ⴰⵙⴰⵔⴳⴻⴱ 15

ⵉⵥⵍⵉ ⵏ ⵉⵏⵏⵉ ⵉⵖⴻⵍⵍⴱⴻⵏ

1 ⵓⵛⴰ ⵥⵔⵉⵖ ⴷⴻⴳ ⵓⵊⴻⵏⵏⴰ ⵉⵛⵜ ⵏ ⵍⴻⵄⵍⴰⵎⴻⵜ ⵏⵏⴻⵖⵏⵉ, ⴷ ⵜⴰⵎⴻⵇⵇⵔⴰⵏⵜ ⴷ ⵜⴰⵏⴻⴱⵀⴻⵜ: ⵙⴻⴱⵄⴰ ⵏ ⵍⵎⴰⵍⴰⴽⴰⵜ ⵏⵏⵉ ⴷⴷ-ⵉⵡⵢⴻⵏ ⵙⴻⴱⵄⴰ ⵏ ⵊⵊⵔⴰⵢⴻⵃ ⵜⵉⵏⴻⴳⴳⵓⵔⴰ, ⵎⵉⵏⵣⵉ ⵉⴽⵎⴻⵍ ⵣⵣⴰⵢⵙⴻⵏⵜ ⵡⴻⵖⴹⴰⴱ ⵏ ⴰⵔⴻⴱⴱⵉ.   

2 ⵓⵛⴰ ⵥⵔⵉⵖ ⵛⴰ ⵉⵜⵜⴻⵎⵛⴰⴱⴻⵀ ⴷⵉ ⵍⴻⴱⵃⴰⵔ ⵏ ⵣⵣⴰⵊ, ⵡⴻⵏⵏⵉ ⵉⵅⴻⴵⴹⴻⵏ ⴰⴽ-ⴷ ⵜⵎⴻⵙⵙⵉ, ⵓⵛⴰ ⵉⵏⵏⵉ ⵉⵖⴻⵍⵍⴱⴻⵏ ⵅ ⵍⵡⴻⵃⵛ ⴷ ⵍⴻⵅⵢⴰⵍ ⵏⵏⴻⵙ ⴷ ⵏⵏⵓⵎⵔⵓ ⵏ ⵢⵉⵙⴻⵎ ⵏⵏⴻⵙ, ⴱⴻⴷⴷⴻⵏ ⵅ ⵍⴻⴱⵃⴰⵔ ⵏ ⵣⵣⴰⵊ, ⵖⴰⵔⵙⴻⵏ ⵍⵀⴰⵔⴱⴰⵜ ⵏ ⴰⵔⴻⴱⴱⵉ.   3 ⵏⵉⵜⵏⵉ ⵖⴻⵏⵏⵊⴻⵏ ⵉⵣⵍⵉ ⵏ ⵓⵚⴻⴱⴱⴻⵃ ⵏ ⵎⵓⵙⴰ, ⴰⵎⵙⴻⵅⵅⴰⵔ ⵏ ⴰⵔⴻⴱⴱⵉ, ⴷ ⵢⴻⵣⵍⵉ ⵏ ⵓⵚⴻⴱⴱⴻⵃ ⵏ ⵢⴻⵣⵎⴰⵔ, ⵇⵇⴰⵔⴻⵏ:

“ⴷ ⵜⵉⵎⴻⵇⵇⵔⴰⵏⵉⵏ ⴷ ⵜⵚⴻⴱⵃⴰⵏⵉⵏ ⵍⴻⵅⴷⴰⵢⴻⵎ ⵏⵏⴻⵛ,

ⴰ, ⵙⵉⴷⵉ ⴰⵔⴻⴱⴱⵉ, ⴰⵎⵣⴻⵎⵎⴰⵔ ⵅ ⴽⵓⵍⵛⵉ,

ⵍⴻⵅⴷⴰⵢⴻⵎ ⵏⵏⴻⵛ ⴷ ⵜⴰⵙⴻⴳⴷⴰ ⴷ ⵜⵉⴷⴻⵜⵜ,

ⴰ ⴰⵊⴻⴵⵉⴷ ⵏ ⵏ ⵣⵣⵎⴰⵏⴰⵜ!   

4 ⵎⴰⵏ ⵡⴻⵏ ⵡⴰⵔ ⵛⴻⴽ ⵉⵜⵜⴻⴳⴳⵯⴻⴷⴻⵏ, ⴰ ⵙⵉⴷⵉ,

ⵎⴰⵏ ⵡⴻⵏ ⵡⴰⵔ ⵉⵙⵙⴻⵎⵖⴰⵔⴰⵏ ⵉⵙⴻⵎ ⵏⵏⴻⵛ?

