39
I rashajengre ripja
1 Un jon kran shukar rashajengre ripja dran kutch bakrengro bal, hoi blaueto, lolo un lolo har jag kerdo was, te riwell len o Aron pash peskri budi an o Debleskro kheer. Jon kran kal ripja jaake har o baro Dewel o Moseske penas, te krenn le len.
2 O rashajeskri damdira kran le dran latcho sorelo laintikro than, kai sonakai dren sido was, ninna kutch bakrengro bal, hoi blaueto, lolo un lolo har jag kerdo was. 3 Jon dan sonakangre kotja khetne, te wenn le sanoa, un tchinan len an tikne thaba, te nai siwenn le len an o latcho laintikro than un mank o bakrengro bal, hoi blaueto, lolo un lolo har jag kerdo was. Kowa was an latcho wastengri budi kerdo. 4 Palle lan le dui kotja than un siwan len ap i damdira kote, kai i phika hi. Un i damdira was khetne pandlo. 5 Ko pereskro pandepen was jaake kerdo har i damdira: dran latcho sorelo laintikro than, kai sonakai dren sido was, ninna kutch bakrengro bal, hoi blaueto, lolo un lolo har jag kerdo was. I damdira un lakro pandepen his dran jek kotar than. Jon kran kowa jaake, har o baro Dewel o Moseske penas.
6 Un jon lan dui kutch barra, hoi kharenna Onyx, un tchiwan len an sonakangre gustria. Un kolla mursha, kai haiwenn mishto laba an barra te tchinell, tchinan i laba kol Israeleskre tchawendar an i barra dren. 7 Un jon kran kol barra ap i damdira pre, kote, kai i phika hi, te bistrell o baro Dewel gar i Israelitarja. Jon kran kowa jaake har o baro Dewel o Moseske penas.
8 Un jon kran i shukar betcheskri possita jaake har i damdira: dran latcho sorelo laintikro than, kai sonakangre thaba dren sido wan, ninna kutch bakrengro bal, hoi blaueto, lolo un lolo har jag kerdo was. 9 Koi possita his jaake baro har buchlo un was dui kope khetne lino. Haki rig his biish-te-pantch centimetarja baro. 10 Un jon kran deesh-te-dui kutch barra ap koi possita pre: hako kopo triin barra tel i wawar: pralstunes kol barra, hoi kharenna Rubin, Topas un Smaragdo. 11 Tel kolende kol barra, hoi kharenna Karfunkel, Safiro, un Diamanto. 12 Tel kolende kol barra, hoi kharenna Hiazint, Achat, un Ametist. 13 Telstunes kol barra, hoi kharenna: Krisolit, Onyx un Jaspis. Hako bar his tchiddo an i sonakaskri gustri. 14 An kol barra wan i laba dre-tchinlo kol deesh-te-dui Israeleskre tchawendar, kolendar i deesh-te-dui bare familje wenn. Ap hako bar his jek lab.
15 Ap i betcheskri possita kran le tikne dorja dran latcho sonakai, hoi khetne lino his har i lengste balla i djuwjatar. 16 Ninna kran le dui tikne sonakangre gustria un dui wawar sonakangre gustria. Kolen siwan le serwes un tchatches ap i pralstuni rig ap i possita. 17 Un tchiwan kol dui sonakangre dorja jek rigjah an kol dui sonakangre gustria ap i possita. 18 Koi wawar rig tchiwan le an kol tikne sonakangre gustria, hoi ap kol kotja hi, hoi glanstunes ap i damdira sido hi, kote, kai i phika hi.
19 Palle kran le dui wawar sonakangre gustria un siwan len dren an i possita ap i telstuni rig, kote, kai i possita ap i damdira sido hi. 20 Un palle kran le dui wawar sonakangre gustria un tchiwan len ap kol dui kotja, hoi kote ap i damdira sido hi, kai i phika hi. Un siwan len ap i glanstuni rig kote, kai kol kotja khetne lino hi, pral o pereskro pandepen, hoi rikrell i damdira khetne.
