1 ɄPaulo nʉ Siila bhahashɨla hwi booma ɨlya hu Amufupooli nɨ lya hu Apoloniiya, bhahafiha mwi booma ɨlya hu Tesaloniike. Ɨpo pahali nɨ nyumba ɨya puutile na manyiilile ɨya Bhayahuudi. 2 Ʉhwo ʉPaulo ahatʉʉha mu nyumba ɨya puutile na manyiilile, nanshi sha gahali amiiho gaakwe. ƗSabaato zitaatu ahapanjilanaga nabho afume mu Nsimbo ɨMfinjile, 3 sha bhalanganyizya na hubhalolesye pa pazelu huje, ʉKilisiti ahanziwaaga alabhe, afwe na zyʉshe mu bhafwe. Nantele ahabhabhʉzyaga huje, “ɄYeesu ʉnʉ wɨ hunʼʉmbɨɨlɨla huliimwɨ, yʉ Kilisiti.” 4 Bhamo mwa Bhayahuudi bhaala bhahagɨɨtɨha amazwi ga Paulo. Bhope abhinji bha saga Bhayahuudi leelo bha bhahunʼtiniha ʉNgʉlʉbhɨ, peeka na bhashɨ abhinji abhɨ nshɨnshɨ, bhahamwɨtɨha, bhahabha peeka nʉ Paulo nʉ Siila.

5 Leelo, ɨjɨɨla yahabhakhata aBhayahuudi bha saga bhahamwɨtɨɨshe. Bhahabhala hu lembuka, bhahabhaana abhantu abhabhiibhi. Ɨbho bhahabhabhʉngaanya abhantu abhinji, bhahanda abhombe ʉlwese ʉlugoosi mwi booma lyonti. Bhahabhala pa khaaya ya muntu ʉmo wa hwɨtwa Yaasoni, bhahatʉʉha mu nyumba hwi khone hubhanze ʉPaulo nʉ Siila huje, bhabhakhate na hubhatwale pilongolela lya bhantu abha pi booma. 6 Lwa saga bhahabhaaga, bhahanʼkhata yʉʉyo ʉYaasoni peeka na bhooziwa bhamo, bhahabhadendemula afishe hwa bhagoosi bhi booma, bhahabwagaga bhahagaga, “Abhantu bha bhahaleetaga ʉlwese ʉlugoosi mu nsi ɨzyɨnjɨ zyonti, ɨshi bhɨnzɨle ɨpa pi booma lyetu. 7 ɄYaasoni ʉnʉ abhambɨlɨɨye mu nyumba yaakwe. Ɨbha bhonti bhasyoshela ɨndajizyo ɨzyo ʉmwɨnɨ ʉnʼgoosi, ʉKayisali zya zibhɨɨshɨle, bhayiga, ‘Alɨɨho ʉmwɨnɨ ʉwɨnjɨ, ʉyo itaawa lyakwe yʉ Yeesu.’ ” 8 Abhagoosi abhi booma liila peeka na bhantu lwa bhʉmvwa ɨnongwa ziila, bhahaviitwa haani. 9 Bhaheega ɨmpɨɨya afume hwa Yaasoni na bhamwabho huje, bhahwigombole. Ɨpo bhahabhɨtɨshɨla huje, bhabhalaje humwabho.

10 Lwa hwabha siku, nalinaali abhooziwa bhahabhabhʉʉzya ʉPaulo nʉ Siila huje, bhasogole, bhabhalaje hwi booma ɨlya hu Belooya. Lwa bhaafiha huula, bhahatʉʉha mu nyumba ɨya puutile na manyiilile ɨya Bhayahuudi. 11 Abhantu bhʉʉhwo hu Belooya bhahali bhantu bha bhatejeelezya ashɨle abha hu Tesaloniike. Bhahazyambɨlɨlaga ɨNongwa ɨNyinza ɨzya Mwɨnɨ ʉYeesu hu mwoyo gwonti. Nantele bhahajendeelela abhaazye ɨNsimbo ɨMfinjile ɨnsiku zyonti huje, bhasimishizye huje, amazwi ɨgo ʉPaulo ga yanga gɨ lyoli. 12 ABhayahuudi abhinji, peeka na bhalume na bhashɨ abhagoosi bha saga Bhayahuudi, bhabhinji bhahamwɨtɨha ʉYeesu.

