15
I phagi hunte well
1 Un o baro Dewel penas ap mande: Ninna te wals o Mose un o Samuel glan mande tardo, kroms me kal menshenge miro dji gar pre. Trade len krik mandar, un muk len te djal! 2 Un te putchenn jon tutar: ‘Kai djas mer’, pen lenge:
O baro Dewel penell:
Ap koneste o merepen wella, ap koleste well lo.
Koon mulo dino wella i chareha, kowa well mulo dino.
Pral koneste i bok wella, kowa merella i bokatar.
Koon pandlo wella, kowa well pandlo.
3 Me, o baro Dewel, lom man glan, te anap star kope pharo koowa pral lende:
o chareha te wenn le mulo dino,
i djukle tserdenn len krik,
i tchirkle chan len,
un kowa hoi lendar pral atchell, chan i diwje vieche pre.
4 I tsele menshe ap i phub denn i wasta pral o shero khetne,
te dikenn jon kowa.
Koja hi koi phagi koleske, hoi ko baro rai Manasse an Jerusalem kras.
Leskro dad hi o Hiskija, ko baro rai pral Juda.
5 Koon krell peskro dji tuke pre, Jerusalem?
Kones khaiteh tu?
Un koon wella un putchella, har tuke djala?
6 Tu djal mandar krik, penell o baro Dewel,
un kamal mandar tchi buder djinell.
Doleske hadom me miro wast ap tute, te marap tut.
Me hom khino, te krap miro dji tuke pre.
7 An hako foro an o them Juda krom me i menshentsa jaake har jek,
kai witsrell o djob pral, te perell o phuss win.
Jaake tradom len kate te kote.
Un mire menshe mukan gar pengre tchilatche dromma.
Koi marom lengre tchawen, un mukom len tele te djal.
8 Koi hi budeder djuwja, kolengre romma meran, har barra pash o baro pani.
I daja shunan, kai meran lengre tchawe mashkral o diwes.
Koi was i bari traash un daar pral lende.
9 Koi djuwjat, kai efta tchawe his, lake atchas kek buder djido.
Lakro dji phagas.
Lakro kham djas tele mashkral ap o diwes.
Lakro sharepen un lakri bacht hi buder gar koi.
Un hoi kol menshendar pral atchas, dau me an i wasta kolendar, kai denn len mulo o chareha.
Kowa penell o baro Dewel.
O Jeremijeske hi ropaske
10 Me bibachtelo, hoske das miri dai mande o djipen?
Hakeno dikell tchilatches ap mande.
An o tselo them tchingrenn le ap mande.
Ninna te patsom kekestar lowe,
un kek patsas man lowe,
praassell man hakeno.
11 Baro Dewel, te mangom tutar gar latchepen lenge,
te mangom tutar gar, te less len win dran i tchilatche wasta
an lengre phare tsirja un an lengri daar,
palle mukess koi bibacht te well,
hoi kamenn jon ap mande te anell.
12 Kek nai phagell saster,
saster un lolo saster dran ko them, hoi kote tchiddo hi, kai norden hi!
13 [O baro Dewel penas:] Juda, me kamau te well tiro tselo brawlepen tuke tchoredo,
jaake plaissreh tu ko tchilatchepaske, hoi kral an tiro tselo them.
14 Un me kamau, te wess tu i budepaskro kolenge,
kai rikrenn tut tele an lengro them – i them, hoi tu gar prindjreh.
Miri choli chatchell har i jag, un well pral tute.
15 Baro Dewel, tu djineh halauter!
Ma biste man,
un ab ap miri rig!
De kolen lengro tchilatchepen pale, kai man palla lenna!
Rike tiri choli ap lende gar jaake rah pale,
te wap gar maredo!
Tu djineh, me hom tuke koi.
Doleske tchingrenn le ap mande.
16 Baro Dewel, tu rai pral o bolepen un i phub, me hom tiro.
Jaake was tiro lab miro chapen hako kopo, kai me kowa shunau.
Te shunau tiro lab,
giwell miro dji, un well pale sorelo.
17 Me nai hom gar wawar menshentsa bachteles khetne beshdo,
un sau lentsa,
tu tchiwal tiro wast ap mande, un hom kokres.
Tiri choli pral kal menshende was ninna an mande.
18 Hoske wenn mire duka gar sasto?
Hoske hi miro dukepen jaake djungelo, te well lo gar sasto?
Tu wal mange har i brunna,
kai an o nijale kek pani dren hi.
19 Doleske penell o baro Dewel:
Te rikreh tu tut ap mande,
rikrau me man ap tute,
un tu atcheh miro rakepaskro.
Te rakreh tu, hoi mishto hi,
un rakreh gar, hoi tchi-moldo hi,
hal tu miro mui.
Jon hunte wenn pash tute,
tu djas gar pash lende!
20 Me krau tut kal menshenge har i soreli massuria.
Ninna te djan le ap tute,
nai witsrenn le tut gar trujel.
Me, o baro Dewel, hom pash tute, te wap ap tiri rig,
un te lap tut win dran lengre wasta, –
21 awa, dran i wasta kolendar, kai tchilatcho ap tute hi,
un kai djan sorjah ap tute pre.