ɄNgʉlʉbhɨ ahutipeela amabɨlɨ amapya
5
Timɨɨnye huje amabɨlɨ geetu gali nanshi isebhele ɨlyɨ habhaazyo hashe mu nsi ʉmu.
Leelo lwa gananjiha,
ʉNgʉlʉbhɨ ahayihutipeela ʉkhalo ʉwa wiila hu mwanya,
ʉwo saga wuli nanshi isebhele ɨlyo lizengwilwe na bhantu.
2 Mu nsi ɨnɨ amabɨlɨ geetu gayɨmba,
tisʉngwa tee abhale mu khalo weetu ʉwa hu mwanya,
ʉhwo ʉNgʉlʉbhɨ ahayihutikwatizya amabɨlɨ amapya.
3 Nkashele ahutikwatizya,
ɨpo saga tahayibha weleele.
4 Hu habhaazyo lwa tisɨɨle tili mu mabɨlɨ ɨga,
ɨgo lisebhele lyɨ habhaazyo hashe,
tiyɨmba hu nongwa ɨya‑abidiilwe mu minji.
Saga huje tihwanza ahwawule ʉmʼbɨlɨ ʉgu ʉgwo gufwa,
lyoli tihwanza atikwatizye ʉmʼbɨlɨ ʉgwo saga gufwa,
huje ʉmʼbɨlɨ ʉgwo gufwa gumilwe nʉ‑ʉgwo saga gufwa.
5 ɄNgʉlʉbhɨ ya yʉʉyo atibhɨshɨɨye ɨlyo,
atipiiye ʉMʼpepo ʉMʼfinjile,
huje abhe asimishizya ɨgo ʉNgʉlʉbhɨ alapile hutipeele.
6 Ɨshi,
hu habhaazyo honti tili nʉ lusʉʉbhɨlo,
hwope nkashele timɨɨnye huje lwa tili mu mʼbɨlɨ ʉgu tili hutali nʉ Mwɨnɨ.
7 Tilemba hwi‑idala ɨlyɨ lwɨtɨho,
saga hwi‑idala ɨlyɨ‑ɨvyo viloleha.
8 Lyoli tili nʉ lusʉʉbhɨlo,
nantele tilola hwashi tigaguleha ʉmʼbɨlɨ ʉgu na‑abhale akhale nʉ Mwɨnɨ ʉYeesu.
9 Ɨshi,
nkashele tili mu mʼbɨlɨ ʉgu awe tili hutali nagwo,
ɨnsɨɨbho zyetu hunʼkhondeezye ʉMwɨnɨ.
10 Ɨnjanjile ɨsho,
pɨpo atɨ tenti tahayɨmɨɨlɨla pitagaalila lya Kilisiti na‑alongwe nʉ mwene,
huje shila muntu ayambɨɨlɨle ʉmʼposheelo afumilane nɨ‑ɨsho ahabhombile mu nsi ɨnɨ,
gabhe minza awe gabhe mabhiibhi.
Ɨmbombo ɨyɨ kʉndanyo
11 Ɨshi,
timɨɨnye huje ɨhwanziwa hunʼtinishe ʉMwɨnɨ,
tihubhakʉndɨɨlɨzya abhantu huje bhamʼmwɨtɨhaje.
ɄNgʉlʉbhɨ atimɨɨnye shinza ɨsho tili,
nanɨ ɨsʉʉbhɨla huje namwɨ mutimɨɨnye shinza.
12 Saga tihwanza ahwibaade nantele huliimwɨ,
lyoli tihwanza hubhabhʉʉzye ɨsho mukhondɨɨye ahwibaade hu nongwa yeetu.
Hwi‑idala ɨlyo munza‑abhe na mazwi aga hubhaamule ɨbho bhahwibaada tee ɨsho bhali hwʉnzɨ,
ashile ɨsho bhali mu mwoyo.
13 Nkashele tiloleha tili bhafwasu,
tili ɨsho hu nongwa ya Ngʉlʉbhɨ,
leelo nkashele tiloleha tili nɨ njeele,
ɨpo tili ɨsho hu nongwa yeenyu.
14 Ʉkʉndwa wa Kilisiti wuhutilongozya atɨ,
hu nongwa ya‑aje timɨɨnye huje ʉmuntu weeka ahafwiye hu nongwa ya bhantu bhonti,
mwɨ‑ɨlyo abhantu bhonti bhahafwiye.
15 Ʉmuntu ʉyo ahafwiye hu nongwa ya bhantu bhonti huje bhaleshe alembe mu kʉndwe waabho,
lyoli bhalembe mu kʉndwe wʉ‑ʉyo ahafwiye na‑azyʉshe hu nongwa yaabho.
16 Ɨshi,
afume hu habhaazyo ɨha,
saga timɨɨnye ʉmuntu hwi‑idala ɨlyɨ mʼbɨlɨ.
Poshe hu habhaazyo hamo tahamʼmɨɨnye ʉKilisiti hwi‑idala ɨlyɨ mʼbɨlɨ,
leelo ɨshi saga timʼmɨɨnye hwi‑idala ɨlyo.
17 Ʉmuntu wowonti ʉyo ahumʼmwɨtɨha ʉKilisiti,
wabha shipelwa shipya,
agɨ mandɨ gashilile,
ɨshi ʉwuntu waakwe ʉpya wufishile!
18 Leelo ɨga gonti gafuma hwa Ngʉlʉbhɨ ʉyo ahanʼsonteleziizye ʉKilisiti hutikʉndanye atɨ nʉ mwene.
Natɨ atipiiye ɨmbombo ɨya hubhakʉndanye abhantu nʉ mwene,
19 hwa huje ashilile hwa Kilisiti,
ʉNgʉlʉbhɨ ahabha ahubhakʉndanya abhantu nʉ mwene sinta hubhabhaazizye ɨmbiibhi zyabho.
Nantele ʉNgʉlʉbhɨ atipiiye ɨmbombo ɨya hubhabhʉʉzye abhantu ɨnongwa ɨzyɨ kʉndanyo ʉwo.
20 Ɨshi,
ʉKilisiti atisonteleziizye abhombe ɨmbombo yaakwe,
ashilile atɨ ʉNgʉlʉbhɨ abhakhajiliziizye akʉndanywe nʉ mwene.
Sha shɨɨsho natɨ tihubhalaabha ashilile mwa Kilisiti huje mukʉndanywe nʉ mwene.
21 ɄKilisiti saga ahali nɨ mbiibhi,
leelo ʉNgʉlʉbhɨ ahamʼmɨɨshɨle nanshi ʉmʼmomba mbiibhi,
huje hwi‑idala ɨlya Kilisiti,
tibhaaziwe abhe bhagolosu pitagaalila lya Ngʉlʉbhɨ.