21 Palle tchiwan le i dori dran blaueto kutch bakrengro bal an kol dui gustria, hoi ap o betcheskri possita hi, un pandan lat jaake ap i gustria ap i damdira, te hi li soreles rikedo pral o pereskro pandepen, hoi rikrell i damdira khetne. Kowa kran le jaake har o baro Dewel o Moseske penas.
22 Koi pashel kran le i baja, hoi riwell o rashai tel i damdira. Un koi tseli baja kran le dran blaueto kutch bakrengro bal. 23 Pral mukan le lat pre, te well nai o shero win. Trul i meen siwan le lat soreles jaake har pash i ledertikri baja, te nai djal li gar paash.
24 Telstunes trul i tseli baja kran le tikne phabja dran latche sorele laintikre thaba un kutch bakrengro bal, hoi blaueto, lolo un lolo har jag kerdo was. 25 Ninna kran le tikne bashepangre dran latcho sonakai un tchiwan len jaake mank i phabja, 26 te well jek phabi, palle jek bashepaskri, palle jek phabi, un jaake trul i tseli baja. Kai baja riwell o rashai te djal lo an o Debleskro kheer. Lauter kran le jaake har o baro Dewel o Moseske penas.
27-28 O Aroneske un leskre tchawenge kran le ninna i gada, o shereskro pandepen, i rashajengre stadja, un i telstune cholopja dran latcho sorelo laintikro than. 29 Un o Aroneske kran le i pereskro pandepen an shukar wastengri budi dran latcho sorelo laintikro than, kai ninna kutch bakrengro bal dren hi, hoi blaueto, lolo un lolo har jag kerdo was. Lauter kran le jaake har o baro Dewel o Moseske penas.
30-31 An i tikno kotar latcho sonakai tchinan le kol laba: “Kowa hi o baro Debleske”, un pandan ko kotar sonakai ap i dori dran blaueto kutch bakrengro bal glan ap o Aroneskro shereskro pandepen. Kowa was kerdo jaake har o baro Dewel o Moseske penas.
I tseli budi hi kerdo
32 Jaake was koi tseli budi kerdo: kol tsele kotja o Debleskro plachteno khereske, un lauter, hoi koi pashel hi. I Israelitarja kran lauter jaake, har o baro Dewel o Moseske penas. 33 Un jon anan lauter pash o Moseste:
kol plachte o Debleskro khereske un leskre tsele koola: rikepangre, tchinle kashta, pandepangre kashta, un pesse kashta ap herja;
34 kol plachte, hoi tchakrenn o kheer: ko kotar dran bakrengri ledertikre plachte, hoi le lolo kran un ko wawar kotar dran latche ledertikre plachte. Ninna anan le ko kutch kotar than o wudareske;
35 ko mochton, kai o Debleskre deesh laba dren hi, un leskre hidjepaskre kashta, un o pralstuno kotar, hoi tchakrell o mochton un hoi sikrella, kai o Dewel peskre menshenge latcho hi;
36 koi chapaskri un lauter, hoi pashel hi, ninna i Debleskre mare;
37 koi momelengri dran latcho sonakai un lakre momlia un lauter, hoi pashel hi, un lakro djet;
38 ko sonakaskro bob, kai o sungepaskro koowa chatchedo wella;
ko makepaskro djet;
ko sungepaskro koowa, hoi chatchedo well;
koi bari plachta glan o khereskro wudar;
39 koi sasterni chatchepaskrib, kai vieche chatchedo wenna o Debleske, koi sasterni netsa, lakre hidjepaskre kashta un i tsele koola, hoi koi pashel hi;
ko thopaskro tcharo un leskre herja;
40 kolla laintikre kotja un pesse kashta ap herja, hoi trul i glanstuni platsa hi;
un koi plachta o wudareske ap i glanstuni platsa;
kol tikne sasterne kotja, hoi denn le an i phub, te rikrenn le o plachteno kheer soreles, un kol shelle, hoi hi kote an-pandlo; ninna kol tsele koola, hoi kolen hunte well, kai budrenn an o Debleskro plachteno kheer.
41 Ninna anan le i rashajengre kutch ripja, hoi o Aron un leskre tchawe an-riwenn, te budrenn le an o Debleskro kheer.