Ɨkalaata ɨya nʼsontwa ʉPaulo hwa
Filimooni
Ʉtagaalizyo
Ɨkalaata ɨnɨ yahasimbwilwe nʉ Paulo, ʉnʼsontwa wa Yeesu Kilisiti hwa muntu wa bhahagaga Filimooni (bhaazya Filimooni 1:1, 19, 21). Ɨbhoneha huje, ʉFilimooni ahakhalaga mwi booma ɨlya hu Kolosaayi (bhaazya mu Bhakolosaayi 4:9). Ʉmuntu ʉyo ahali nʼtabhazi, nantele ahali na bhakalwe. ɄFilimooni ahali Nʼkilisiti, na pa khaaya yaakwe mwʉmwo bhahabhʉngaanaga aBhakilisiti (bhaazya Filimooni 1:2). ɄPaulo nʉ Filimooni bhahamanyɨɨne shinza.
ɄPaulo ahasimbile ɨkalaata ɨnɨ, lwa li mu hoobhe hu Luumi, mu maaha ga mu 62 ɨshi, afume ʉYeesu lwa wapaapwa. Ahasimbile ɨkalaata ɨnɨ hu nongwa ya nʼkalwe wa Filimooni, wa bhahagaga Oneesimo. Ʉnʼkalwe ʉyo ahiibhile ɨvintu vimo hwa Filimooni (bhaazya Filimooni 1:18), nka haselenga. Pamandɨ ahakhomaana nʉ Paulo. ɄPaulo ahanʉmbɨɨlɨla ɨNongwa ɨNyinza ɨzya Yeesu Kilisiti, wope ahapɨnduha (bhaazya Filimooni 1:10).
Mu maaha ɨgo, ʉnʼkalwe nkashele aselenjile hwa mwɨnɨ waakwe, nantele nka khatwe, afundwe hwakwe hwahali hugogwe. Leelo, ʉOneesimo ahanzaga aweele hwa mwɨnɨ waakwe ʉFilimooni. Ɨpo ʉPaulo ahamʼpeela ʉOneesimo ɨkalaata huje, atwale hwa Filimooni. Mu kalaata ɨyo, ʉPaulo ahunʼaabha ʉFilimooni huje, amwejeelele ʉOneesimo shenye muntu wa li holo waakwe, nantele holo mwa Kilisiti (bhaazya Filimooni 1:16).
1
ɄPaulo ahunʼamuha ʉFilimooni
1 Anɨ nɨ Paulo, ɨnkʉngwɨlwe hu nongwa ya lʉmbɨɨlɨle ɨNongwa zya Yeesu Kilisiti. Peeka nʉ holo weetu ʉTiimoti, atɨ tihusimbila Filimooni, awe wʉ li mʼomvi wamwetu ʉnʼkʉndwe. 2 Nantele, tibhasimbila abhantu abhɨ shibhanza bha bhabhʉngaana pa nyumba yaaho, haani ʉyilʉmbʉ weetu ʉAfiya, nʉ Alikiipo, ʉnʼwi wamwetu mu mbombo ya Ngʉlʉbhɨ.
3 ɄDaada ʉNgʉlʉbhɨ nʉ Mwɨnɨ ʉYeesu Kilisiti bhabhalolelaje ʉwiila, na bhapeele ʉtengaanu.
ɄPaulo ahunaabhila ʉFilimooni
4 Wiila lwene lwɨ hunaabha ʉNgʉlʉbhɨ, ɨhuhwizuha awe na hunʼsalifye hu nongwa yaaho, 5 pɨpo ɨnʉmvwɨzye ɨzya shiila shʉ mwɨtɨɨshe ʉMwɨnɨ ʉYeesu, na shiila shʉ nʼgɨɨne ʉYeesu peeka na bhantu bha Ngʉlʉbhɨ bhonti. 6 Ɨhunʼaabha ʉNgʉlʉbhɨ huje, ʉlwʉmvwano ʉlwo lwʉ li nalwo naatɨ lubhɨɨshe huje, ʉfishile ahaaganye shila hantu ahinza ha tihaaga lwa tihumwambɨɨlɨla ʉYeesu Kilisiti. 7 Holo weetu, hu kʉndwa waaho ʉwo, ʉnsansamusiizye, nantele ʉngwɨzyɨzye ʉmwoyo gwanɨ, pɨpo ʉsansamusiizye amooyo ga bhantu bha Ngʉlʉbhɨ.
