Ɨkalaata ya hwande ɨya nʼsontwa ʉPaulo hwa
Tiimoti
Ʉtagaalizyo
Ɨkalaata ɨnɨ yahasimbwilwe nʉ Paulo, ʉnʼsontwa wa Yeesu Kilisiti hwa muntu wa bhahagaga Tiimoti, ʉnʼkhaaya ʉwa hwi booma ɨlya hu Lisitila. ɄTiimoti ahali mʼvwɨlɨ wa nʼshɨ ʉNʼyahuudi, ʉyise waakwe ahali Nʼyunaani (bhaazya mu Mbombo Zya Bhasontwa 16:1). ɄTiimoti ahapɨnduushe lwa walʉmbɨɨlɨlwa nʉ Paulo, sha shɨɨsho ʉPaulo ahunʼkwizya ʉTiimoti huje, mwana waakwe mu lwɨtɨho (bhaazya 1 Tiimoti 1:2). ɄTiimoti ahajendaga nʉ Paulo mu mbombo ɨnyinji ɨzya lʉmbɨɨlɨle ɨNongwa ɨNyinza ɨzya Yeesu Kilisiti (bhaazya mu Mbombo Zya Bhasontwa 17:14-15; 18:5). Ɨbhoneha huje, ʉPaulo ahasimbile ɨkalaata ɨnɨ mu maaha ga mu 65 afume ʉYeesu lwa wapaapwa. ɄPaulo lwa sɨɨle asimbe ɨkalaata ɨnɨ, ahamʼpiiye ʉTiimoti ɨmbombo ya hwenye ɨvibhanza ɨvya Bhakilisiti mwi booma ɨlya hu Efeeso (bhaazya 1 Tiimoti 1:3).
Ɨnsɨɨbho zya Paulo asimbe ɨkalaata ɨnɨ, zyahali humʼʉʉzye ʉTiimoti shɨ hwanziwa asalule na manyizye abhenyeelezi, na bhaavwi abhɨ vibhanza ɨvya Bhakilisiti mwi booma ɨlya pa Efeeso. ɄPaulo ahanzaga huje, ʉTiimoti na bhenyeelezi ɨbha bhabhanje bhagolosu, bhamanyizyaje ɨlyoli nɨ njendo zya zikhondɨɨye hwa Bhakilisiti. Nantele, ahasɨɨbhile humʼʉʉzye ʉTiimoti huje, abhanje shifwani shinza hwa bhantu bhonti (bhaazya 1 Tiimoti 4:12). Ɨnsɨɨbho zyakwe ɨzyamwabho zyahali zya hunangaanyizye ʉTiimoti, abhaavwe aBhakilisiti mu makhome ga gahali mu vibhanza. ɄTiimoti abhanje ni khone akhaane ɨmanyizyo zyonti ɨzyɨ malenga (bhaazya 1 Tiimoti 1:3-7; 4:1-5; 6:3-5).
1
ɄPaulo ahunʼamuha ʉTiimoti
Anɨ nɨ Paulo, ʉnʼsontwa wa Yeesu Kilisiti, nanshi ʉNgʉlʉbhɨ ʉMʼfyʉli weetu, nʉ Yeesu Kilisiti ʉyo tihunʼsʉʉbhɨla, sha bhahandajiziizye. Anɨ ɨhusimbila awe Tiimoti, wʉ li mwana waanɨ lyoli mu lwɨtɨho. Bhaazya ɨMbombo Zya Bhasontwa (Matendo ya Mitume) 16:1.
ɄDaada ʉNgʉlʉbhɨ nʉ Mwɨnɨ weetu ʉYeesu Kilisiti, bhallolelaje ʉwiila nɨ nkʉmbʉ, na hupeele ʉtengaanu.
Ɨnsundo hu bhamanyizyi bhi lenga
Ɨhwanza huje, ʉsagale hwʉhwo hwi booma ɨlya hu Efeeso, nanshi sha nahallambile mwa habhaazyo haala ha nahali hu nsi ɨya hu Makedoniya. Nahajile ʉbhabhʉʉzye abhantu bhamo huje, bhapɨndushe hu manyizyo zyabho ɨzi lenga. Nantele, ʉbhakhaane huje, bhalehane navyo ɨvilaale vya saga vikhondɨɨye, awe abhambishe amataawa ga bhamaama bha bhahafwiye. Ɨgo galeeta madali lwene mwa bhantu, saga gali nɨ pa malishile. Saga gajendeelezya abhantu abhombe ɨmbombo ya Ngʉlʉbhɨ, pɨpo ɨmbombo zya Ngʉlʉbhɨ zikhamantana mu lwɨtɨho lwene.
Ɨndajizyo ɨzyo hwa huje abhantu bhabhe nʉ kʉndwa. Ʉkʉndwa ʉwu wuli mwa bhantu bhaala, amooyo gaabho gasangaluushe, bha bhasaaga abhombe ɨnyinza, na bha bhali nʉ lwɨtɨho ʉlwɨ lyoli. Abhantu abhanjɨ bhazileshile ɨzyo, na galushile mu mazwi agɨ nanjisu. Bhope bhahwanza abhe bhamanyizyi abhɨ ndajizyo zya Ngʉlʉbhɨ, leelo amazwi ga bhayanga na khajilizye, abheene bhɨɨbho saga bhagaaganya.
