4
O Kain un o Abel
1 O Adam was khetne peskri romjah Eva. Un joi was an wawar koowa un anas i tchawes ap i phub un das les o lab Kain. Un joi penas: “Me lom i mursh tchawo. O baro Dewel das les mande.” 2 Un pal kowa anas joi i duito tchawes ap i phub. Koles das li o lab Abel. O Abel was i bakrengro. O Kain was i hacho un budras ap i hachetikri phub.
3 Pal i tsiro las o Kain kolestar, hoi ap leskri phub baro was un chatchras les o baro Debleske. 4 Un o Abel las tikne bakren, kai i phureder tchawe pengre dajendar hi, maras len un chatchras lengre feteder kotja o Debleske. Un o baro Dewel dikas latches ap o Abel un ap kowa, hoi job chatchras leske. 5 Ap o Kain dikas job gar latches, witar gar ap kowa, hoi job chatchras o Debleske. Koi las o Kain i bari choli un dikas chojedo tele ap i phub. 6 Koi penas o baro Dewel ap o Kain: “Hoske hal tu chojedo? Hoske dikeh tele? 7 Kowa hi jaake: Te kreh, hoi mishto hi, nai dikeh tu i menshen an i jaka. Te kreh, hoi gar mishto hi, hi o tchilatchepen gar dur tutar, un kamell rai pral tute te well. Tu hunte wess rai pral o tchilatchepen.”
8 O Kain penas ap peskro phraleste Abel: “Am! Djas win ap o them!”
Un har jon win ap o them his, hadas pes o Kain ap peskro phraleste Abel un das les mulo.
9 Koi penas o baro Dewel ap o Kain: “Kai hi tiro phraal Abel?”
Penas job: “Djinau gar. Dap me hunte jak ap miro phraleste?”
10 Un o Dewel penas: “Hoi kral tu? Shun! Tiro phraleskro rat dell gole pal mande dran i phub. 11 I phub kras peskro mui pre un pijas tiro phraleskro rat, koles tu mulo dal. Kanna nai budress buder gar ap i phub. Tu wess praassedo ap i phub. 12 Te kreh tiri budi ap i hachetikri phub, well kote tchi tuke baro. Tu hunte djas trujel ap i phub. Tut wella kek them, kai khere hal.”
13 Koi penas o Kain ap o baro Debleste: “Miri phagi hi jaake baro, kai rikrau lat nai gar win. 14 Tu tradeh man kau diwes win dran o them! Me hunte khatrap man glan tute. Man wella kek them, kai khere hom. Me hunte dap man trujel. Hakeno, koon hatsell man, nai dell man mulo.”
15 Koi penas o baro Dewel: “Na-a! Hakeno, koon o Kaines mulo della, koleskre menshendar wenn efta menshe mulo dino.”
Un o baro Dewel kras i sikepen glan ap leskro shero, te djinell hakeno, koon hatsell les, te nai marell lo les gar. 16 Un o Kain djas peske o baro Deblestar. Un djas an ko them Nod wergel i baar Eden, ap koi rig, kai o kham pre djala.
O Kain un leskre tchawe, kai pal leste wan
17 Un o Kain was khetne peskri romjah. Kaja was an wawar koowa un anas o Henoch ap i phub. Un o Kain kras i foro, un das ko fores ko lab peskro tchawestar Henoch. 18 O Henoch las i tchawo. Leskro lab his Irad. Koleskro tchawo his o Mehujael. Koleskro tchawo his o Metusael. Un koleskro tchawo his o Lamech. 19 O Lamech las peske dui romjen. O lab kol jekatar his Ada. Koi wawar kharas Zilla.
20 I Ada anas i tchawes ap i phub. Leskro lab his Jabal. Job was o dad kolendar, kai an plachtene khera djiwenn un ap i viechende jak denn. 21 Un o lab leskro phralestar his Jubal. Kowa was o dad halauterendar, kai haiwenn ap dorjengre bashepangrea un tikne phurdepangreb te bashrell.
22 I Zilla anas ninna i tchawes ap i phub. Leskro lab his Tubal-Kain. Job was o dad halauterendar, kai haiwenn sasterno koowa te krell. Leskri pheen his i Naama. 23 Un o Lamech penas ap peskre romjende:
Ada un Zilla, shunenn, hoi me penau!
Tumer, mire romja, denn garda ap mire laba!
Te dukrell man i mursh, koles dau mulo.
Te dell man i terno mursh dawa, dau les me mulo.
24 Koon o Kaines mulo della, koleskre menshendar wenna efta mulo dino.
Koon man, o Lameches, mulo della, koleskre menshendar wenna 77 (efta-deesh-te-efta) menshe mulo dino.
O Set un o Enosh
25 Un o Adam was pale khetne peskri romjah. Un joi anas i tchawes ap i phub, un das les ko lab Set, un penas: “O Dewel das man i wawar tchawes miro tchaweske Abel, koles o Kain mulo das.” 26 Un o Set las ninna i tchawo. Koles das job ko lab Enosh. An ko tsiro mangan i menshe o ersto kopo o baro Debles an.