ɄPaulo ahunaabhila ɨnkʉmbʉ ʉOneesimo
8 Ngamba nɨnzaga bhe dandamazu tee mwa Kilisiti ahulajizye awe abhombe ga gakhondɨɨye abhombeshe, 9 hwashi ɨlambe hu kʉndwa. Anɨ nɨ Paulo, nɨ ndi nʼgogolo, nantele ɨnkʉngwɨlwe mu hoobhe hu nongwa ya Yeesu Kilisiti. 10 Ɨhulamba hu nongwa ya mwana waanɨ ʉOneesimo. ʉOneesimo Hwa huje ʉmuntu wa khondɨɨye. Mu habhaazyo haala ɨnkʉngwɨlwe ɨpa na manyololo, nahanʉmbɨɨlɨla, ahabha mwana waanɨ mu lwɨtɨho. 11 Pa nsiku zya haselenjile saga ahali muntu wa khondɨɨye hwaliiwe, leelo ɨshi wabha muntu wa khondɨɨye hwaliiwe, nantele akhondɨɨye hwaliinɨ.
12 Ɨshi ɨhunʼgalusya hwaliiwe, ʉyo yɨ nʼkʉndile hu mwoyo gwanɨ gwonti. 13 Nahasʉngwɨlwe huje, asyale ɨpa naanɨ huje, anavwaje, na je ʉyɨnzaje anaavwe awe, mu habhaazyo hɨ nkʉngwɨlwe hu nongwa ya lʉmbɨɨlɨle ɨNongwa ɨNyinza ɨzya Yeesu Kilisiti. 14 Leelo, saga lilɨɨho nka limo, lyɨ ngabhomba sinta awe ahwɨtɨshe. Nkashele ʉnaavwa, anaavwe hwaho hubhanje hwa sʉngwe weewe, leelo husibhe hwi dala ɨlya bijiizye. 15 Lumo, ʉOneesimo ahasogʉʉye hwaliiwe ʉhwo, hwa habhaazyo hashe huje, ʉkhale peeka nawo mwa Yeesu Kilisiti wiila na wiila. 16 Saga nʼkalwe lwene, leelo holo ʉnʼkʉndwe hwaliinɨ tee, na hwaliiwe haani ashɨle anɨ, holo shɨmʼbɨlɨ nɨ shiwooziwa.
17 Ɨshi, nkashele ʉhwilola huje, ʉli nʉ lwʉmvwano naanɨ nɨ wamwenyu, ʉmwejelelaje shinza nanshi sha wɨnzaga nejeelele anɨ nɨɨnɨ. 18 Nkashele zilɨɨho zimo zya tulile hwaliiwe, awe ahwanziwa asombe hwaliiwe, anɨ ɨnza husombe. 19 Anɨ nɨ Paulo, nɨ nsimba ɨga nɨɨnɨ nɨ nyoobhe zyanɨ huje, anɨ ɨnza husombe. Peeka nɨɨsho, saga ɨhondɨɨye ahuhwizusye, awe ʉmɨɨnye huje, nɨɨnɨ nahalʉmbɨlɨɨye, leelo ɨhwanziwa ʉhwifumyaje weewe hwaliinɨ. 20 Ɨshi holo waanɨ, ʉnaavwe mwa Mwɨnɨ weetu, nantele ʉnsansamusyaje ʉmwoyo gwanɨ mwa Kilisiti. 21 Ɨhusimbila ɨkalaata ɨnɨ, pɨpo ɨmɨɨnye huje, ʉnza hwɨtɨɨhane naanɨ abhombe gaala ga nalaabha, poshe ashɨle ɨgo.
22 Peeka nɨɨzyo, ɨhulaabha ʉnanzile apa khale, pɨpo ɨnsʉʉbhɨla huje, alɨngaane nɨ mpuuto zyenyu, ʉNgʉlʉbhɨ ahaineefwa mu hoobhe aje, ɨnɨnze kwenyu abhayaatile.
Amazwi aga lagane
23 Ʉholo waanɨ ʉEpaafula ahulamuha, ʉmwene naanɨ tenti tikʉngwɨlwe peeka mu hoobhe, hu nongwa ya lʉmbɨɨlɨle ɨNongwa zya Yeesu Kilisiti. 24 Bhope abhabhomba mbombo abhamwetu bhɨɨpa, ʉMaalʉko, ʉAlisitaaluko, ʉDeema, nʉ Luuka bhahulamuha. 25 Ʉwiila wa Mwɨnɨ ʉYeesu Kilisiti wubhanje peeka naamwɨ mwenti.