Ikhone lya Ngʉlʉbhɨ mu vyɨlɨɨlo ɨvyɨ longo
4
Ɨshi,
ashilile hu nkʉmbʉ yaakwe,
ʉNgʉlʉbhɨ atipiiye ɨmbombo ɨnɨ,
a ɨshi saga titenguha ʉmwoyo.
2 Leelo tikhaanile lwonti abhombe aga hu mfiso na gɨ nsoni,
na hubhagobele abhantu,
na‑asangaanye izwi lya Ngʉlʉbhɨ ni‑ilenga.
Leelo tiyanga ɨlyoli pa pazelu,
huje abhantu bhonti bhamanye mu mooyo gaabho huje tili bhɨ lyoli pitagaalila lya Ngʉlʉbhɨ.
3 Leelo nkashele ɨNongwa ɨNyinza ɨzyo tilʉmbɨɨlɨla saga zimanyiha shinza,
zibha saga zimanyiha shinza hwɨ‑ɨbho bhateega.
4 Saga zimanyihɨɨne na bheene,
pɨpo ʉSeetano ʉyo wa‑ali mwɨnɨ wɨ nsi ɨnɨ,
akwinshiiye ɨnjeele ɨzyɨ‑ɨbho saga bhali nʉ lwɨtɨho.
Abhombile ɨli huje bhapootwe hululole ʉlukhozyo ʉlwɨ Nongwa ɨNyinza ɨzyɨ mwamu wa Kilisiti,
ʉyo shifwani sha Ngʉlʉbhɨ.
5 Atɨ saga tilʉmbɨɨlɨla ɨnongwa zyetu,
leelo tilʉmbɨɨlɨla huje ʉYeesu ʉKilisiti yʉ Mwɨnɨ,
natɨ tili bhabhomvi bheenyu hwi‑idala ɨlya humʼmombele ʉYeesu.
6 ɄNgʉlʉbhɨ ʉyo ahajile,
“Ʉlukhozyo lukhozyaje mu hiisi,”
b ya yʉʉyo alawusya amooyo geetu huje tiwumanye ʉmwamu waakwe,
ʉwo wulawuha hu maaso ga Yeesu ʉKilisiti.
7 Atɨ tili nɨ mfuha ɨyɨ lukhozyo ʉlwo,
poshe atɨ tili nanshi ɨvyɨlɨɨlo ɨvyɨ longo ɨvyo vinanjiha.
Hwope ɨsho ɨmanyishe huje,
ikhone ɨlyɨ mayelec lifuma hwa Ngʉlʉbhɨ,
saga huliitɨ.
8 Gahutaaga amayɨmba ɨgo gali ʉwaaji wuwinji wuwinji,
leelo saga timenwa.
Tili nɨ lyoga,
leelo saga tahatenguushe ʉmwoyo.
9 Abhantu bhahutiyɨmvya,
leelo ʉNgʉlʉbhɨ saga ahutileha tibheene,
bhahutibʉmɨzya pa nsi,
leelo saga tifwa.
10 Ɨnsiku zyonti amabɨlɨ geetu gali mu lʉgʉ ʉwa‑afwe nanshi ʉYeesu,
huje ʉwʉʉmi wa Yeesu wuloleshe mu mabɨlɨ geetu.
11 Atɨ ta tili bhʉʉmi,
hu habhaazyo honti tili mu lʉgʉ ʉwa‑afwe hu nongwa ya Yeesu,
huje ʉwʉʉmi waakwe wuloleshe mu mabɨlɨ geetu ɨgo gafwa.
12 Ɨsho,
poshe ʉfwe wubhomba ɨmbombo mu mabɨlɨ geetu,
leelo ʉwʉʉmi wubhomba ɨmbombo muuhati yeenyu.
13 Ɨsimbwilwe mu Nsimbo ɨMfinjile huje,
“Nahamʼmwɨtɨɨshe ʉNgʉlʉbhɨ,
sha shɨɨsho nahajile.”
d Natɨ tili nʉ lwɨtɨho ʉlwo,
sha shɨɨsho tiyanga.
14 Tiyanga ɨlyo,
pɨpo timɨɨnye huje ʉNgʉlʉbhɨ ʉyo ahanʼzyʉsyɨzye ʉMwɨnɨ ʉYeesu,
ahayihutizyʉsya atɨ peeka nʉ Yeesu.
Ʉmwene ahayihutibhɨɨha pitagaalila lyakwe peeka naamwɨ.
15 Ɨshi amayɨmba gonti tihwambɨɨlɨla hu nongwa yeenyu,
huje ɨmpyana ya Ngʉlʉbhɨ lwɨ‑ɨhubhafishila abhantu abhinji tee,
abheene bhonjeezye ɨnsalifyo zyabho hwa Ngʉlʉbhɨ.
Mwɨ‑ɨlyo,
ʉNgʉlʉbhɨ anza‑ajendeelele amwamihwe.
Alembe mu lwɨtɨho
16 Ɨshi saga titenguha ʉmwoyo,
hwope nkashele amabɨlɨ geetu gananjiha,
lyoli muuhati yeetu ʉNgʉlʉbhɨ ahutibhʉmba abhe bhapya ɨnsiku zyonti.
17 Ɨnjanjile ɨsho,
pɨpo amayɨmba geetu mapʉpʉʉsu,
nantele gɨ habhaazyo hashe lwene.
Amayɨmba ɨgo gahutitalila ʉmwamu ʉwa wiila.
Ʉmwamu ʉwo goosi tee,
wuhutibhomba alole amayɨmba ɨga hantu hadoodo lwene.
18 Ɨshi,
ɨvintu ɨvyo viloleha,
vyɨ habhaazyo hashe lwene,
leelo ɨvyo saga viloleha,
vya wiila,
sha shɨɨsho tisaaga ɨvintu ɨvyo saga viloleha.