13 Leelo, aBhayahuudi abha hwi booma ɨlya hu Tesaloniike lwa bhaamanya huje, ʉPaulo alʉmbɨɨlɨla ɨNongwa ɨNyinza ɨzya Yeesu na hwi booma ɨlya hu Belooya, bhahabhala hwope, bhahabhomba ʉlwese ʉlugoosi na sonsheelezye ɨmpʉga ɨya bhantu. 14 Abhooziwa abha hu Belooya bhahamwega ʉPaulo lubhilo, bhahanʼtwala hu nsʉmbi, leelo ʉSiila nʉ Tiimoti abheene bhahasyala hwʉhwo. 15 Bhaala bha bhahamwejile ʉPaulo, bhahamʼfisya hwi booma ɨlya hu Aseene. Hu habhaazyo ha bhaweela, ʉPaulo ahabhasonteelezya nɨ nongwa ɨzya hubhatwalile ʉTiimoti nʉ Siila huje, bhasahakhale, bhamʼɨnjɨlɨzyaje lubhilo.

16 Hu habhaazyo ʉPaulo lwa bhagʉʉlɨla ʉTiimoti nʉ Siila hu Aseene, ahalola huje, mwi booma liila lyonti mumemile ɨvifwani ɨvya bhangʉlʉbhɨ. Ɨpo ʉmwoyo gwakwe gwahazugumila haani. 17 Ahanda atʉʉshe mu nyumba ɨya puutile na manyiilile. Ʉmwo ahajehanaga na Bhayahuudi na bha saga Bhayahuudi leelo bha bhahunʼtiniha ʉNgʉlʉbhɨ. Nantele, ahajehanaga pa pazelu ɨnsiku zyonti na bhantu ɨbho ahakhomaanaga nabho hu lembuka.

18 Hu lembuka ʉhwo ahakhomaanaga na bhantu bhamo bha bhahali nɨ njeele tee bha bhahakwiziwaaga Bhalepukuleewo* Bhalepukuleewo bhahayanjile huje, ahantu ahinza mu wʉʉmi wa muntu huhwiyʉmvwe na ga mu nsi, nantele saga bhahanzaga amayɨmba. Saga bhahɨtɨhaga ɨvilaale ɨvya bhangʉlʉbhɨ abhɨ Shiyunaani. na Bhasitoyiki.† Bhasitoyiki bhahasaagaga haani asɨɨbhe. Bhahakhaanaga ɨmanyizyo ɨzya huhwiyʉmvwe gope ga mu nsi. Lyoli bhahasɨɨbhaga huje, shinza abhombe ɨnyinza na bhombe ga gahwanziwa hwa muntu. Ɨbho bhope bhahanda adaliihane nʉ Paulo. Bhamo bhahaga, “Ahwanza ayanje yeenu ʉnʼyanzi ʉnʉ?” Bhamo bhahaga, “Ɨloleha huje, alʉmbɨɨlɨla ɨnongwa ɨzya bhangʉlʉbhɨ bhɨ shijenu.” Bhahayanjile ɨsho, pɨpo ʉPaulo ahabhalʉmbɨlɨlaga ɨNongwa ɨNyinza ɨzya Yeesu na zyʉshe hwakwe. 19 Ɨpo abhɨ njeele bhaala bhahanʼtwala ʉPaulo hwi koloti igoosi ɨlya bhamanyiihanyi ɨlyo lyahakwiziwaaga Aleyopago. Abhagoosi abhi koloti bhahamʼʉʉzya bhahaga, “Ʉtibhʉʉzye natɨ ɨmanyizyo ɨmpya zyʉ manyizya abhantu, 20 pɨpo tʉmvwɨzye huje, ʉleetile ɨmanyizyo ɨmpya. Ɨshi tisʉngwa huje, tizimanye aje, zili bhʉlɨ.” 21 Bhahayanjile ɨsho, pɨpo abhantu abha huula hu Aseene, peeka na bhajenu abha hutali bha bhahakhalaga ʉhwo, bhahasʉngwaga atejeelezye lwene ɨnongwa ɨmpya, na huziyanje.

