25
O Debleskro plachteno kheer
1 Un o baro Dewel rakras o Moseha un penas: 2 Pen ap i Israelitarja: Hakeno, hoi les an o dji chatchella, te dell lo man pestar tchomone, kowa anell les pash tumende.
3 Kawa hi ko koowa, hoi jon tumenge anenna: Sonakai, rup, un lolo sastera, 4 ninna kutch bakrengro bal, hoi blaueto, lolo un lolo har jag kerdo was, latcho laintikro than un busjengre balla. 5 Bakreskri ledertikre plachte, hoi lolo kerdo wan, wawar latche ledertikre plachte un kasht i rukestar, hoi kharella Akatsia, 6 momelengro djet, kutch sungepaskro koowa, hoi well chatchedo, ninna kutch sungepaskro koowa, hoi well an o makepaskro djet tchiddo, te nai makenn le jekes dren. 7 Lenn lendar ninna kol kutch barra, hoi kharenna Onyx un wawar kutch barra, te wenn le ap o rashajeskri damdira un ap o betcheskri possita sido.
8 Kamau lendar, te krenn le mange i kheer, te djiwap nai mashkral lende. 9 Jaake har me les tut kanna sikrau, jaake krenn tumer o kheer, ninna ko tselo koowa, koleha budrenn le an miro kheer. Krenn lauter jaake, har me les tut sikrau.
O sonakaskro mochtonb
10 Kre i mochtonc dran o kasht ko rukestar, hoi kharella Akatsia, 125 (sheel-te-biish-te-pantch) centimetarja lengsto, 75 (efta-deesh-te-pantch) centimetarja buchlo un 75 (efta-deesh-te-pantch) centimetarja pral. 11 Pral o kasht, dren un win, tchip latcho sonakai! Un pral trul o tselo mochton tchip i sonakaskro pandepend!
12 Kre ninna star sonakangre gustria! Un kre len ap o mochton, ap leskre star herja, dui ap kai jek rig un dui ap i wawar rig! 13 Palle tchin lengste kashta dran akatstikro kasht un tchip sonakai trul lende! 14 Kol kashta tchip an kol gustria, hoi ap o mochton hi, jaake te nai hidjrenn le ko mochton trujel. 15 Kol kashta hunte atchenn an kol gustria un kek lell len win. 16 An ko mochton tchip kol dui barra kol deesh labentsa, hoi me tut dau.
17 Kre i pralstuno kotare dran latcho sonakai, hoi tchiweh ap o mochton. Ko pralstuno kotar well 125 (sheel-biish-te-pantch) centimetarja lengsto un 75 (efta-deesh-te-pantch) centimetarja buchlo.f 18-19 Kre ninna dui bolepangreg, hakeno dran jek kotar sonakai. Un tchip ko jek glan ap o pralstuno kotar un ko wawar palla ap o pralstuno kotar! 20 Jon hadenn pengre mussja pre, jaake te tchakrenn le o pralstuno kotar. Un lengre shere dikenn pen an. Un lengre jaka dikenn tele ap o pralstuno kotar.
21 Tchip o pralstuno kotar pral ap o mochton. Un an o mochton tchip i dui barra kol deesh labentsa, hoi me tut dau.
22 Kote kamau pash tute te well. Mashkral kol dui bolepangre, hoi ap o mochton hi, kai i deesh laba dren hi, kotar rakrau tuha un penau tuke lauter, hoi i Israelitarja hunte krenn.
O Debleskri chapaskri
23 Kre ninna i chapaskri dran o kasht ko rukestar, hoi kharella Akatsia, jek metari lengsto, jek paash metari buchlo, un 75 (efta-deesh-te-pantch) centimetarja pral. 24 Tchip trul i tseli chapaskri latcho sonakai! Un pral trul i tseli chapaskri tchip i sonakaskro pandepenh! 25 Tchip ninna i tikno kasht trul i chapaskri, hoi jek wast buchlo hi. Un trul kau kasht well ninna i sonakaskro pandepen. 26-27 Kre star sonakangre gustria! Un tchip jek gustri ap haki heri tel ko kasht, hoi trul i chapaskri djal, jaake te nai tchiwenn le lengste kashta dren, kolentsa nai hidjrenn le koi chapaskri. 28 Kol hidjepaskre kashta kress tu dran o kasht ko rukestar, hoi kharella Akatsia. Un makess sonakai trul lende!
29 Dran latcho sonakai kress tu ninna kol tchare un khore, an kolende i mool o Debleske tchoredo well.
30 Ap i chapaskri wenn hako tsiro i Debleskre mare tchiddo, te dikap len.
I momelengri
31 Un tu kress i momelengrii dran jek kotar latcho sonakai. Lakre tsele kotja, o piro un o mashkralstuno kotar, ninna i tchare un i blume, hoi koi pre hi, lauter well kerdo dran jek kotar sonakai. Hi sawe blume koi pre, hoi hi pandlo un wawar, hoi hi pre. 32 Shob mussja djan latar win: Triin djan ap jek rig win, un triin djan ap i wawar rig win. 33 Ap haki mussi hi triin tchare, hoi dikenna win har i blume ko rukestar, hoi kharella mandeltikro ruk. Hi sawe blume koi pre, hoi hi pandlo un sawe, hoi hi pre. Jaake well kowa ap haki mussi kol shob mussjendar. 34 Dran o mashkralstuno kotar wenn star tchare win, hoi win dikenna har mandeltikre blume. Ap kolende hi blume, hoi hi pandlo un ninna sawe, hoi hi pre. 35 Triin blume, hoi pandlo hi, hi kote, kai i mussja win wenna, hako kopo jek bluma tel dui mussja. 36 Koi tseli momelengri peskre mussjentsa un blume well kerdo dran jek kotar latcho sonakai.
37 Kre ninna efta momlia un tchip len pral ap i momelengri jaake, te dikenn le glan. 38 Kre ninna tchare, kai i momelengri tchik dren wella, un tchinepangrej, kolentsa i dorja an i momlia tele tchinlo wenna. Kolla lauter wenn dran o latcho sonakai kerdo. 39 Tut hunte well 35 (trijanda-te-pantch) kilogramme latcho sonakai, te kress kai momelengri peskre tsele koola. 40 Un tu kress lat jaake, har kowa tuke ap i berga sikedo was.