ⵉⵖⵣⴰⵔ ⵏ ⵡⴰⵎⴰⵏ ⵉⴷⴷⴰⵔⴻⵏ
22
1 ⵓⵛⴰ ⵏⴻⵜⵜⴰ ⵉⵙⵙⵛⴻⵏ ⴰⵢⵉ ⵉⵊⵊ ⵏ ⵉⵖⵣⴰⵔ ⵉⵣⴷⵉⴳ ⵏ ⵡⴰⵎⴰⵏ ⵉⴷⴷⴰⵔⴻⵏ, ⴷ ⴰⵎⴻⵣⴷⴰⴳ, ⵉⵚⴼⴰ ⴰⵎ ⵓⴽⵔⵉⵙⵜⴰⵍ, ⵉ ⴷⴷ-ⵉⵜⵜⴻⴼⴼⵖⴻⵏ ⵣⵉ ⵍⵄⴰⵔⵛ ⵏ ⴰⵔⴻⴱⴱⵉ ⵓ ⵏ ⵢⴻⵣⵎⴰⵔ. ■ 2 ⴷⵉ ⵍⵡⴻⵙⵟ ⵏ ⵡⴰⵣⵣⴰⵢ ⵏⵏⴻⵙ, ⵅ ⵜⵎⴰ-ⵢⴰ ⵓ ⵅ ⵜⵎⴰ ⵏⵏⵉ ⵏ ⵉⵖⵣⴰⵔ, ⵜⵓⵖⴰ ⵜⴰⵛⴻⵊⵊⴰⵔⵜ ⵏ ⵜⵓⴷⴰⵔⵜ ⵜⴻⵏⵏⵉ ⵜⴻⵙⵙⴻⵏⴹⴰⵢ ⵍⵖⵉⴵⴻⵜ ⵜⴻⵏⵄⴰⵛ ⵏ ⵜⵡⴰⵍⴰⵡⵉⵏ. ⴷⵉ ⵎⴽⵓⵍ ⴰⵢⵓⵔ ⵜⴻⵜⵜⵉⵛ ⵍⵖⵉⴵⴻⵜ ⵏⵏⴻⵙ ⴷ ⵜⵉⴼⵔⴰⵢ ⵏⵏⴻⵙ ⵉ ⵓⵙⴳⴻⵏⴼⵓ ⵏ ⵍⴻⴳⵏⵓⵙ. ■ 3 ⵡⴰⵔ ⴷⴰⵢⴻⵙ ⵜᵉⵜⵜⵉⵍⵉ ⵄⴰⴷ ⵏⵏⴻⵄⵍⴻⵜ. ⴰⴷ ⴷⴰⵢⴻⵙ ⵢⵉⵍⵉ ⵍⵄⴰⵔⵛ ⵏ ⴰⵔⴻⴱⴱⵉ ⵓ ⵏ ⵢⴻⵣⵎⴰⵔ ⵓⵛⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴰⴷ ⵅⴰⵙ ⵙⴻⵅⵅⴰⵔⴻⵏ. 4 ⵏⵉⵜⵏⵉ ⴰⴷ ⵥⴰⵔⴻⵏ ⵓⴷⴻⵎ ⵏⵏⴻⵙ, ⵉⵙⴻⵎ ⵏⵏⴻⵙ ⴰⴷ ⵢⵉⵍⵉ ⵅ ⵜⴻⵏⵢⴰⵔⵉⵏ ⵏⵙⴻⵏ. ■ 5 ⵡⴰⵔ ⴷⵉⵏ ⵜᵉⵜⵜⵉⵍⵉ ⴵⵉⵍⴻⵜ ⵓⵛⴰ ⵏⵉⵜⵏⵉ ⵡⴰⵔ ⵜⵜⴻⵃⴷⵉⵊⴻⵏ ⵄⴰⴷ ⵟⵟⵢⴰ ⵏ ⵍⴻⴼⵏⴰⵔⴰⵜ ⵏⵉⵖ ⵏ ⵜⴼⴰⵡⵉⵏ ⵏⵉⵖ ⵏ ⵜⴼⴰⵡⵜ ⵏ ⵜⴼⵓⵛⵜ, ⵎⵉⵏⵣⵉ ⵙⵉⴷⵉ ⴰⵔⴻⴱⴱⵉ ⴰⴷ ⴰⵙⴻⵏ ⵉⴳⴳ ⵜⴰⴼⴰⵡⵜ ⵓⵛⴰ ⴰⴷ ⵢⵉⵍⵉ ⴷ ⴰⵊⴻⴵⵉⴷ ⵏⵙⴻⵏ ⵉ ⵍⴻⴱⴷⴰ ⵇⴰⵄ. ■ 6 ⵅⴰⵙ ⵓⵛⴰ ⵉⵏⵏⴰ ⴰⵢⵉ:
“ⴰⵡⴰⵍⴻⵏ-ⴰ ⴷⴰⵢⵙⴻⵏ ⵍⴰⵎⴰⵏ ⴷ ⵜⵉⴷⴻⵜⵜ!