22 Ɨpo ʉPaulo ahɨmɨɨlɨla mwi koloti liila ɨlya Aleyopago, ahaga, “Mwɨ bhantu bha hu Aseene! Naamanya huje, amwɨ muli nʉ lwɨtɨho ʉlugoosi haani hwa bhangʉlʉbhɨ. 23 Lwa nahashɨlaga mwi booma ɨli, nahalolile sha mupuuta abhangʉlʉbhɨ. Nahalolile nɨ shitimbano ɨsha fumizye ɨnsangu sha shisimbwilwe amazwi ga gayiga: HWA NGɄLɄBHƗ WA SAGA AMANYIHA. ɄNgʉlʉbhɨ ʉyo wa muhumʼpuuta sinta humʼmanye, ya yʉʉyo anɨ ɨhwanza aje, ɨmbalʉmbɨɨlɨle.

24 ɄNgʉlʉbhɨ ʉyo ya yʉʉyo wa hapelile ɨnsi nɨ vyonti vya vilɨɨho ʉmwo, nantele yʉ Mwɨnɨ ʉwɨ mwanya nɨ nsi. Ʉmwene saga akhala mu nyumba ɨmfinjile zya zizengwilwe na bhantu. 25 Saga abhombelwa na bhantu nkati ahwanza ahantu hwa bheene. Ʉmwene wa hubhapeela abhantu bhonti ʉwʉʉmi, ʉmwoyi nɨ vintu vyonti. 26 Afume hwa muntu weeka, ahapelile ɨvikholo vyonti ɨvya bhantu huje, bhanyampaane mu nsi zyonti. Afume halɨ, ʉmwene ahabhabhɨshɨɨye nzɨɨla huje, bhahaikhalaga hwi na hu habhaazyo bhʉlɨ. 27 ɄNgʉlʉbhɨ ahabhombile ɨzyo zyonti hu nongwa ya je, abhantu bhamwanze, lumo na hwi dala ɨlya palamansye huje, bhamʼmanye shinza. Hwope ɨsho, ʉmwene saga ali hutali nʉ wowonti mwaliitɨ. 28 Ɨnjanjile ɨsho, pɨpo ‘mwa mwene mwa tikhala na jendeelele alembe.’ Nanshi sha bhahayanjile abhamwabho mu nsimbo zyenyu ɨzyɨ nteelo huje, ‘Atɨ tili bhaana bhaakwe.’

29 Ɨshi, atɨ tili bhaana bha Ngʉlʉbhɨ. Hu nongwa ɨyo, saga tihwanziwa asɨɨbhe huje, ʉNgʉlʉbhɨ alɨngaana nɨ holanyo zya zigombwilwe hu goolodi, hu majela, awe hu mawe. Ɨholanyo ɨzyo zilɨnganyiziwa hu manyiihanyi ʉwa bhantu lwene. 30 Ɨmandɨ luula, abhantu lwa bhahabhombaga ɨzyo sinta amanye, ʉNgʉlʉbhɨ ahali nkati saga alola. Ɨshi leelo, ahubhalajizya abhantu bhonti poponti huje, bhalaate ɨmbiibhi zyabho na huzileshe. 31 Bhahwanziwa alambe, pɨpo ahabhɨɨshɨle isiku ɨlya hubhalonje abhantu bhonti hu lyoli, hwi dala lya muntu wa hanʼsaluuye. ɄNgʉlʉbhɨ abhasimishiziizye bhonti ɨgo, hwi dala ɨlya hunʼzyʉsye ʉmuntu ʉyo mu bhafwe.”

32 Abhagoosi bhaala lwa bhʉmvwa huje, ʉPaulo ayanga ɨzya zyʉshe hwa bhafwe, bhamo bhahanʼsyoshela. Leelo, abhamo bhahamʼʉʉzya bhahaga, “Tihwanza ahutejeelezye nantele hu nongwa ɨzi.” 33 Ɨpo ʉPaulo ahafuma mwi koloti, ahabhaleha. 34 Abhantu bhamo bhahamwɨtɨha ʉYeesu, bhahanda humʼɨnjɨɨlɨle ʉPaulo. Mwɨbho ahali ʉDiyonisyo, ʉwa hwi koloti ɨlya hu Aleyopago, nʉ nʼshɨ ʉmo itaawa lyakwe ahali yʉ Damaali, na bhantu abhanjɨ.