Atɨ timɨɨnye huje, ɨndajizyo zya Ngʉlʉbhɨ nyinza, nkashele ʉmuntu azilondolezya hwi dala lya likhondɨɨye. Nantele, timɨɨnye huje, ɨndajizyo saga zibhɨhwɨlwe hwa bhantu bha bhali bhagolosu. Lyoli zibhɨhwɨlwe hu nongwa ya bhantu abhananzi bha saga bhasaaga. Zibhɨhwɨlwe hwa bhantu bha saga bhahunʼtiniha ʉNgʉlʉbhɨ, na hwa bhabhiibhi. Nantele, zibhɨhwɨlwe hwa bhantu bha saga bhahumʼpuuta ʉNgʉlʉbhɨ na bha bhasʉngwa ɨzya mu nsi. Zibhɨhwɨlwe hwa bhantu bha bhagoga abhayise bhaabho na bhaanyina bhaabho, na hwa bhagoji abhanjɨ bhonti. 10 Ɨndajizyo ɨzyo zibhɨhwɨlwe hwa bhembu, na hwa bhaala bha bhabhomba ʉweegu abhalume hwa bhalume, hwa bha bhahwibha abhantu na bhakazye, bha bhayanga ilenga, na hwa bhonti bha bhalapa ilenga. Nantele, zibhɨhwɨlwe hwa bhanjɨ bhonti bha bhabhomba zya zilegana nɨ manyizyo zyɨ lyoli.
11 Ɨmanyizyo ɨzyo zibhoneha mu Nongwa ɨNyinza zya Ngʉlʉbhɨ, wa li nʉ mwamu nʉ wɨ nsayo zyonti. Nanɨ, ampiiye ɨNongwa ɨNyinza ɨzyo huje, ɨndʉmbɨlɨlaje.
ɄNgʉlʉbhɨ ahunolela ɨnkʉmbʉ ʉPaulo
12 Ɨhunʼsalifya ʉMwɨnɨ weetu ʉYeesu Kilisiti, sha halolile huje, ɨndi nʼsundwe, ahansaluuye hu mbombo yaakwe, ahampeela ikhone ɨlya bhombe. 13 Pope hwisinda ʉhwo, nahabhaligaga, nahabhayɨmvyaga haani, na bhaviisye abhantu bhaakwe, leelo ʉYeesu ahandolela ɨnkʉmbʉ. Nahabhombile ɨgo, sinta amanye, shɨ nsɨɨle abhe nʉ lwɨtɨho. 14 Leelo, ʉMwɨnɨ weetu ʉYeesu Kilisiti ahandolela ʉwiila haani, ahampeela ʉlwɨtɨho nʉ kʉndwa afume hwa mwene.
15 Huli ni zwi lyɨ lyoli lya likhondɨɨye alyɨtɨshe hu mwoyo gwonti huje, “ɄYeesu Kilisiti ahɨnzɨle mu nsi ʉmu abhafyʉle abhɨ mbiibhi”, bhaala wa hwande waabho nɨɨnɨ. 16 ɄYeesu Kilisiti ahandolɨɨye ɨnkʉmbʉ huje, afumilane naanɨ nɨ ndi miibhi ashɨle abhanjɨ bhonti, abhonesye ʉjimvu waakwe ʉwa swijizye hwaliinɨ, nantele ɨmbe shifwani hwa bhaala bha bhahaihumwɨtɨha, na waaje ʉwʉʉmi ʉwa wiila na wiila.
17 ɄNgʉlʉbhɨ yʉ Mwɨnɨ ʉwa wiila na wiila,
saga ahaifwa nalumo.
Saga alɨɨho ʉmuntu wa bhajiiye hunʼole ʉNgʉlʉbhɨ,
saga alɨɨho ʉNgʉlʉbhɨ ʉwɨnjɨ.
Yʉʉyo mwene ayambɨlɨlaje ɨnshɨnshɨ
nʉ mwamu wiila na wiila. Zibhanje shɨɨsho!
ɄPaulo ahunʼajizya ʉTiimoti
18 Awe mwana waanɨ Tiimoti, ɨhulajizya huje, ʉyɨɨtɨshe abhombe ziila abhakuwi bha Ngʉlʉbhɨ bhahayanjile hwaliiwe. Ʉlondolezyaje amazwi ɨgo huje, gahwavwaje alwe ʉlʉgʉ ʉwinza ʉwa sʉnje ɨmanyizyo ɨzyɨ lyoli. alwe ʉlʉgʉ ʉwinza ʉwa sʉnje ɨmanyizyo ɨzyɨ lyoli Hwa huje hudaliihane na bhamanyizyi bhi lenga. Bhaazya 1 Tiimoti 1:3-5. 19 Ʉkhatizyaje ʉlwɨtɨho lwaho, na saaje abhombe ɨnyinza, pɨpo bhamo saga bhahazisaajile ɨzyo. Sinta abhombe ɨzyo, pa zyahaazya ʉlwɨtɨho lwabho lunanjiishe lwonti. 20 Muuhati mwɨbho alɨɨho ʉHimenaayo nʉ Alekizanda. Ɨbho bhonti, nahabhadajiiye hwʉnzɨ hwa Seetano huje, bhamanyile aleshe ahunʼshente ʉNgʉlʉbhɨ.

1:2 Bhaazya ɨMbombo Zya Bhasontwa (Matendo ya Mitume) 16:1.

1:18 alwe ʉlʉgʉ ʉwinza ʉwa sʉnje ɨmanyizyo ɨzyɨ lyoli Hwa huje hudaliihane na bhamanyizyi bhi lenga. Bhaazya 1 Tiimoti 1:3-5.