ⵙⵉⴷⵉ, ⴰⵔⴻⴱⴱⵉ ⵏ ⴰⵔⵔⵓⵃ ⵏ ⵉⵏⴰⴱⵉⵢⵢⴻⵏ ⵉⵇⴻⴷⴷⵙⴻⵏ,
ⴰⵇⴰ ⵉⵙⵙⴻⴽⴽ ⵍⵎⴰⵍⴰⴽ ⵏⵏⴻⵙ,
ⵃⵉⵎⴰ ⴰⴷ ⵉⵙⵙⵛⴻⵏ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵙ
ⵎⵉⵏ ⵉ ⵖⴰ ⵢⵉⵍⵉⵏ ⴷⴻⵖⵢⴰ.” ■
7 “ⵅⵣⴰⵔ ⵏⴻⵛⵛ ⴰⴷ ⴷⴷ-ⴰⵙⴻⵖ ⴷⴻⵖⵢⴰ!
ⵙⵙⴻⵄⴷ ⵏ ⵡⴻⵏⵏⵉ ⵉⵜⵜᵉⵟⵟⴼⴻⵏ
ⴷⴻⴳ ⵡⴰⵡⴰⵍⴻⵏ ⵏ ⵏⵏⵓⴱⵓⵡⴰⵜ
ⵏ ⵡⴻⴷⵍⵉⵙ-ⴰ ⵉⵜⵜⵡⴰⵏⴹⴻⵏ.” ■
8 ⵏⴻⵛⵛ, ⵢⵓⵃⴰⵏⵏⴰ, ⴰⵇⴰ ⵥⵔⵉⵖ ⵓ ⵙⵍⵉⵖ ⵜⵉⵎⴻⵙⵍⴰⵢⵉⵏ-ⴰ. ⵓⵛⴰ ⵍⴰⵎⵉ ⵜⴻⵏⵜ ⵥⵔⵉⵖ ⵓ ⵙⵍⵉⵖ, ⵡⴹⵉⵖ ⵖⴰⵔ ⵉⴹⴰⵔⴻⵏ ⵏ ⵍⵎⴰⵍⴰⴽ ⵡⴻⵏⵏⵉ ⴷ ⴰⵢⵉ ⵉⵙⵙⴻⵛⵏⴻⵏ ⵜⵉⵎⴻⵙⵍⴰⵢⵉⵏ-ⴰ, ⵃⵉⵎⴰ ⴰⴷ ⴰⵙ ⵄⴻⴱⴷⴻⵖ. 9 ⵎⴰⵛⴰ ⵏⴻⵜⵜⴰ ⵉⵏⵏⴰ ⴰⵢⵉ:
“ⵃⴹⴰ, ⵍⵍⴰ, ⵡⴰⵔ ⵜⵜⴻⴳⴳ ⵎⴰⵏ ⴰⵢⴰ,
ⵎⴰⵖⴰⵔ ⵏⴻⵛⵛ ⴷ ⴰⵎⵙⴻⵅⵅⴰⵔ ⴰⵎⵄⴰⵛⴰⵔ ⵏⵏⴻⵛ,
ⵓ ⵏ ⴰⵢⵜⵎⴰⵛ, ⵉⵏⴰⴱⵉⵢⵢⴻⵏ, ⵓⵍⴰ ⵏ ⵢⵉⵏⵏⵉ ⵉⵜⵜᵉⵟⵟⴼⴻⵏ
ⴷⴻⴳ ⵡⴰⵡⴰⵍⴻⵏ ⵏ ⵡⴻⴷⵍⵉⵙ-ⴰ ⵉⵜⵜⵡⴰⵏⴹⴻⵏ.
