23
O Joash well baro rai pral Juda
1 An o 7. (eftato) bersh las o Jojada peskri tseli soor khetne, un kras pes khetne pantch pralstune lurdentsa: o Asarja, koleskro dad o Jeroham his, o Jishmael, koleskro dad o Johanan his, o Asarja, koleskro dad o Obed his, o Maaseja, koleskro dad o Adaja his un Elishafat, koleskro dad o Sichri his. 2 Kolla djan an o tselo them Juda trujel, un lan i Levitarjen dran i tsele forja an o them Juda khetne, ninna i pralstunen pral i bare familje an o them Israel, te djan le halauter an o foro Jerusalem. 3 Un har jon halauter khetne his an o Debleskro baro kheer, penas o Jojada ap lende: “Dikenn, kate hi o rajeskro tchawo. Job te well o baro rai, jaake har penas o baro Dewel, te wenn i bare raja o Davideskre tchawendar.” Un kolla lauter, kai kote khetne his, kran ko terno rajeha win, te well lo lengro rai. 4 Un o Jojada penas lenge: Kawa hi ko koowa, hoi tumer hunte krenn: “I triinto kotar tumendar, kol rashajendar un Levitarja, kai ap o Debleskro diwes ap i budi wenn, hunte denn garda ap i bare wudja. 5 I wawar triinto kotar dell garda an o baro rajeskro kheer, un pale i wawar triinto kotar dell garda ap o wudar, hoi kharell Jesod. I tsele wawar menshe hunte atchenn ap i glanstune platse an o baro Debleskro kheer! 6 Kek te djal an o baro Debleskro kheer dren! Kokres i rashaja un kol Levitarja, kai ap ko diwes hunte budrenn, kolla nai djan dren. Jon hi o Debleske koi. Un i tsele wawar menshe hunte krenn, hoi o Dewel penas. 7 I Levitarja hunte wenn tardo trul o baro rajeste, hakeno peskro chareha an o wast. Un jon hunte djan leha, te djal lo win un te djal lo dren. Koon phagell an o baro Debleskro kheer dren, kowa hunte well maredo.”
8 Un i Levitarja un i tsele menshe dran Juda kran halauter, har les o rashai Jojada ap lende penas. Un hakeno las peskre murshen pash peste, kolen kai ap o Debleskro diwes ap pengri budi wan, un kolen, kolengri budi kerdi his. Ninna kolen mukas o rashai Jojada gar khere te djal. 9 O rashai Jojada das kol pralstune lurden kol witsepaskre tchurja un kol shilte, bare un tikne un wawar karmangre, hoi o baro rajes, o Davides his, un an o baro Debleskro kheer pre-hadedo wan. 10 Un i mursha his tardo glan o Debleskro kheer i tchatchi rigjatar bis ap i serwi rig. Jaake his le tardo glan o sasterni chatchepaskria, un trul o rajeste trujel. Un hakenes his peskro witsepaskro tchuri an o wast. 11 Palle mukas o Jojada o baro rajeskro tchawes win te well, te nai dikell les hakeno, un tchiwas leske koi rajeskri stadi ap o shero, un das les ko liil, kai tchinlo hi, hoi te krell lo. Palle tchoran o Jojada un leskre mursh tchawe djet pral leskro shero, te well lo baro rai, un dan gole: O baro rai te djiwella!
I Atalja well maredo un i wawar debla wenn paash kerdo
12 Har shunas i Atalja i gole kol menshendar, kai wan pashel naashedo un dan gole i bachtjatar, djas li an o baro Debleskro kheer, kai kol menshe khetne wan. 13 Un dikas o newo baro rajes ap peskri platsa an o wudar tardo. Un trul leste his i pralstune lurde un i phurdepangre tarde. Un i tsele menshe ko themestar his bachtelo, un i phurdepangre phurdan an pengre bashepangre. Ninna i gipangre his koi, un o bashepah ap pengre dorjengre bashepangre giwan le glan, un i menshe giwan lentsa. I Atalja tserdas peskre ripja an kotja un das gole: “Phukepen, Phukepen!”
14 Un o rashai, o Jojada, kamas gar, te well li maredo an o baro Debleskro kheer. Doleske penas lo kol pralstune lurdenge: “Anenn lat win! Un koon lake pal nashella, koles denn mulo o chareha!”
15 Un jon tapran lat un anan lat pash o baro rajeskro kheer glan ko wudar, hoi kharell Grajengro Wudar. Un kote was li maredo.
16 Un o Jojada mukas o baro rajes un i menshen dran Juda i sowel te dell o baro Debleske, te djiwenn le jaake, har o baro Dewel peskre menshendar kamella.
17 Palle djan i tsele menshe dran o them Juda an o kheer ko deblestar Baal, un kran o kheer paash. Un kol chatchepangre, kai viechen un wawar koowa leske chatchedo wan, phagan le tele, ninna kol figure, hoi an-mangedo wan. Un glan kol chatchepangre maran le o Mattan, ko rashajes o deblestar Baal.
18 Un o Jojada das kol rashajen un Levitarjen koi budi, hoi hunte well kerdo an o baro Debleskro kheer. Jon hunte krenn pengri budi jaake har o David penas, un hunte chatchrenn viechen o baro Debleske jaake har tchinlo hi an o Moseskre lila. Ninna hunte sharenn le o baro Debles giljentsa un i bachtelo djijeha. Jaake penas kowa o David. 19 Un o Jojada bitchras klisten glan i wudja o baro Debleskro kherestar, te denn le jak, te nai djas kek dren, kai kras pes ap tchomone pale-tchiddo.
20 Palle las o Jojada i pralstune lurden peha, ninna i brawele un an-dikle murshen un i tsele menshe, kai kote khetne wan. Un jon anan o baro rajes tele dran o baro Debleskro kheer, un wan pash ko pralstuno wudar, djan dren un dureder an o baro rajeskro kheer. Kote beshas lo pes ap peskri rajeskri beshepaskri. 21 Un i tsele menshe dran Juda his bachtelo. Un an o foro das kek kurepen, har maran le i Atalja o chareha.