15
O Debleskro rakepaskro Asarja un leskro rakepen
1 Un o Debleskro ducho was pral o Asarja, koleskro dad o Oded his. 2 Un job djas win, te rakrell lo o baro rajeha, o Asa, un penas leske: “Shunenn man, Asa un tumer menshe dran o tselo them Juda un Benjamin! O baro Dewel hi tumentsa, jaake rah har tumer tumen ap leste rikrenn. Te rodenn tumer les, mukell job pes te hatsell tumendar. Te mukenn les, mukell job tumen. 3 Bud bersha prindjran i Israelitarja o tchatcho Debles gar. Len his kek rashai, kai sikras lende o Debleskro drom, un kek Debleskro lab, hoi penas lenge, har te djiwenn le. 4 Un har lenge djungeles djas, rissran le trujel pash o baro Debleste, kai o Israeleskro Dewel hi, un rodan les. Un job mukas pes lendar te hatsell. 5 An kol tsirja djiwan i menshe gar an o latchepen khetne an kal themma. Jaake hunte darell hakeno peskro djipaske, kai djas ap o drom. 6 O Dewel mukas traash un hakelai bibacht pral lende te well. Jaake kuras pes jek them o wawar themeha un jek foro o wawar foreha. 7 Tumer, awenn sorelo, ma mukenn tumen daar te krell! O baro Dewel plaissrell tumen koleske, hoi krenn!”
8 Un har o Asa kau rakepen shunas, hoi o Debleskro rakepaskro, o Asarjaa, glan-wi penas, was les soor. Un job mukas dran ko tselo them Juda un Benjamin un dran kol forja, hoi job dren las ap i berge Efrajim kol djungele figuren krik te anell, hoi i menshe an-mangan. Un job mukas o sonakaskro bob newes te krell, kai sungepaskro koowa o baro Debleske chatchedo well. Kowa his tardo glan i bari glanstuni isema o baro Debleskro kherestar. 9 Un job mukas i tsele menshen khetne te well dran o them Juda un Benjamin un halauter dran i khera Efrajim, Manasse un Simeon, kai pash lende djiwan. [His jaake, kai bud menshe dran Israel pash leste an o them Juda wan, har dikan le, te his o baro Dewel, kai leskro Dewel hi, ap leskri rig.]
10 Un jon wan khetne an o foro Jerusalem an o triinto tchon an o 15. (deesh-te-pantchto) bersh, har o Asa o baro rai his. 11 Un anan ap kau diwes o baro Debleske kolestar, hoi jon pentsa anan, har wan le dran o kurepen pale: 700 (efta sheel) grumja un 7.000 (efta serja) bakre. 12 Un jon dan pengro lab, te rikrenn le pen ap kowa, hoi o baro Dewel lengre phurentsa win kras, te rodenn le les o tselo djijeha un i tseli sorjah. 13 Un hakeno, kai kamals o baro Debles, kai o Israeleskro Dewel hi, gar te rodell, hunte wals maredo, o tikno un o baro, mursh un djuwel. 14 Jon dan pen sowel glan o baro Debleste i bari goljah un gipah un bashepah ap i phurdepangreb. 15 Un i tsele menshe dran Juda his bachtelo pral koi sowel, hoi dan le pengro tselo djijeha. Un jon rodan o Debles pengri tseli sorjah. Un job mukas pes lendar te hatsell. Un o baro Dewel mukas len an o latchepen te djiwell i thementsa trul lende.
16 Un ninna kras o baro rai Asa, te his leskri daic, i Maacha, buder gar i rani. Kowa kras lo doleske, kai mukas li i djungeli figura te krell, hoi i debletsa Ashera sikras. Un o Asa das lakri djungeli figura an kotja un chatchras lat pash o pani Kidron. 17 Ninna te atchenn kol bud mulne platse tardo an Israel, rikras pes o Asa ap o baro Debleste peskro tselo djijeha, jaake rah har job djiwas. 18 Un ko rup un sonakai un ko wawar koowa, hoi leskro dad o baro Debleske anas, un hoi job o baro Debleske anas, kowa anas lo halauter an o baro Debleskro kheer. 19 Un kek kurepen his an o them bis an o 35. (trijanda-te-pantchto) bersh, har o Asa o baro rai his.