ⵄⴻⴱⴷⴻⵜ ⴰⵔⴻⴱⴱⵉ!” ■
10 ⵅⴰⵙ ⵓⵛⴰ ⵉⵏⵏⴰ ⴰⵢⵉ:
“ⵡⴰⵔ ⵜⵜⴻⴳⴳ ⴰⵛⴻⵎⵎⵉⵄ ⵅ ⵡⴰⵡⴰⵍⴻⵏ ⵉ ⵉⵜⵜⵡⴰⵏⴰⴱⴱⴻⵏ
ⴷⴻⴳ ⵡⴻⴷⵍⵉⵙ-ⴰ ⵉⵜⵜⵡⴰⵏⴹⴻⵏ,
ⵎⵉⵏⵣⵉ ⵍⵡⴻⵇⵜ ⴰⵇⴰ ⵜⵉⵡⴻⴹ-ⴷⴷ.” ■
11 “ⵡⴻⵏⵏⵉ ⵉⵜⵜⴻⴳⴳⴻⵏ ⵎⵉⵏ ⵡⴰⵔ ⵉⵙⴻⴳⴳⴷⴻⵏ,
ⴰⴷ ⵉⴳⴳ ⵎⵉⵏ ⵡⴰⵔ ⵉⵙⴻⴳⴳⴷⴻⵏ ⴽⵜⴰⵔ,
ⴰⵎⴻⵏⴳⵓⵙ ⴰⴷ ⵉⴷⵡⴻⵍ ⴷ ⴰⵎⴻⵏⴳⵓⵙ ⴽⵜⴰⵔ,
ⴰⵎⵙⴻⴳⴳⴰⴷ ⴰⴷ ⵉⴳⴳ ⵜⴰⵙⴻⴳⴷⴰ ⴽⵜⴰⵔ
ⵓⵛⴰ ⴰⵎⵇⴻⴷⴷⴰⵙ ⴰⴷ ⵉⴷⵡⴻⵍ ⴷ ⴰⵎⵇⴻⴷⴷⴰⵙ ⴽⵜⴰⵔ.”
12 “ⵅⵣⴰⵔ, ⵏⴻⵛⵛ ⴰⴷ ⴷⴷ-ⴰⵙⴻⵖ ⴷⴻⵖⵢⴰ
ⵓⵛⴰ ⵍⵎⵓⵏⴻⵜ ⵉⵏⵓ ⴰⵇⴰ-ⵜⵜ ⴰⴽⵉⴷⵉ,
ⵃⵉⵎⴰ ⴰⴷ ⵅⴻⴵⵚⴻⵖ ⴽⵓⵍ ⵉⵊⵊⴻⵏ
ⴰⵏⴻⵛⵜ ⵏ ⵍⵅⴻⴷⵎⴻⵜ ⵏⵏⴻⵙ. ■
13 ⵏⴻⵛⵛ ⴷ ⴰⵍⵉⴼ ⵓ ⵏⴻⵛⵛ ⴷ ⵜⴰⵡ,
ⴷ ⴰⵎⴻⵣⵡⴰⵔⵓ ⴷ ⴰⵏⴻⴳⴳⴰⵔⵓ,
ⴷ ⴱⴻⴷⴷⵓ ⴷ ⴰⴽⴻⵎⵎⴻⵍ.” ■
14 “ⵙⵙⴻⵄⴷ ⵏⵙⴻⵏ ⵉ ⵢⵉⵏⵏⵉ ⵉⵜⵜⴻⴳⴳⴻⵏ ⵜⵉⵡⴻⵚⵚⴰ ⵏⵏⴻⵙ.
