9
I pantchti phagi: I vieche wenn nasselo un merenna
1 Kote penas o baro Dewel ap o Mose: “Dja pash o Farao dren un pen leske: Kawa penell o baro Dewel, o Dewel pral i Hebrearja: Muk mire menshen te djal, te nai mangenn le man an. 2 Te mukeh len tu gar te djal, un rikreh len pale pale, 3 palle dikeh tu, te well o baro Debleskro wast pral tire viechende: pral tire graja, tire burikea, tire khamele, tire grumja un tire bakre un busja. Jek baro nasslepen well ap lende. 4 Kau baro nasslepen well gar ap i viechende, hoi i Israelitarjen hi. O baro Dewel krell wawartchandes pash i Egiptarja har pash i Israelitarja. Kolendar merell kek viecho.”
5 Ninna penas o baro Dewel o tsiro, kaana job kowa krella, un penas: “Taissar mukell o baro Dewel kai bibacht pral o them te well.”
6 Un o baro Dewel kras kowa ap o wawar diwes jaake. Un i tsele vieche, hoi i Egiptarjen his, meran. Kol viechendar, hoi i Israelitarjen his, meras kek viecho. 7 Un o Farao bitchras murshen pash lende, te dikenn le palla, hoi i Israeltikre viechentsa hi. Un har kolla koi his, dikan le, te meras pash lende kek lengre viechendar. Ninna kau kopo atchas o Faraeskro dji pandlo un job mukas i Israelitarjen gar te djal.
I shobti phagi: Baro nasslepen ap o mass
8 Kote penas o baro Dewel ap o Mose un ap o Aron: “Lenn tumenge i dui wastentsa tchik dran o bob win, un o Mose witsrell lat glan o Faraeskre jaka pre an o bolepen. 9 Palle well i tchik phurdedo pral o tselo them Egiptia. Un i menshe un i vieche taprenn i djungelo nasslepen ap pengro mass.”
10 Un o Mose un o Aron lan tchik dran o bob un djan glan o Farao. Un o Mose witsras koi tchik pre an o bolepen. Koi tapran i menshe un i vieche i djungelo nasslepen ap pengro mass. 11 Kau kopo nai wan i durkepangre gar glan o Mose, te krenn le jaake har job. Ko djungelo nasslepen his ninna ap lende har ap hako Egiptari. 12 Un o baro Dewel pandas o Faraeskro dji, un job shunas gar ap lende. Jaake was, hoi o baro Dewel ap o Mose penas.
I eftati phagi: Barrengro brishin perell ap i phub
13 Kote penas o baro Dewel ap o Moseste: “Taissarla ste sik pre, dja glan o Farao un pen ap leste: ‘Kawa penell o baro Dewel, o Dewel pral i Hebrearja: Muk mire menshen te djal, te nai mangenn le man an. 14 Te shuneh tu kau kopo pale gar, palle kamau me i djungleder bibacht pral tute un tire pralstunende un pral tire tsele menshende te bitchrell, te dikess un haiwess, te hi kek ap kai phub jaake har me.
15 Me nai hadoms glan rah tsiro miro wast pre un doms tut i nasslepah temerl, tut un tire tsele menshen, jaake te wans tumendar kek buder ap kai phub. 16 Me mukom tut doleske djido, te dikess miri bari soor, un te rakrenn le mandar ap i tseli phub.
17 Tu patseh, tu nai kreh mire menshentsa, hoi kameh, un mukeh len gar te djal. 18 Dik, taissar an ko emligo tsiro mukau brishin te dell, hoi hi har barra. Kol brishineskre barra hi jaake baro, har an o them Egiptia gar das, jaake rah kau them della. 19 Kanna pen, te lenn le i viechen dren. Un kowa, hoi win tardo hi, te anenn le les khere. Lauter, hoi win hi, menshe har vieche hunte merenna.’”
20 Kol Faraeskre pralstune, kai daran, hoi o baro Dewel penas, kolla mukan pengre budepangren un viechen an i khera te anell. 21 Kolla, kai mukan penge kol laba, hoi o baro Dewel penas, gar an o dji te djal, kolla mukan pengre budepangren un pengre viechen win.
22 Un o baro Dewel penas ap o Mose: “Hade tiro wast pre ap o bolepen! Palle dell brishin, hoi hi har barra, ap i menshende, ap i viechende un ap o tselo senlepen ap i hachetikri phub an o tselo them Egiptia.”
23-24 Kote hadas o Mose peskro kasht pre ap o bolepen. Un o baro Dewel mukas barrengro brishin ap i phub te perell. Un o bolepen das bari gole, un das jag karje pral un tele ap i phub. Ko brishin, kai jag pral un tele karje das, un brishineskre barra ap i phub peran, kowa his jaake pharo, har gomme gar das, jaake rah har i menshe an o them Egiptia djiwenna. 25 Un kol brishineskre barra dan an o tselo them Egiptia lauter paash, hoi win his: menshe har vieche, ninna o tselo senlepen ap i hachetikri phub. Un i ruka wan tele phagedo. 26 Kokres an o them Gosen, kai i Israelitarja djiwan, kote peras kek barrengro brishin tele.
27 Kote bitchras o Farao pash o Mose un o Aron, te wenn le, un penas ap lende: “Kau kopo anom doosh ap mande. O baro Debles hi tchatches. Man un mire menshen hi gar tchatcho. 28 Mang o baro Debles, te well kanna o barrengro brishin doha, un te dell o bolepen buder gar gole! Palle mukau me tumen te djal, un rikrau tumen buder gar kai.”
29 O Mose penas leske: “Jaake sik har djom dran o foro win, kamau mire wasta pre te hadell ap o baro Debleste. Palle dell o bolepen buder kek gole, un kek barrengro brishin perell buder, te dikess un haiwess, te hi i phub o baro Debleske. 30 Tu un tire pralstune, kowa haiwom, tumer darenna gomme gar o baro Deblestar.”
31 Jaake was o djob paash dino, ninna ko senlepen, hoi kharella ‘Flachs’. O djob his baro un pherdo, un o Flachs djas pre. 32 O gibb un o wawar djob, hoi gomme gar pre djas, wan gar paash dino.
33 Palle djas o Mose win dran o Faraeskro kheer un dran o foro, un hadas peskre wasta pre ap o baro Debleste. Un o bolepen das buder kek gole. Un buder kek barrengro brishin peras tele. Un kek depen das buder ap i phub.
34 Har o Farao dikas, te heras kowa lauter pre, kras lo gar, hoi o baro Dewel lestar kamella, un pandas pale peskro dji. Un jaake kran ninna i pralstune an leskro them. 35 Jaake was tchatcho, hoi o baro Dewel ap o Moseste penas un o Mose i Israelenge dureder penas: O Faraeskro dji atchas pandlo, un job mukas i Israelitarjen gar te djal.