2
JOI
1 I tikni bluma hom me, har hi le tardo ap o telstuno them Sharon,
i lilja an i tala.
JOB
2 Awa, har i lilja – i lilja mank i subjengre burra,
jaake hi miri pirni mank i tchende.
JOI
3 Har i phabjengro ruk mank i diwje ruka an o weesh,
jaake hi miro pirno mank i terne murshende.
Bachteles hom beshdo an leskro shatto,
denn man newi soor phabjentsa!
Miro kamlepen tuke krell man nasselo.
6 Leskro serwo wast hi tel miro shero tchiddo,
un leskro tchatcho wast taprell man trujel.
JOB
7 Tumer tcha dran o foro Jerusalem,
i wesheskre busja un i tserfea shunenn, har mangau tumen:
Mukenn men kokres jaake rah har khetne ham, bis te stah pre.
I duiti gili
JOI
8 Miro pirno dell gole pal mande!
Dik, oke well lo,
un stell pral i bare un tikne berge.
9 Miro pirno hi har i terni wesheskri busni
har i terno tserfo.
Kate hi lo! Pal maro kheer!
Un dikell an i wochni,
mank i kashta dren.
10 Miro pirno dell pal mande gole:
JOB
Ste pre, miri pirni, miri shukester, un ab!
11 Dik, o wend hi buder gar,
un o brishin djas peske.
12 I blume djan pre an o them,
O tsiro o gipaske hi koi,
un i tchirkle mukenn pen te shunell an maro them.
13 I faige wenn baro ap o ruk,
un i drakengre ruka sungenna jaake gudlo.
Ste pre, miri pirni, miri shukester, un ab mantsa!
14 Miri tauba, ma khate tut glan mande,
har i tchirklo khatrell pes mank i bare barra,
an o khatepen ap i berge!
Muk man tut te dikell,
muk man tut te shunell!
Gudlo hi tiro rakepen,
un kamles dikeh tu win.
JOI
15 Taprenn menge i diwje djukle,
kol tikne diwje djukle,
hoi krenn o moljengro them paash!
Mare drakengre ruka hidjrenn knospe.
16 Miro pirno hi miro,
un me hom leskri.
Job hatsell peskri bacht mank i lilja.
17 O diwes te well shila,
un o kham djal tele,
ab pash mande, miro pirno!
Ab sik har i wesheskri busni,
har i terno tserfo ap i barrengre berge!