ⴰⴷ ⵖⴰⵔⵙⴻⵏ ⵜⵉⵍⵉ ⵚⵚⵓⵍⵟⴰ ⵅ ⵜⵛⴻⵊⵊⴰⵔⵜ ⵏ ⵜⵓⴷⴰⵔⵜ
ⵓⵛⴰ ⴰⴷ ⴷⴷ-ⴰⴷⴼⴻⵏ ⵖⴰⵔ ⵜⴻⵏⴷⵉⵏⵜ
ⵣⵉ ⵜⴻⵡⵡⵓⵔⴰ ⵏⵏⴻⵙ.
15 ⴱⴰⵔⵔⴰ ⵉⴵⴰⵏ ⵉⵏⵏⵉ ⵉⵜⵜⴻⴳⴳⴻⵏ ⴼⴰⵔⵇ-ⵛⵛⵖⴻⵍ
ⴷ ⵢⵉⵏⵏⵉ ⵉⵏⴻⵇⵇⴻⵏ
ⴷ ⵢⵉⵏⵏⵉ ⵉⵄⴻⴱⴱⴷⴻⵏ ⵍ’ⴰⵚⵏⴰⵎ
ⴷ ⵢⵉⵏⵏⵉ ⴷⴰⵢⵙⴻⵏ ⵍⴻⵅⵎⴻⵊ
ⴷ ⵢⵉⵏⵏⵉ ⵉⵜⵜⵙⴻⵃⵃⴰⵔⴻⵏ ⴷ ⵎⴰⵔⵔⴰ ⵉⵎⵡⴰⵍⴰⵡⴻⵏ
ⴷ ⵉⵏⵏⵉ ⵉⵜⵜⴻⴳⴳⴻⵏ ⵎⵉⵏ ⵉ ⴷⴷ-ⵉⵜⵜⴻⴼⴼⵖⴻⵏ
ⵣⴻⴳ ⵓⵅⴰⵔⵔⵉⵇ.” ■
16 “ⵏⴻⵛⵛ, ⵢⴻⵛⵛⵓ, ⴰⵇⴰ ⵙⵙⴻⴽⴽⴻⵖ ⵍⵎⴰⵍⴰⴽ ⵉⵏⵓ
ⵎⴰⵃⴻⵏⴷ ⴰⴷ ⵅⴰⵡⴻⵎ ⵉⵛⵀⴻⴷ ⵎⴰⵏ ⴰⵢⴰ
ⵣⵣⴰⵜ ⵉ ⵜⵎⴻⵙⵎⵓⵏⵉⵏ.
ⴰⵇⴰ ⴷ ⵏⴻⵛⵛ, ⴷ ⴰⵥⵡⴰⵔ ⴷ ⵣⵣⴰⵔⵉⵄⴻⵜ ⵏ ⴷⴰⵡⵓⴷ,
ⴷ ⵡⴻⵏⵏⵉ ⴰⴽⵉⴷⴻⵙ,
ⴷ ⵉⵜⵔⵉ ⵏ ⵍⴻⴼⵊⴰⵔ ⵢⴰⵔⴻⵇⵇⴻⵏ.” ■
17 ⴰⵔⵔⵓⵃ ⴷ ⵜⴻⵙⵍⵉⵜ ⵇⵇⴰⵔⴻⵏ:
“ⴰⵙ-ⴷⴷ!”
ⵓⵛⴰ ⴻⵊⵊ ⵡⴻⵏⵏⵉ ⵜ ⵉⵙⵍⵉⵏ, ⴰⴷ ⵢⵉⵏⵉ:
“ⴰⵙ-ⴷⴷ!”
