18
O Jetro well pash o Mose
1 O rashai an o them Midian, – leskro lab his Jetro, his o Moseskri romjakro dad. Job shunas kawa lauter, hoi o baro Dewel ap i tsele Israelitarja un ap o Moseste kras, te las lo len dran o them Egiptia win. 2 Pash leste djiwas o Moseskri romni, i Zippora. Kolat bitchras o Mose pale pash lakro dadeste, har djas lo pash o Farao. Kanna kras pes o Jetro ap o drom, las peskri tchat Zippora peha, 3 lakre dui mursh tchawentsa. Ko jek kharas Gershon. Har kowa boldo was, penas o Mose: “Me wom i wi-themari an o wi-them.” Doleske kharas lo les Gershona. 4 Ko wawar kharas Elijeserb. Har kawa boldo was, penas o Mose: “O Dewel miro dadestar was ap miri rig. Job las man win dran o wast o Faraestar, kai kamas man mulo te dell.”
5 Kanna was o Jetro o Moseskre tchawentsa un leskri romni an o mulo tato them pash i Debleskri berga, kai i Israelitarja beshdo hi. 6 Un job mukas o Moseske te penell: “Me, o Jetro, tiri romjakro dad, wau pash tute. Un tiri romni un tire tchawe hi pash mande.”
7 Kote djas o Mose win pash leste, djas ap i tchanga glan leste un tchumras les. Un jon putchan jek o wawarestar, har lenge djala. 8 Un o Mose penas peskri romjakro dad lauter, hoi o baro Dewel ap o Faraeste un ap i tsele Egiptarja kras, har las lo i Israelitarja win. Ninna penas lo leske, har phares his ap o drom un har o baro Dewel pale te pale ap lengri rig was.
9 Kote was o Jetro bachtelo pral ko tselo latchepen, hoi o baro Dewel ap i Israelitarja kras, te las lo len dran o wast i Egiptarendar win. 10 Un o Jetro penas: “Me sharau o baro Debles, kai las tumen win dran o wast i Egiptarendar un dran o wast o Faraestar. 11 Kanna haiwom, te hi o baro Dewel bareder har hako wawar dewel. Job las i Israelitarja win dran o wast i Egiptarendar, kai kran pen bares pral lende.”
12 Un o Jetro las i viecho, hoi job o Debleske maras un tseles chatchras, un ninna wawar vieche, hoi job maras, te chan le len khetne glan o Debleste. Un o Aron un i tsele phureder dran Israel wan un chan khetne o Moseskri romjakro dadeha kote, kai jon o Debles an-mangan.
O Mose tchiwell tchatchepangre murshen pral i Israelitarja
13 O wawar diwes beshas pes o Mose tele, te rakrell lo o tchatchepen pral i Israelitarja win. Un o tselo diwes his i menshe kote trul leste tardo. 14 Har o Moseskri romjakro dad kowa dikas, hoi o Mose i tsele menshenge kras, penas job: “Hoi hi kawa, hoi tu kate kreh? Hoske hal tu kokres o tchatchepaskro rai kol bud menshenge? Un i tsele menshe hunte wenn pash tute tardo o tselo diwes!”
15 Un o Mose penas ap leste: “I menshe wenn pash mande, te nai putchenn le o Deblestar, hoi job lendar kamella. 16 Te hi len tchingepen mashkral pende pral i koowa, palle wenn jon pash mande. Un me penau lenge, hoi te krenn le, jaake har o Dewel lendar kamella un lenge penell.”
17 Kote penas leskri romjakro dad: “Kawa, hoi tu kate kreh, hi gar mishto. 18 Tu mareh tut tele un kol tsele menshen, kai trul tute hi. Kai budi hi jaake baro, te nai krell lat kek kokres. 19 Shun ap mande: Me kamau tuke te penell, hoi te kress. Un tiro Dewel well ninna tuha. Ab tu lenge glan o Debleste un mang lestar, hoi len hunte well. 20 Un sike tu len, hoi o Dewel kamella un lenge penella, te djan le ap leskro drom un krenn, hoi job lendar kamella.
21 Tu, rode tuke dran i tsele menshende tchatche murshen win, hoi ap o Debleste shunenna, sawe mursha, hoi pengro lab rikrenna, un kekes i lowenge chochenna! Un kolen tchip pral i Israelitarja! Kre pralstunen lendar pral i serja, wawaren pral i sheel, un pale pral i paash-sheel un pral deesh. 22 Kolla wenn i tchatchepangre mursha, kai rakrenn hako tsiro o tchatchepen pral i menshende win. Pral hako tikno tchingepen rakrenn jon kokres o tchatchepen win. Un o baro koowa anenn le glan tute. Jaake well tuke gar jaake phares, un jon hidjrenna tuha khetne.
23 Te kreh tu kowa jaake, palle hi tuke koi budi gar jaake pharo, hoi o Dewel tut das. Un i tsele Israelitarja nai djan khere i tchalo djijeha.”
24 Un o Mose shunas ap peskri romjakro dad un kras lauter, hoi job leske penas.
25 Jaake rodas o Mose peske tchatche murshen win un kras lendar pralstune pral i Israelitarja: Pralstune pral i serja un pralstune pral i sheel, ninna pral i paash-sheel un pral deesh. 26 Kolla rakran pral i menshende o tchatchepen win. Pral i tikno tchingepen rakran jon kokres o tchatchepen win. Un o bareder koowa anan le glan o Mose.
27 Palle mukas o Mose peskri romjakro dad pale te djal. Un kowa djas pale pale an peskro them.