40
O Jeremia well win lino dran o pandepen
1 I lurde dran Babilonia tapran bud menshen dran o foro Jerusalem un dran wawar gaba un forja an o them Juda. Jon pandan len shellentsa un anan len khetne an o foro Rama, te anenn le len pandles an o them Babilonia. Mank lende his ninna o Jeremia, peskre wasta i shellentsa pandles. Kote hatsas les o pralstuno i lurdendar, o Nebusaradan, un mukas les te djal. Pal kowa rakras o baro Dewel o Jeremijeha.
2 Glan te mukas o pralstuno i lurdendar o Jeremijes te djal, mukas lo les pash peste te anell, un penas ap leste: Tiro baro Dewel penas kai bibacht glan-wi, hoi was pral kau them. 3 Jaake har job les penas, was ninna. Tumer anan doosh pral tumende, un kran gar, hoi o baro Dewel kamas un tumenge penas. Doleske was kau tselo koowa pral tumende. 4 Un kanna dik, me lau i shelle tutar tele, kai tire wasta pandan. Te kameh, un te hi tuke mishto, ab mantsa an o them Babilonia, ab un me dau garda ap tute. Te kameh gar te djas mantsa an o them Babilonia, palle nai mukeh les. Dik, o tselo them hi glan tute tchiddo; kai tu kameh un kai tuke mishto hi, kote nai djah tu tuke koi. 5 Har job dikas, kai atchell o Jeremia tardo, penas lo ap leste: Dja pash o Gedalja, koleskro dad o Ahikam his, koleskro dad o Shafan his. Koles tchiwas o baro rai dran o them Babilonia pral i tsele forja an o them Juda. Atch pash leste mank tire menshende; oder dja kote koi, kai tu kameh. Un o pralstuno i lurdendar das les chapen ap peskro drom, un wawar latcho koowa, un mukas les te djal. 6 Jaake was o Jeremia an o foro Mizpa pash o Gedalja, koleskro dad o Ahikam his, un atchas pash leste mank peskre menshende, kai atchan pral an o them. 7 Koi his pralstune lurde dran o them Juda pengre lurdentsa kate te kote an o them. Jon shunan, kai tchiwas o baro rai dran o them Babilonia ko tchawes o Ahikamestar, o Gedalja, pral o them un pral kol murshende un djuwjende un tchawende un kol tchorwelende, kai gomme an o them Juda his, un gar an o them Babilonia krik anlo wan. 8 Kal pralstune lurde his: O Jishmael, koleskro dad o Netanja his, o Johanan un o Jonatan, kolengro dad o Kareach hi, un o Seraja, koleskro dad o Tanhumet his, un i mursh tchawe o murshestar Efai dran Netofa, un o Jaasanja dran Maacha. Jon lauter un lengre lurde wan pash o Gedalja. Kowa his an o foro Mizpa.
9 Un o Gedalja das pes glan lende sowel un penas: Ma trashenn i lurdendar dran Babilonia! Mukenn len pral tumende o rai te well! Atchenn kate an o them un budrenn o baro rajeske dran o them Babilonia! Palle djal tumenge mishto. 10 Me atchau kate an Mizpa, un hom tumaro rakepaskro, kai rakrau ap i Babilonarja, te wenn le pash mende. Djan an tumare forja, un djiwenn pale kote! Anenn dren, hoi kote bares was: moljengre drake, nijaleskre rukengre un djeteskre drake. Krenn mool un djet un tchiwenn kowa lauter an bare pirja!
11 Glan ko tsiro nashan bud menshe dran Juda an i themma Moab, Ammon un Edom un an wawar themma. Har kolla shunan, kai o baro rai dran o them Babilonia i wast pherdo menshen pral mukas an o them Juda, un tchiwas o Gedalja pral lende, 12 kote wan jon ninna pale an o them Juda dran i tsele themma, kai le his. Un jon djan pash o Gedalja an o foro Mizpa, te sikrenn le pen glan leste.
Un jon anan bud moljengre drake un nijaleskre rukengre dren.
13 Pal i tsiro was o Johanan, koleskro dad o Kareach his, khetne kol tsele wawar pralstunentsa, kai kate te kote an o them djiwan, pash o Gedalja an o foro Mizpa, 14 un penan ap leste: Djineh tu ninna, kai bitchras o Baalis, ko baro rai pral o them Ammon, jekes, te dell lo tut temerl? Kowa hi o Jishmael, koleskro dad o Netanja his. Kowa kamas o Gedalja lenge gar te patsell. 15 Kote penas o Johanan tchorchanes ap o Gedalja: Muk man te djap koi, te marap o Jishmael. Kek hunte djinell, koon kowa kras! Mer kamah gar, te dell lo tut mulo. Palle nai atchans i tsele menshe dran o them Juda, kai kate pash tute hi, buder gar khetne, un hunte djiwans pale kate te kote! Un kolla, kai pral atchans an o them Juda, wans maredo! 16 Kote penas o Gedalja ap o Johanan: Na-a, ma kre kowa! Kowa hi gar tchatcho, hoi tu pral o Jishmael penal.