyo ɨho hakhondɨɨye ha hɨɨha, isiku ɨlyɨ fyʉli lya lyɨli!
Ʉjimbiilizu mu mbombo ya Mwɨnɨ
3 Ɨshi,
saga tibhomba lyolyonti ɨlyo liviisya abhanjɨ,
huje ʉbhomvi weetu wusahasheele ayangwe shibhiibhi.
4 Lyoli mu gonti tilolesya huje bhabhomvi bha Ngʉlʉbhɨ.
Tilolesya ɨlyo hwi‑idala ɨlyɨ jimbiilizu tee mu mayɨmba na mu malabha aminji.
5 Hu habhaazyo hamo tikhomwa,
tikʉngwa mu hoobhe,
tizozotelwa nɨ mpʉga zya bhantu,
tibhomba ɨmbombo ɨhome,
tigona maaso,
tilɨnda nɨ nzala na‑agone nayo.
6 Leelo tibhomba ɨgo gonti hu sangalusu,
mu manyiihanyi,
mu jimbiilizu,
mu woloolo,
hwi‑idala ɨlya‑alongozewe nʉ Mʼpepo ʉMʼfinjile hu kʉndwa ʉwɨ lyoli.
7 Nantele tilolesya hwi‑idala ɨlya‑alʉmbɨɨlɨle ɨnongwa ɨzyɨ lyoli,
tibhomba ɨgo gonti hwi‑ikhone lya Ngʉlʉbhɨ.
Ʉgolosu,
shɨ shilwɨlo sheetu,
ambali ɨya hu lɨɨlo nɨ ya hu mongo.b
8 Atɨ tihwifumiizye abhombe ɨmbombo ya Ngʉlʉbhɨ,
abhantu bhatitinishe awe bhatisyonshele,
bhatibaade awe bhatiyanje shibhiibhi.
Tiloleha tili bhi‑ilenga,
fwandi tiyanga zyɨ lyoli,
9 tiloleha saga timanyiha,
fwandi timanyiha,
tiloleha tifwiye,
fwandi tili bhʉʉmi,
tikhomwilwe tee,
leelo saga bhatibudile.
10 Nantele tiloleha nkati tizugumiiye,
leelo hu habhaazyo honti tili nʉ luseshelo,
tiloleha tili bhapɨɨna,
leelo abhinji tibhapiiye ʉtabhazi.
Tiloleha saga tili na hantu,
leelo tili nɨ vintu vyonti.
11 Amwɨ mubhooziwa muBhakolinto,
tiyanjile naamwɨ sinta hubhafise hohonti,
nantele tiyanjile hu kʉndwa ʉgoosi.
12 Atɨ saga tileshile hubhagane amwɨ,
lyoli amwɨ muleshile hutigane atɨ.
13 Ɨshi ɨyanga naamwɨ nanshi ɨyanga na bhaana bhaanɨ,
mutigane lwonti,
nanshi atɨ sha tibhagɨɨne.
Ʉlwʉmvwano na bhantu ɨbho saga bhooziwa
14 Mugandi abhe palishimo na bhantu ɨbho saga bhooziwa.
Wɨlɨ,
ʉgolosu nʉ bhiibhi wubhajiiye abhe nʉ lwʉmvwano nanshi wɨlɨ?
Awe ʉlukhozyo nɨ hiisi vibhajiiye abhe peeka?
15 Nantele ʉKilisiti nʉ Seetano bhabhajiiye wɨlɨ ahwʉmvwane?
Awe ʉmwoziwa nʉ‑ʉyo saga mwoziwa bhabhajiiye abhe nʉ lwʉmvwano wɨlɨ?
16 Wɨlɨ,
ɨnyumba ɨmfinjile ɨya Ngʉlʉbhɨc ɨbhajiiye abhe nʉ lwʉmvwano nɨ vifwani ɨvya bhangʉlʉbhɨ?
Atɨ tili nyumba mfinjile ɨya Ngʉlʉbhɨ ʉyo ali mwʉmi!
Nanshi shɨ‑ɨsimbwilwe mu Nsimbo ɨMfinjile huje,
“Nahayikhala mu bheene
na‑ajende peeka nabho.
Nahayibha Ngʉlʉbhɨ waabho,
bhope bhahayibha bhantu bhaanɨ.”d
17 Ɨshi ʉMwɨnɨ ʉNgʉlʉbhɨ ayiga,
“Musogole paahati yaabho,
musahasangaane nabho.
Musahaakhate ahantu ahaavu,
nanɨ nahayihubhambɨɨlɨla.”e
18 “Anɨ ɨnza‑abhe Yise weenyu,
namwɨ munza‑abhe bhaana bhaanɨ bhɨ shilume na bhɨ shilɨndu.”
f
ɄMwɨnɨ ʉNgʉlʉbhɨ wa‑ali ni‑ikhone, ayanga!