Yunus 4

Neɓsaaɗiinaŋ Yunus na lofaŋ Kooh na ɗe

1 Wa Kooh ɗaas ɓi Niniw, wa neɓaaɗiisa Yunus lool, a ayrukka. 2 A woosa Nikiɗi : « Eey Nikiɗi, ina ŋ woyee wa ŋ nikoh ŋ kur ɓoo wa ɗi wii haa e ? E ineem tahee po ŋ ɗeɓgohha saandoh Tarsis ; ŋ inhangangeen ne, fu Kooh teyɗukiɗ, fu Kooh miskuuɗ, fu Kooh seeskaaɗi ayruk, fu riifiɗ na waaɗohaaɗ, inwaaso ambang ɗa ŋ tum moɗaaɗi. 3 Teemb ndii, Nikiɗi, ɓaya kiñin kiŋ ngo, laam nga so, ŋ kaan ngisoh ŋ pes. » 4 Nikiɗi loffa : « Wi fu ayruk wii, fu nik ŋ kiyooh e ? » 5 Yunus pulla kur ka, a ɓooffa ŋ ɓak pulohaaɗ noh ; a ɗiippa nga, a saangnukka nga a sekeeɗa ini haang raake na kur ka.

6 A nikka nga po, Nikiɗi Kooh paariɗta kidig, wa njopukka Yunus ne wa saangin hafiŋ ɗe, tee ɗah wa naaf ɗe ŋ miskiɗiŋ ɗe. Keeñaŋ Yunus soosootta ngaŋ kidga.

7 Honohɗi, ngaŋ wiisaaɗiina, Kooh tummba cangin aassa kidga wa suyya. 8 Ɓaatta nga, wa noh pul, Kooh kurkiɗta mbooyo ; noha dammba hafaŋ Yunus po a minisɗi. A kiimmba kaan, a woosa ne : « Ŋ kaan ngisoh ŋ pes. » 9 Kooh meekissa Yunus : « Fu yii ŋ keeh weem oo, na ayruki ŋ ini na kidgii ? » A loffa : « Ee di ! Ñam ɓur, ŋ ayruk po ŋ hee kaane. » 10 Nikiɗi dokkissa ŋ woo ka : « Fu, kidgii miskiɗ ɗa. Nikɗi haa ne ya fu taambkoha, te ya fu hooɗiɗa haa. Wa paar na wek wino, wa leeɓpa na wek wino. 11 Fu waaɗta ne mi, ŋ heeɗi miskasse ŋ ini hee rahse Niniw, kur ki yakki fu inah ne ɓo' alfun teemet na alfun ndaŋkiyaah kanak (120.000) ɓii nga ɓi inhisohɗi yaah ñaahum na yaah sing, ɓaatta nga ɗoopat ci minɗi reeh ! »