6
O mochton, kai o Debleskre laba dren hi, well pale an o them Israel
1 Un o mochton o baro Deblestar his efta tchonna an o them Filistia. 2 Un i Filistarja dan pengre rashajen un durkepangren gole, un putchan lendar: “Hoi kras mer ko mochtoneha o baro Deblestar? Har bitchras les pale kote kai lo was?”
3 Un jon penan ap lende: “Te bitchrenn tumer o mochton o Israeleskro Deblestar pale, palle bitchrenn tchomone peha. Denn les tchomone, te well lauter pale mishto mank tumende un leste! Palle wenn tumer sasto. Jaake djinenn tumer ninna, hoske leskro wast tumendar gar krik djas.”
4-5 Un jon putchan: “Hoi hi kowa hoi mer hunte das leste, te well lauter pale mishto?”
Jon penan: “Pantch raja hi an o them Filistia. Len un tumen hi o emligo nasslepen. Doleske krenn pantch sonakangre figure, hoi win dikenn har o dukepen, hoi ap tumaro mass was, ninna pantch sonakangre figure, hoi win dikenn har kol kermusea, kai chan tumaro them pre. Denn kolen o Israeleskro Debleste. Jaake sikrenn tumer leste, te djinenn, har baro job hi. Nai well, te lell lo peskro wast tumendar pale, ninna tumare deblendar un tumaro themestar.
6 Ma pandenn tumare djia, te wenn le har bar, har kran kol Egiptarja un lengro baro rai, o Farao! Hi kowa gar jaake? Har sikras o baro Dewel peskri soor ap lende, hunte mukan le i Israelitarjen te djal.
7 Jaake krenn i newo wurdin! Un lenn dui grumja, kai daja hi, un kolengre terne ap lende pijenn. Kol grumja hunte tserdan gomme tchi. Pandenn len glan ko wurdin! Lengre terne mukenn khere! 8 Lenn o baro Debleskro mochton un hadenn les ap ko wurdin! Un ko sonakaskro koowa, hoi leste denn, te well lauter pale mishto mank leste un tumende, kowa tchiwenn an i tikno mochton, un tchiwenn lat koi pashel ap o wurdin. Un palle mukenn i grumjen te djal, kai kamenn le! 9 Palle sikrell pes, hawi rigjatar koi bari bibacht pral mende was: Te djan le pre an lengro them, ap o drom an Bet-Shemesh, palle his o baro Dewel, kai sawi bari bibacht ap mende anas. Te djan le ap i wawar rig, palle haiwah, te his gar leskro wast, hoi men das, un kau tselo koowa tchitcheske ap mende was, un kek bitchras les.”
10 Un kol mursha kran kowa jaake. Jon lan dui grumja, kolen terne hi, kai gomme ap lende pijenn. Un pandan len glan o wurdin. Un i grumjengre ternen pandan le khere dren. 11 Un ko mochton, kai o Debleskre deesh laba dren hi, tchiwan le ap ko wurdin. Un koi pashel tchiwan le ko tikno mochton, kai kol sonakangre kermuse dren hi un kol figure, hoi wi-dikenn har o dukepen. 12 Un kol grumja djan ap ko drom an Bet-Shemesh, un atchan ap ko drom, un djan gar tchatches witar gar serwes. Har djan le jaake, dan le gole, un mukan gar tele te denn le gole. Un kol raja pral i Filistarja djan pal lende, bis te wan le an o them, kai Bet-Shemesh tchiddo hi.
13 Un i menshe dran Bet-Shemesh lan an ko tsiro o djob dren an o telstuno them. Un har le pre dikan, un o mochton dikan, kai o Debleskre deesh laba dren hi, wan le bachteles. 14-15 Un o wurdin was ap i kotar phub, hoi his i murshes, kai kharas Josua un his dran Bet-Shemesh. Kote atchas o wurdin tardo. Kote his i baro bar tchiddo. Un i Levitarja lan ko mochton tele, kai o Debleskre deesh laba dren hi, ninna ko tikno mochton, hoi koi pashel tardo hi, an koja ko sonakaskro koowa his. Un tchiwan lauter ap ko baro bar. Un i menshe dan ko wurdineskro kasht tiknes, un maran kol grumjen un chatchran len o baro Debleske. Ap ko diwes maran kol mursha dran Bet-Shemesh kote gomme budeder viechen o baro Debleske. His vieche pashel, kai wan tseles chatchedo, un wawar, kai chan le khetne glan leste. 16 Un har kol pantch raja pral i Filistarja kowa lauter dikan, djan le ko emligo diwes pale an Ekron.
17 Kowa hi, hoi i Filistarja o baro Debleste dan, te well lauter pale mishto mank leste un lende: pantch sonakangre figure, hoi win dikan har o dukepen ap lengro mass: Jek figura hako foreske: Ashdod, Gaza, Ashkelon, Gat un Ekron. 18 Ninna dan le sonakangre kermuse, jek kermuso hako foreske, pral koleste i pantch Filistarja i raja his: gar kokres i sorele forjenge, na-a ninna hako gab. Ko baro bar, kai tchiwan le o mochton pre, kai o Debleskre deesh laba dren hi, ko bar hi gomme kau diwes tchiddo ap ko kotar phub, hoi hi ko murshes Josua dran Bet-Shemesh.
19 An o foro Bet-Shemesh his menshe, kai dikan an o mochton, kai o Debleskre deesh laba dren hi. Un o baro Dewel maras lendar efta-deesh (70) murshen. Un i tsele menshe rowan, te das len o baro Dewel jaake phares. 20 Un i mursha an Bet-Shemesh penan: “Koon nai atchell djido glan o baro Debleste, kai jaake hi har kek wawar? Pash koneste nai bitchrah ko mochton? Kate nai atchell lo gar.” 21 Un jon bitchran murshen pash kol menshende an o foro Kirjat-Jearim un penan lenge: “I Filistarja anan o mochton pale, kai o baro Debleskre deesh laba dren hi. Awenn tumer kai tele, un lenn les pre pash tumende!”