Ɨkalaata ya bhɨɨlɨ ɨya nʼsontwa ʉPaulo hwa
Tiimoti
Ʉtagaalizyo
Ɨkalaata ɨnɨ yahasimbwilwe nʉ Paulo, ʉnʼsontwa wa Yeesu Kilisiti hwa Tiimoti, ʉmwavwi waakwe (bhaazya 2 Tiimoti 1:1-2). Ahali mwavwi waakwe wa mu pɨɨpɨ nanshi ʉmwana waakwe (bhaazya 2 Tiimoti 1:2-5; 2:1). ɄPaulo ahasimbile ɨkalaata ɨnɨ lwa li mu hoobhe hwi booma ɨlya hu Luumi (bhaazya 2 Tiimoti 1:16-17). Ahakʉngwɨlwe, ʉmwɨnɨ ʉNeelo lwa halongozyaga. Ahabhaazyo ɨho, aBhakilisiti bhahayɨmbaga haani hu nongwa yɨ lwɨtɨho lwabho. Nantele, ʉPaulo ahasɨɨbhaga huje, ahabhaazyo ɨho bhasinʼgoje (bhaazya 2 Tiimoti 4:6-8). Mu habhaazyo hahaala, ʉTiimoti ahali mwi booma ɨlya hu Efeeso, lya lyahali mu mukowa ʉgwa hu Aasiya (bhaazya 2 Tiimoti 1:18; 4:12, 19). Ɨbhoneha huje, ɨkalaata ɨnɨ yahasimbwilwe mu maaha ga mu 64-67 afume ʉYeesu lwa wapaapwa.
Ɨnsɨɨbho ɨya simbe ɨkalaata ɨnɨ, yahali ya hunʼjinjizye ʉTiimoti huje, abhe ahwilɨngaanya alʉmbɨɨlɨle ɨNongwa ɨNyinza ɨzya Yeesu Kilisiti, ayikhasyaje na jimbiilizye mu makhome gonti (bhaazya 2 Tiimoti 1:6-8, 2:3-10, 24; 4:2-5). ɄPaulo ahanajiziizye ʉTiimoti huje, abhabhʉzyaje aBhakilisiti abha hu Efeeso huje, bhabhanje nɨ njendo ɨnyinza. Bhamanyizyaje shinza ɨmanyizyo zya bhahamanyiiye (bhaazya 2 Tiimoti 2:14-15). Ɨlyamwabho, lya humʼʉʉzya ʉTiimoti huje, akhaanaje hwi khone lyonti ɨmanyizyo ɨzyɨ malenga, amanyizyaje ɨzya nalyoli (bhaazya 2 Tiimoti 1:13; 4:2-5). Nantele, ʉPaulo asyʉkwɨlwe haani hunʼole ʉTiimoti (bhaazya 2 Tiimoti 1:3-4; 4:9, 21). Mu kalaata ɨnɨ ahunʼaabha ʉTiimoti abhale nalinaali, atwalile igolole nɨ vitaabu vyakwe (bhaazya 2 Tiimoti 4:13).
1
ɄPaulo ahunʼamuha ʉTiimoti
Anɨ nɨ Paulo, ʉnʼsontwa wa Yeesu Kilisiti nanshi ʉNgʉlʉbhɨ sha hwanza. ɄYeesu ansonteleziizye huje, ɨndʉmbɨlɨlaje abhantu ɨnongwa zyɨ wʉʉmi, wuula afinjile nka tihumwɨtɨha ʉmwene. Anɨ ɨhusimbila awe Tiimoti, we mwana waanɨ we nʼkʉndwe. ɄDaada ʉNgʉlʉbhɨ nʉ Mwɨnɨ weetu ʉYeesu Kilisiti, bhallolelaje ʉwiila nɨ nkʉmbʉ na hupeele ʉtengaanu.
Ahunʼondolezye ʉKilisiti sinta nsoni
Ɨhunʼsalifya ʉNgʉlʉbhɨ wɨ humʼombela hu mwoyo ʉmwoloolo, nanshi abhamaama bhaanɨ sha bhahabhombaga. Lwɨ mpuuta, ɨhuhwizuha pasanya na nʉsiku, na hunʼsalifye ʉNgʉlʉbhɨ hu nongwa yaaho. Ɨhwizuha amansozi gaaho lwa tahalehanaga, ɨnsyʉkwɨlwe hulole, nkɨ mbe nɨ nseho. Ɨhwizuha shʉ hamwɨtɨɨshe ʉNgʉlʉbhɨ sinta wango, nanshi ʉmaama waaho ʉLoyisi, nʉ nyina waaho ʉEyunike sha bhahamwɨtɨɨshe. Nanɨ ɨnsimishizya huje, awe nawe ʉli nalwo ʉlwɨtɨho.