“ⴷ ⵡⴻⵏⵏⵉ ⵉⴼⵓⴷⴻⵏ, ⴻⵊⵊ ⵉ-ⵜ ⴰⴷ ⴷⴷ-ⵢⴰⵙ,
ⴰⴷ ⵉⵙⵓ ⴰⵎⴰⵏ ⵉⴷⴷⴰⵔⴻⵏ ⴱⴰⵟⴻⵍ.” ■
18 “ⵏⴻⵛⵛ ⵛⴻⵀⵀⴷⴻⵖ ⵉ ⵎⴰⵔⵔⴰ ⵉⵏⵏⵉ ⵉⵜⵜⴻⵙⵍⴰⵏ
ⵉ ⵡⴰⵡⴰⵍⴻⵏ ⵏ ⵏⵏⵓⴱⵓⵡⴰ ⵏ ⵡⴻⴷⵍⵉⵙ-ⴰ ⵉⵜⵜⵡⴰⵏⴹⴻⵏ:
ⵎⴰⵍⴰ ⴷⵉⵏ ⵃⴻⴷ ⵡⴻⵏⵏⵉ ⵅⴰⵙⴻⵏ ⵉ ⵖⴰ ⵢⴰⵔⵏⵉⵏ,
ⴰⵔⴻⴱⴱⵉ ⴰⴷ ⵅⴰⵙ ⵢⴰⵔⵏⵉ ⵊⵊⵔⴰⵢⴻⵃ,
ⵜⵉⵏⵏⵉ ⵉⵜⵜⵡⴰⵣⴻⵎⵎⴻⵎⴻⵏ ⴷⴻⴳ ⵡⴻⴷⵍⵉⵙ-ⴰ.
19 ⵎⴰⵍⴰ ⵛⴰ ⵏ ⵉⵊⵊⴻⵏ ⵉⴽⴽⴻⵙ ⵣⴻⴳ ⵡⴰⵡⴰⵍⴻⵏ
ⵏ ⵡⴻⴷⵍⵉⵙ ⵉⵜⵜⵡⴰⵏⴹⴻⵏ ⵏ ⵏⵏⵓⴱⵓⵡⴰ-ⵢⴰ,
ⴰⴷ ⴰⵙ ⵉⴽⴽⴻⵙ ⴰⵔⴻⴱⴱⵉ ⵜⴰⵙⵖⴰⵔⵜ ⵏⵏⴻⵙ
ⵣⵉ ⵜⵛⴻⵊⵊⴰⵔⵜ ⵏ ⵜⵓⴷⴰⵔⵜ ⵓ ⵣⵉ ⵜⴻⵏⴷⵉⵏⵜ ⵉⵇⴻⴷⴷⵙⴻⵏ.” ■
20 ⵅⵎⵉ ⵏⴻⵜⵜⴰ ⵉⵛⵀⴻⴷ ⵅ ⵎⴰⵏ ⴰⵢⴰ, ⵉⵏⵏⴰ:
“ⵡⴰⵀ, ⵏⴻⵛⵛ ⴰⴷ ⴷⴷ-ⴰⵙⴻⵖ ⴷⴻⵖⵢⴰ!”
“ⴰⵙ-ⴷⴷ, ⴰ ⵙⵉⴷⵉ ⵢⴻⵛⵛⵓ!”
21 ⴰⵔⴹⴰ ⵏ ⵙⵉⴷⵉⵜⵏⴻⵖ ⵢⴻⵛⵛⵓ ⵍⵎⴰⵙⵉⵃ ⴰⵇⴰ-ⵜ ⴰⴽ-ⴷ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⵏⵏⴻⵙ. “ⴰⵎⵉⵏ!”
ⴰⵏⴻⴳⴳⴰⵔ ⵏ ⵍⵄⴰⵀⴷ ⵏ ⵊⴷⵉⴷ.
ⴰⵄⵓⴵⵉ ⵉ ⵢⵉⵙⴻⵎ ⵏ ⴰⵔⴻⴱⴱⵉ,
ⴱⴰⴱⴰⵜⵏⴻⵖ ⴷ ⵙⵉⴷⵉⵜⵏⴻⵖ ⵢⴻⵛⵛⵓ ⵍⵎⴰⵙⵉⵃ
ⴷ ⴰⵔⵔⵓⵃ ⵉⵇⴻⴷⴷⵙⴻⵏ.