ⵛⴻⴽ ⵡⴻⵃⵃⴷⴻⴽ ⵉ ⵉⴵⴰⵏ ⴷ ⴰⵎⴻⵣⴷⴰⴳ ⵇⴰⵄ,

ⵎⴰⵖⴰⵔ ⵎⴰⵔⵔⴰ ⵍⴻⴳⵏⵓⵙ ⴰⴷ ⴷⴷ-ⴰⵙⴻⵏ,

ⴰⴷ ⵙⴻⵊⴷⴻⵏ ⵣⵣⴰⵜⴻⴽ,

ⵎⵉⵏⵣⵉ ⵛⴻⴽ ⵜⴱⴰⵏⴻⴷ ⴷ ⴰⵎⵙⴻⴳⴳⴻⴷ

ⴷⵉ ⵍⴻⵃⴽⴰⵎⴰⵜ ⵏⵏⴻⵛ.”   

5 ⴰⵡⴰⵔⵏⵉ ⴰⵙ ⵥⵔⵉⵖ, ⴰⵇⴰ ⵜⴻⵏⵏⵓⵔⵣⴻⵎ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏ ⵜⵣⴻⴷⴷⵉⵖⵜ ⵏ ⵛⵛⵀⴰⴷⴻⵜ ⴷⴻⴳ ⵓⵊⴻⵏⵏⴰ    6 ⵓⵛⴰ ⵙⴻⴱⵄⴰ ⵏ ⵍⵎⴰⵍⴰⴽⴰⵜ ⵏⵏⵉ ⵖⴰⵔ ⴵⴰⵏⵜ ⵙⴻⴱⵄⴰ ⵏ ⵊⵊⵔⴰⵢⴻⵃ ⴼⴼⵖⴻⵏⵜ-ⵉ-ⴷⴷ ⵣⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵢⴰⵔⴹⴻⵏⵜ ⵍⴻⵇⵟⴻⵏ ⴰⵣⴷⴰⴷ ⵉⵣⴷⵉⴳⴻⵏ ⵉⵜⵜⵉⵙⵙⵉⵇⴻⵏ, ⵓⵛⴰ ⵖⴰⵔⵙⴻⵏ ⵅ ⵉⴷⵎⴰⵔⴻⵏ ⵉⵊⵊ ⵏ ⵡⴻⴱⵢⴰⵙ ⵏ ⵡⵓⵔⴻⵖ.    7 ⵓⵛⴰ ⵉⵊⵊⴻⵏ ⵣⵉ ⴰⵔⴻⴱⵄⴰ ⵏ ⵉⵎⵓⴷⴷⴰⵔⴻⵏ ⵉⵡⵛⴰ ⴰⵙⴻⵏ ⵉ ⵙⴻⴱⵄⴰ ⵏ ⵍⵎⴰⵍⴰⴽⴰⵜ ⵙⴻⴱⵄⴰ ⵏ ⵟⵟⴰⵡⵢⴰⵜ, ⵛⵛⵓⵔⴻⵏⵜ ⵙ ⵡⴻⵖⴹⴰⴱ ⵏ ⴰⵔⴻⴱⴱⵉ, ⵡⴻⵏⵏⵉ ⴷ ⵜⵓⴷⴰⵔⵜ ⵉ ⵍⴻⴱⴷⴰ ⵇⴰⵄ. “ⴰⵎⵉⵏ!” 8 ⵓⵛⴰ ⵜᵉⵜⵜⵡⴰⵄⴻⵎⵎⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵙ ⴷⴷⴻⵅⵅⴰⵏ ⵉ ⴷⴷ-ⵉⵜⵜⴻⴼⴼⵖⴻⵏ ⵣⴻⴳ ⵓⵄⵓⴵⵉ ⵏ ⴰⵔⴻⴱⴱⵉ ⵓ ⵣⵉ ⵊⵊⴻⵀⴷ ⵏⵏⴻⵙ. ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵣⴻⵎⵎⴰⵔ ⴰⴷ ⴷⴷ-ⵢⴰⴷⴻⴼ ⵖⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⴰⵍ ⵖⴰ ⴽⴽⴻⵏⵜ ⵇⴰⵄ ⵙⴻⴱⵄⴰ ⵏ ⵊⵊⵔⴰⵢⴻⵃ ⵜⵉⵏⵏⵉ ⴷⴷ-ⵉⵡⵢⴻⵏ ⵙⴻⴱⵄⴰ ⵏ ⵍⵎⴰⵍⴰⴽⴰⵜ.