Yɨ nongwa ɨnɨ ɨhuhwizusya huje, ʉzunjizyaje ɨshikʉnjɨlwa ʉNgʉlʉbhɨ sha hapiiye, hu habhaazyo ɨho nahahubhɨshɨɨye ɨnyoobhe, pɨpo ʉNgʉlʉbhɨ saga ahatipiiye ʉmwoyo ʉgwɨ lyoga. Lyoli ahatipiiye ʉmwoyo ʉgwa tipeele ʉdandamazu, ʉkʉndwa, na hwijele. Ɨshi ʉsahalolaje ɨnsoni afumye ʉsimishizi hwa Mwɨnɨ weetu, nantele ʉsahandolelaje ɨnsoni anɨ nɨ ndi nʼkʉngwe hu nongwa ya fumye ʉsimishizi waakwe. Leelo, nawe, hwi khone ʉNgʉlʉbhɨ lya piiye, ʉjimbaje ayɨmbe hu nongwa yɨ Nongwa ɨNyinza ɨzya Yeesu Kilisiti. Ʉmwene ahatifyʉlɨle, ahatikwizya huje, tibhe bhantu bhaakwe abhasangalusu. Ʉfyʉli weetu ʉwo saga wufumilana nɨ mbombo zyetu ɨnyinza, lyoli hu nsiini ya Ngʉlʉbhɨ yʉʉyo nʉ wiila waakwe. Ʉwiila ʉwo ahatipiiye hu nongwa ya Yeesu Kilisiti, sha sɨɨle apele ɨnsi. 10 Ɨshi atilanjile pa pazelu ʉwiila ʉwo ʉwa shɨlɨle ahwɨnze hwa Yeesu Kilisiti, ʉMʼfyʉli weetu. Ʉmwene ʉYeesu awutolile ʉfwe, na hwi dala lyɨ Nongwa ɨNyinza, ahalolesya sha tigawaaga ʉwʉʉmi wa wiila na wiila.
11 Hu Nongwa ɨNyinza ɨzyo, nanɨ ʉNgʉlʉbhɨ ahansaluuye huje, ɨmbe nʼʉmbɨɨlɨli, nʼsontwa, nantele mʼmanyizyi. 12 Hu nongwa ɨyo anɨ ɨyɨmba. Leelo, anɨ saga ɨlola ɨnsoni, pɨpo ɨmanyile shinza wɨ humwɨtɨha. Nantele, ɨndi nʉ simishizyo huje, abhajiiye azisʉnje ɨNongwa ɨNyinza ɨzyo zyɨ mpewiilwe afishe mwi siku lyɨ malishilo.
13 Amazwi gonti ga wʉmvwa huliinɨ gɨ lyoli. Ʉlondolezyaje ɨshifwani shɨ mazwi ɨgo, lwʉ manyizya mu lwɨtɨho nʉ kʉndwa vya vili mwa Yeesu Kilisiti. 14 Ɨnongwa ɨnyinza ʉNgʉlʉbhɨ zya hapiiye, ʉzisʉngaje hwi khone lya Mʼpepo ʉMʼfinjile wa khala muuhati yeetu.
15 Nanshi ʉmɨɨnye huje, abhantu bhonti abha mu nsi ɨya mu Aasiya bhahandeshile. Mwʉmwo alɨɨho ʉFugeelo nʉ Helimogeene. 16 Leelo, abhantu abha mu nyumba ɨya Onesifoolo, ʉMwɨnɨ abhalolelaje ɨnkʉmbʉ, pɨpo ahanavwaga habhɨlɨ habhɨlɨ. Nantele, saga ahalolaga ɨnsoni ɨzya huje, ɨnkʉngwɨlwe na manyololo ɨga. 17 Lwa waafiha mwi booma ɨlya hu Luumi, ahabajile ananze, ahanaaga. 18 ɄMwɨnɨ ahalolele ɨnkʉmbʉ isiku lyɨ malishilo! Nawe ʉmɨɨnye shinza sha hanavwizye ʉhwo, hwi booma ɨlya hu Efeeso.