34
O Jakobeskre tchawe denn i murshen an ko foro Sichem mulo
1 Un i Dina, koi tchai, hoi i Lea o Jakobeske ap i phub anas, djas win te dikell li i djuwjen an ko them. 2 Koi dikas lat o Sichem, koleskro dad o Hiwari Hamor his. O Hamor his o rai pral ko them. Un o Sichem tapras lat i sorjah un tchiwas pes pash late. 3 Un job kamas lat o djijestar un rakras latche labentsa ap late. 4 Ap peskro dadeste penas job: “Le mange koi tchai, te romedinerap lat.”
5 Har o Jakob shunas, kai leskri tchai an-tapedo was i sorjah, kras lo tchi, bis te leskre tchawe khere wan. Kolla his leskre viechentsa win ap o them. 6 Un o Sichemeskro dad, o Hamor, was win pash o Jakobeste, te rakrell lo leha.
7 Har o Jakobeskre tchawe khere wan un shunan, hoi o Sichem kras, dukas kowa len an o dji un len was i bari choli pral o Sichem. Job kras tchomone, hoi te well gar kerdo un anas bari ladj pral o Israel.
8 Un o Hamor rakras o Jakobeha un leskre tchawentsa un penas: “Miro tchawo Sichem kamell tumari phenjat o djijestar. Denn lat leste te romedinerell lo lat! 9 Un mer tchiwah men khetne. Denn men tumare tchen! Un lenn tumenge mare tchen! 10 Un djiwenn pash mende! Kau them hi ninna tumenge. Atchenn kai! Un djan trujel parepaske un krenn tumenge khera!”
11 Un o Sichem penas ap o Jakobeste un ap leskre tchawende: “Awenn mange latcho un penenn mange, hoi te dap tumen! Me dau tumen, hoi tumer mandar kamenna. 12 Mangenn mandar bud. Me plaissrau, hoi mangenn mandar. Denn man koi tchat, te romedinerap lat!”
13 Koi rakran o Jakobeskre tchawe chochepah kol dui murshentsa, o Sichem un leskro dadeha Hamor doleske, kai tapras o Sichem lengri phenjat i sorjah an. Un jon penan: 14 “Mer krah nai kowa gar, te das mari phenjat i romeste, kai gar tchinlo hi. Kowa wals menge i bari ladj. 15 Te wenn tumer har mer, jaake te well hako mursh pash tumende tchinlo, palle krah mer, hoi tumer kamenna. 16 Mer dah tumen mare tchen un lah menge tumare tchen, un djiwah pash tumende, jaake kai well jek natsjona dran mende un tumende. 17 Te shunenn gar ap mende un kamenn tumen gar tchinell mukell, lah mer mari pheen un djah menge.”
18 Hoi jon koi penan his mishto glan o Hamor un leskro tchawestar Sichem. 19 Un ko terno mursh Sichem nashras kek tsiro, te krell lo kowa. Job kamas koi tcha. Un leskre tsele menshe an leskro dadeskro kheer shunan ap leste.
20-21 Un o Hamor un leskro tchawo Sichem djan an o baro wudar lengro forestar, te rakrenn le i murshentsa an ko foro un penan ap lende: “Kal mursha kamenn kek tchingepen mentsa. Doleske mu atchenn le an kau them, te djan le trujel parepaske. Hi doha platsa koi. Un mer kamah lengre tchen te romedinerell. Un mer dah len mare tchen. 22 Kowa hi, hoi te kras mer: Jon kamenn, te tchinas mer hako murshes mendar, jaake har jon tchinlo hi. Te krah kowa, kamenn jon ap mende shunell un atchenn pash mende un wenn jek natsjona mentsa. 23 Lengre vieche, lengro brawlepen un lauter, hoi len hi, well maro! Kras, hoi jon kamenna, te atchenn le pash mende!”
24 Un kolla lauter, kai djan an o foro dren un win, shunan ap o Hamor un ap o Sichem, leskro tchaweste. Un hako mursh an ko foro was tchinlo.
25 O triinto diwes, har len duka his, lan dui tchawe o Jakobestar, o Simeon un o Levi, i Dinakre phrala, hakeno peskro charo un wan an ko foro, har kek jak das. Un jon maran i tsele murshen pengre charentsa, 26 ninna o Hamor un leskro tchawes Sichem. Dran leskro kheer lan le i Dina peha un djan penge.
27 Palle tchoran o Jakobeskre tchawe kol mulendar an ko foro, kai lengri pheen i sorjah an-tapedo was. 28 Lengre bakre, lengre grumja, lengre burike un halauter, hoi an o foro un glan o foro his, lan le penge. 29 Lengro tselo brawlepen un lengre tsele tchawen un djuwjen lan le penge. Ninna tchoran le halauter, hoi an i khera his.
30 Koi penas o Jakob ap o Simeon un ap o Levi: “Tumer anan bibacht un ladj ap mande pash kolende, kai djiwenn an kau them: pash i Kanaanitarja un i Perisarja. Mer ham gar bud menshe. Te wenn jon lauter khetne un perenn pral mende, denn le men mulo. Un me merau miri tseli familjah.”
31 Penan kol dui ap leste: “Job las mari phenjat, har te wals joi i lubni. Un mer te kras tchi?”