Yoona
ɄYoona akhaana ahumwʉmvwe ʉYehoobha
1
Ɨmandɨ hu Izilaeeli ahali ʉmuntu ʉmo ʉnʼkuwi,
itaawa lyakwe ahali yʉ Yoona,
ʉyise waakwe ahali yʉ Amitaaya.
Ɨhabha pa habhaazyo hamo ʉYehoobhaa ahamʼʉʉzya ʉYoona ahaga,
2 “Sogolaga bhalaga hu Ninaawi,
hwi booma (hwi linga) igoosi liila,
ʉbhalʉmbɨɨlɨle abhantu bhaala huje,
naalola huje,
ɨmbiibhi zyabho zili ngoosi haani.
Alɨngaane nɨ mbiibhi ɨzyo ɨsɨbhɨɨlɨla anangaanye ibooma lyabho.”
3 Leelo,
ʉYoona ahanda abhale hu Talashiishi,
ʉhwɨnjɨ na hu Ninaawi huje,
anʼshɨmbɨle ʉYehoobha.
Ahiishila hu Yaafa,
hwi booma lya lyahali panshɨnjɨ pa nsʉmbi,
ʉhwo ahayaaga ɨmeeli ya yahabhalaga hu Talashiishi.
Ahafumya ɨnaawuli,
ahatʉʉha mu meeli abhale nabho hu Talashiishi huje,
ashɨmbɨle asahabhombe gaala ʉYehoobha ga halajiziizye huje,
abhombe.
4 Ɨmeeli yahajenda mu nsʉmbi.
Leelo,
ʉmwene ʉYehoobha ahaleeta ɨhaala ɨngoosi,
ya yahabhaletɨɨye amabhilingwa amagoosi mu nsʉmbi muula.
Amayɨmba amagoosi gahafumila,
yope ɨmeeli yahandaga abuduuhane.
5 Abhabhomba mbombo ɨbho bhahayeeta haani,
“Maayɨ yoo,
taafwa!”
Bhahanda bhonti abhalilile abhangʉlʉbhɨ bhaabho huje,
bhabhaavwe.
Bhahadumbushizya ɨvintu vyabho mu nsʉmbi,
apʉpʉʉsye ʉmwamu wɨ meeli huje,
ɨsahadwibhe.
Leelo,
pa habhaazyo ɨho honti,
ʉYoona ahagonelɨɨye ʉtulo lwonti,
hwi zʉngʉ ɨlya pansi ɨlyɨ meeli.
6 Ʉnʼgoosi ʉwɨ meeli ahamʼalila ʉYoona,
ahanʼdaamuzya,
ahamʼʉʉzya ahaga,
“Shoonu awe ʉli shʉ gonile lwa huvwalangɨɨne nanshi ɨshi!
Bhʉʉha,
naabhe ʉngʉlʉbhɨ waaho!
Ganga lumo agatisaajila,
tisahafwe mu nsʉmbi ʉmu.”
7 Ɨpo abhabhomba mbombo bhahɨtɨɨhana bhahaga,
“Ɨnzaji tihwisayaaye,
b tinʼole ʉmuntu ʉyo atiletɨɨye amayɨmba gonti ɨga.”
Bhahahwisayaaya,
ɨnsayaaya yahanʼgwɨla ʉYoona.
8 Bhahanda ahumʼʉzɨɨlɨzye ʉYoona bhahaga,
“Ɨshi tibhʉʉzye,
awe we naanu wʉ tiletɨɨye amayɨmba gonti ɨga?
Awe we naanu?
Ɨmbombo yaaho yeenu?
Ʉfumile hu nsi bhʉlɨ?
Awe ʉfumile kabɨla bhʉlɨ?”
9 ɄYoona ahabhabhʉʉzya ahaga,
“Anɨ ɨndi Mwebulaniya,
ɨhumʼpuuta ʉYehoobha,
ʉNgʉlʉbhɨ ʉwa hu mwanya,
ya hapelile ɨnsi nɨ nsʉmbi.”
10 Ɨpo ʉYoona ahabhabhʉʉzya ahaga,
“Nanʼselengaga yʉ Yehoobha.”
Abhantu bhaala ahʉmvwe ɨsho,
bhahogʉʉpe haani na yinje,
bhahamʼʉzɨɨlɨzya bhahaga,
“Shoonu awe wabhombaga ɨsho?”
11 Mu habhaazyo honti ɨho ɨnsʉmbi yahonjelaga avwalangane.
Nantele,
abhantu bhaala bhahamʼʉzɨɨlɨzya shinza ʉYoona bhahaga,
“Ɨshi tihubhombe bhʉlɨ huje,
ɨnsʉmbi ɨyɨɨme?”
12 ɄYoona ahaga,
“Ɨmɨɨnye weene huje,
amayɨmba amagoosi ɨga gabhaajile alɨngaane na je saga nanʼtiniha ʉYehoobha.
Ɨshi neeji,
mundumbushizye mu nsʉmbi.
Nka mwabhomba ɨsho,
yope ɨnsʉmbi ɨbhala pʉʉme ‘myɨ’.”
13 Abhabhomba mbombo bhaala bhahakhaanaga ahunʼdumbushizye ʉYoona mu nsʉmbi.
Bhahalɨnga ayitwale ɨmeeli hwi khone lyabho lyonti hunshɨnjɨ hu nsʉmbi,
leelo bhahapootwa nzɨɨla,
alɨngaane na je ɨnsʉmbi yahonjelaga avwalangane haani.
14 Bhahanʼilila ʉYehoobha bhahaga,
“We Yehoobha,
tihulamba huje,
ʉsahatigoje nkashele teefwa ʉwʉʉmi wa muntu ʉnʉ.
Nantele,
ʉsahatiwuzizye nkashele tiita idanda lyakwe,
lumo saga atulile nahamo.
Awe Yehoobha,
wewe wa wazileeta ɨnongwa zyonti ɨzi,
zyabha shishiila sha wahanzaga weewe.”
15 Ɨpo bhahanʼnyeemula ʉYoona,
bhahanʼdumbushizya mu nsʉmbi ‘dumbwi’!
Pɨnɨɨpo,
ɨnsʉmbi yahapʉʉma ‘myɨ’!
16-17 Yahabha lwa bhahalola ɨsho,
bhahakhatwa nʉ wooga ʉgoosi haani na humwogope ʉYehoobha.
ɄYoona lwa bhadumbushizya mu nsʉmbi,
ʉYehoobha ahayisonteelezya ɨnswɨ ɨngoosi haani huje,
ɨmʼmile ʉYoona.
ɄYoona ahadɨɨla mu vyanda vyɨ nswɨ ɨla ɨnsiku zitaatu pasanya na nʉsiku.
Abhabhomba mbombo bhaala bhahafumya ɨnsangu ɨya lʉngʉlɨzye na finje hwi khone hwa Yehoobha.