8
1 O baro Dewel penell: An ko tsiro wenn kol kokale kol bare rajendar dran o them Juda kote win lino, kai le paskedo hi, ninna kol kokale kol pralstunendar un rashajendar, kol kokale o Debleskre rakepangrendar, un kol kokale kol menshendar an Jerusalem. 2 Un kol kokale wenn koi trujel witsedo glan o kham un o tchon un i tsele bolepangre momlia, kolen kaman kol menshe, un mangan len an, un nashan lenge pal. Kolendar putchan jon un sharan len. Kol kokale wenn gar pre hadedo un wenn gar paskedo. Jon wenn ful i phubjake. 3 Un lauter kolla, kai pral atchan kal tchilatche menshendar, kai djiwenn kote, kai me len tradom, lenge wals o merepen feteder har o djipen. Kowa penell o baro Dewel, ko rai pral o bolepen un i phub.
I menshe nashenn an pengri bibacht
4 Ap mande penas lo: Pen ap lende: Kowa penell o baro Dewel:
Te perell jek, stell job sik pale pre.
Te nashrell pes jek, rissrell job sik pale trujel.
5 Hoske nashrenn pen kal menshe an o foro Jerusalem pale te pale,
un rissrenn gar trujel?
Jon atchenn pash kol chochene deblende,
un kamenn gar palpale pash mande te well.
6 Me dikau un shunau,
kai rakrenn jon gar o tchatchepen.
Koi hi kek, kai khaitell les hawo tchilatchepen job kras.
Kek putchella: Hoi krom me?
Hakeno nashella dureder ap peskro drom,
har i grai an o kurepen.
7 O storcho tel o bolepen djinell peskro tsiro,
un kol wawar tchirkle rikrenn o tsiro dren,
kai wenn le pale.
8 Har nai penenn tumer:
‘Mer ham gosewo.
Men hi o baro Debleskro lab pash mende.’
Chochepen hi kowa lauter,
hoi kol sikepangre dran kowa krenna.
9 Kol gosewe witsran o Debleskro lab pal pende.
Hawo goswepen atchell lenge?
O diwes well, kai well ladj un daar pral lende.
Jon wenn tapedo un pandles krik anlo.
10 Lengre djuwjen dau wawar murshende.
Un lengre kotja them dau kolende, kai tradan len krik.
Halauter, tikne un bare, chochenna,
te wenn le brawelo.
Ninna i Debleskre rakepangre un rashaja chochenn i menshen,
11 un krenn jaake, har te wans kol duka mire menshendar gar jaake pharo.
Jon penenna: Lauter hi mishto, lauter hi mishto,
ninna te hi tchi mishto.
12 Jon hunte ladjans koleske
hoi jon kran, koweha man choiran.
Kowa krenn le gar. Jon ladjenn gar.
Hoi ladj hi, djinenn le gar.
Doleske wenn jon maredo khetne kol wawarentsa.
Te wau me, un dau len i phagi, hunte perenn le,
penell o baro Dewel.
13 Te kamau pash mire menshende latchepen te hatsell,
hom har i hacho, kai kamell drake un faige dren te lell,
un kai hatsell kek drake un kek faige ap i ruka.
Ninna kol patria peran tele,
penell o baro Dewel.
Doleske dom kal menshen pre.
Wawar menshe lenn penge lengro them.
14 Hoske ham mer kai trujel beshdo? [putchenn i menshe dran Juda.]
Mer was khetne, te djas mer an kol sorele forja,
te was koi maredo!
Mer mukam o baro Debles, maro rajes.
Doleske kamell lo maro merepen,
un dell men sawo pani te pijell, hoi marell men.
15 Mer patsam, kai well lauter mishto.
Tchi was mishto!
Mer kamams, te well i tsiro, kai kowa, hoi an mende nasselo hi, sasto wals.
Kowa was gar. I daar was.
16 Kolla, kai kamenn te kurenn pen mentsa,
hi pash o foro Dan tardo.
Fun kotar shunah koi gole lengre grajendar.
O tselo them trissell koi goljatar hoi i graja denn.
Jon wenna un chan ko tselo them pre,
lauter, hoi ap ko them hi,
kol forja un lauter, hoi koi dren djiwella.
17 Me, o baro Dewel penau:
Me bitchrau tchilatche sapa pash tumende,
sawe, kai anenn o merepen.
Kolen nai rikrell kek pre.
Kolla dandrenn tumen.
O Jeremia rowell trul peskre menshende
18 Miro dji phagell.
Man hi ropaske.
Hoi nai krell man pale sorelo?
19 Dran o tselo them shunau me, har denn mire menshe gole.
Kamell o baro Dewel buder gar o Dewel an Zion te well?
Hi o fores Zion buder kek baro rai?
Hoske kran jon man jaake chojedo [penell o baro Dewel],
har mangan le pengre figuren un chochene deblen an,
kai kekeske ap i rig wenna?
20 O tsiro hi trujel,
kai o djob dren anlo well.
O nijal hi trujel,
un kek was, kai men dran i bibacht win las.
21 Mire menshe phagan khetne.
Doleske rowell miro dji.
Mange hi, har te merap,
un djinau gar, hoi te krap.
22 Hi an o them Gilead kek dukepaskro djet?
Hi kek dramaskro koi?
Hoske dell kek sastepen mire menshenge?
23 Ach, te wals man doha pani an miro shero,
un mire jaka te wans har i quella, te rowap nai ap o diwes un ap i rati,
pral kolende mire menshendar, kai wan mulo dino!