4
O Dewel kamell men an peskro them te anell
1-2 Dran kowa denn mishto garda,
te dell kek tumendar peskro patsepen pre!
An o phuro tsiro penas o Dewel peskre menshenge,
te dell lo len i them,
kai jon hako tsiro khere hi.
Kau lab,
hoi o Dewel lenge penas,
atchell menge ninna.
An o phuro tsiro shunan le les,
un patsan les gar.
Jaake wan le gar an o Debleskro them.
3 Mer,
kai patsah,
hoi o Dewel penas,
mer wah an o Debleskro them.
I wawarendar penell lo:
An miri choli dom man sowel,
un penom:
Jon wenn gar dren an miro them,
kai wans le hako tsiro pash mande khere.a
Kau them hi koi jaake rah,
har o Dewel o bolepen un i phub kras.
Lauter his kerdo,
har job o bolepen un i phub an shob diwessa kras.
4 Pral o eftato diwes was penlo:
Har kras o Dewel lauter an o bolepen un ap i phub,
budras lo buder tchi ap o eftato diwes.
Lauter his kerdo.b
5 Kol menshendar an o phuro tsiro penas lo:
Jon wenn gar an miro them dren,
kai wans le hako tsiro pash mande khere.
6 Jaake dikah:
Hi sawe menshe,
kolla wan gar dren an leskro them,
un wawar,
kai nai wenn koi dren.
Kolla,
kai shunan o Debleskro lab an o phuro tsiro,
patsan les gar,
un wan gar dren.
Kau diwes dell o Dewel tumen gole
7 Doleske rodas o Dewel i wawar diwes win,
kai job pale ap i menshende rakrella.
Ko diwes hi kanna.
Bud bersha pal o tsiro,
kai mare phure an o mulo them djan,
tchiwas lo o Davideske kol laba an o dji:
Tumer te shunenn kau diwes o Debleskro rakepen,
palle shunenn ap leste!
Krenn tumare djia gar har barra!c
8 Glan o David djiwas o Josua.
Kowa anas mare phuren an o them Israel.
Te wals o them Israel ko them,
pral koleste o Dewel rakras,
rakrals lo bud bersha pal ko tsiro buder gar pral i wawar diwes.
9 Jaake dikah:
Hi gomme i tsiro,
kai nai wenn i menshe pash o Debleste,
kai jon hako tsiro khere nai wenna.
10 Kote hunte krenn i menshe buder kek budi,
jaake har o Dewel buder kek budi kras,
har lauter ap i phub kerdo was.
11 Doleske tchiwas mer maro tselo dji koi pre,
te was an leskro them dren,
kai ham hako tsiro pash leste khere.
Das jak,
te perell kek mendar o Debleskro dromestar tele,
har kol menshe an o phuro tsiro,
kai shunan gar ap o Debleste!
12 O Debleskro lab hi djido un sorelo,
un tchinell sorleder har i charo,
hoi tchinell ap dui rigja.
Jaake har tchinell i charo dur dren an o mass,
ninna an i kokale,
jaake tchinell o Debleskro lab dur dren an o mensheskro dji,
un sikrell leste,
hoi hi latcho un tchilatcho an leskro djipen.
13 O Dewel dikella lauter.
Tchi an mende hi khatedo glan leskre jaka.
Lauter hi pre tchakedo glan leste.
Un leske hunte penas mer halauter,
hoi kram.
O Jesus mangell o Debles menge
14 Men hi i baro rashai.
Kowa hi o Jesus,
o Debleskro tchawo.
Job djas pash o Debleste an o bolepen,
te mangell lo les menge.
Doleske mukas mer gar tele,
te rikras soreles ap maro patsepen.
15 Job,
maro baro rashai,
haiwell men mishto,
un djinella,
te hi men kek soor pral o tchilatchepen.
Les kamas o beng ninna o Debleskro dromestar tele te anell,
jaake har kamell lo men o Debleskro dromestar tele te anell.
Jek koowa his an o Jesuseskro djipen wawartchandes har pash mende:
Kek tchilatchepen his an leste.
16 Dran kowa was mer glan maro latcho Debleste.
Koles hi i baro dji menge,
te dell lo men peskri soor ap ko tsiro,
kai hunte las mer leskri soor.