3
I lab ap i djuwjende!
1-2 Tumer djuwja,
ma hadenn tumen pral tumare romende,
ninna te shunenn jon gar ap o Debleskro lab!
Jaake dikenn jon,
har tumer i djudjo djipen djiwenna,
un ap o Debleste shunenna.
Un tumaro djipen sikrell len o tchatcho drom pash o Debleste,
ninna te krenn tumer kek bare laba.
3 Tumaro shukapen hunte well gar diklo an kowa,
hoi i menshe dikenna:
har tumer tumare balla hidjrenna,
witar gar an o sonakai un kutch ripja!
4 Tumaro shukapen hunte well dran tumaro dji un sikrell pes an o latchepen,
kai kek tchingepen dren hi.
Sawo shukapen atchella,
un hi bud moldo glan o Debleskre jaka.
5 Jaake djiwan ninna kol patsle djuwja an ko phuro tsiro.
Jon dikan ap o Debleste,
un hadan pen gar pral pengre romende.
6 Jek lendar hi i Sara.
Joi shunas ap o Abrahameste,
un penas ap leste Rai.
Te krenn tumer,
hoi latcho hi,
un te mukenn tumen kekestar daar te krell,
palle han tumer har lakre tcha.
I lab ap i murshende
7 Murshale,
djiwenn tumare romjentsa latches khetne!
Jon hi gar jaake sorelo har tumer.
Awenn latches ap lende!
Ma bistrenn,
i djuwja lenn o Debleskro djipen har tumer!
Te djiwenn tumer jaake,
palle well tchi mashkral tumende tardo ap ko tsiro,
kai rakrenn o Debleha.
I lab ap i tsele patslende
8 Ap tumende lauterende penau:
Rikrenn khetne!
Hakenes te well i dji o wawareske!
Tumer lauter han phrala un phenja.
Awenn latches jek ap o wawareste!
Ma krenn tumen bares!
9 Krenn kekeske tchilatchepen,
kai kras ap tumende tchilatchepen!
Jek te tchingrell ap tumende,
ma tchingrenn pale!
Rakrenn latche laba leha!
O Dewel das tumen gole,
te lenn tumer leskro latchepen.
10 An o Debleskro lab hi tchinlo:
Koon kamell i latcho djipen un bachtele diwessa te dikell,
kowa dell garda ap peskri tchip.
Kek chochepen,
kek tchilatchepen hunte well dran leskro mui!
11 Job mukell o tchilatcho koowa,
un krell o latcho koowa.
Peskri tseli sorjah krell lo,
te djal kek tchingepen mashkral i menshende!
12 O Dewel,
maro rai,
dikell latches ap koleste,
kai djiwell pal o tchatchepen.
Un te mangell job o Debles,
shunell lo les.
Ap kolende,
kai djiwenn an o tchilatchepen,
dikell o Dewel gar latches.a
13 Tumer te kamenn i tseli sorjah latcho koowa te krell,
koon krell tumenge tchilatchepen?
Kek,
patsau.
14 Tumer krenn,
hoi o Dewel tumendar kamella.
Nai well,
te lenn le tumen doleske palla.
Palle han bachtelo.
Te denn le tumen trad,
ma darenn!
Ma trashenn lendar!
15 O Jesus Kristo kokres te well o rai an tumare djia!
Un te putchenn le tumendar tchomone pral tumaro patsepen,
ma darenn kek tsiro,
te penenn lenge,
ap koneste tumer patsenna.
16 Rakrenn lentsa latchepah,
un krenn tumen gar bares pral lende!
Rakrenn dran i djudjo dji,
te well i ladj ap kolende,
kai rakrenn djungeles pral tumaro djipen o Jesus Kristeha!
17 Te krenn tumer latcho koowa,
un dran kowa krenn le tumentsa tchilatcho koowa,
palle hi kowa feteder,
har te krans tumer tchilatcho koowa.
Jon nai dukrenn tumen gar,
te mukals len o Dewel gar.
O Jesus Kristo hi o rai pral lauter
18 Ninna o Jesus Kristo las jek kopo duka ap peste,
har job ap o trushel meras,
un mari dooshb ap peste las.
Job his i latcho,
un meras i tchilatchenge.
Kowa kras lo,
te anell lo len pash o Debleste.
I menshe maran les.
O Debleskro Ducho kras les djido.
19 Har job mulo his,
djas lo ninna pash i mulende an o mulengro them tele,
un penas lenge o Debleskro latcho lab.
20 Job djas pash kol mulende,
kai djiwan an ko tsiro,
kai o Noah djiwas.
Har o Noah ko panjeskro kheer kras,
das o Dewel i menshen i rah tsiro,
te wenn le pash leste.
Un jon wan gar.
His gar budeder har ochta menshe,
kai djan an o panjeskro kheer.
Un kolla tassan gar an o pani.
21-22 Jaake har wan kol ochta menshe win lino dran o merepen,
jaake djas tumenge kanna ninna,
har wan tumer taufedo.
Kote was gar koi tchik tumendar tele thodo.
Na-a!
Koon mukell pes te taufrell,
kowa mangell o Debles,
te dell lo les i djudjo dji.
Kowa nai dell o Dewel leste doleske,
kai stas o Jesus Kristo i mulendar pre un djas an o bolepen.
Kanna hi lo beshdo ap i tchatchi rig o Deblestar,
un hi o rai pral i tsele bolepangre,
un pral i tsele pralstune un sorele an o bolepen.