ⵓⵙⵙⴰⵏ ⵉⵏⴻⴳⴳⵓⵔⴰ
3
1 ⵎⴰⵛⴰ ⵙⵙⴻⵏ ⴷⴷⴻⴳⴳⴰ, ⴰⵇⴰ ⴷⴻⴳ ⵡⵓⵙⵙⴰⵏ ⵉⵏⴻⴳⴳⵓⵔⴰ ⴰⴷ ⴷⵉⵏ ⵉⵍⵉⵏ ⵍⵎⵉⵊⴰⵍⴰⵜ ⵏ ⵍⵡⴻⵇⵜ ⵉⵡⵄⴰⵔⴻⵏ. ■ 2 ⵎⵉⵏⵣⵉ ⵉⵡⴷⴰⵏ ⴰⴷ ⵅⵙⴻⵏ ⵉⵅⴻⴼ ⵏⵙⴻⵏ, ⴰⴷ ⵉⵍⵉⵏ ⴷ ⵉⵛⴻⵟⵟⴰⵔⴻⵏ, ⴷ ⴰⵢⵜ ⵏ ⴱⵓ-ⵏⵏⴼⴰⵅⴻⵜ ⴷ ⵉⵎⵄⴻⴼⴼⴰⵔⴻⵏ ⴷ ⵉⵎⵛⴻⵇⵇⴰⴼⴻⵏ, ⵡⴰⵔ ⵜⵜᵉⵟⵟⵉⵄⵉⵏ ⵛⴰ ⵉ ⵉⵡⴷⴰⵏ ⵏⵙⴻⵏ, ⴰⴷ ⵏⴹⴰⵔⴻⵏ ⴰⵔⴹⴰ, ⴰⴷ ⵉⵍⵉⵏ ⴷ ⵉⵄⴻⴼⴼⴰⵏⴻⵏ, 3 ⴰⴷ ⵛⴻⵇⵇⴼⴻⵏ, ⴰⴷ ⵎⴻⵥⵍⴻⵏ ⵍⴻⴱⴷⴰ ⴷⵉ ⵄⵍⴰⵎ ⴽⵓⵍ ⵏⵏⴻⵛⵡⴰⵜ, ⴰⴷ ⵉⵍⵉⵏ ⵇⴻⵙⵃⴻⵏ, ⵛⴰⵔⵔⵀⴻⵏ ⵎⵉⵏ ⵉⵚⴻⴱⵃⴻⵏ, 4 ⴰⴷ ⵉⵍⵉⵏ ⴷ ⵉⵖⴻⴷⴷⴰⵔⴻⵏ ⴷ ⵉⴼⴻⵏⵜⵔⵓⵙⴻⵏ, ⴷⴰⵢⵙⴻⵏ ⵏⵏⴼⴰⵅⴻⵜ, ⴰⴷ ⵅⵙⴻⵏ ⵏⵏⴻⵛⵡⴰⵜ ⴽⵜⴰⵔ ⵣⵉ ⴰⵔⴻⴱⴱⵉ. 5 ⵏⵉⵜⵏⵉ ⵖⴰⵔⵙⴻⵏ ⵓⴷⴻⵎ ⵏ ⵜⵉⴳⴳⵯⵓⴷⵉ ⵣⵉ ⴰⵔⴻⴱⴱⵉ, ⵎⴰⵛⴰ ⴱⴻⴷⴷⴻⵏ ⴰⴳⴳⵯⴻⵊⴻⵏ ⵅ ⵊⵊⴻⵀⴷ ⵏⵏⴻⵙ. ⵉⵏⵏⵉ ⵉⴵⴰⵏ ⴰⵎⴻⵏⵏⵉ, ⵉⵜⵜⵅⴻⵚⵚⴰ ⴰⴷ ⵜⴻⵏ ⵜⴻⵙⵙⵉⴳⴳⵯⴻⵊⴻⴷ ⵅⴰⴽ. ■ 6 ⵣⵣⴰⵢⵙⴻⵏ ⵉⵏⵏⵉ ⵉⵜⵜⵃⴰⵎⴰⵏ ⵜⵓⴷⵔⵉⵏ ⵓⵛⴰ ⵏⵉⵜⵏⵉ ⵙⵙⵓⵙⵓⵎⴻⵏ ⵜⵉⵎⵖⴰⵔⵉⵏ ⵜⵉⵏⵏⵉ ⵢⴰⵔⴻⴱⴱⵓⵏ ⴷⴷⵏⵓⴱ, ⵜⵜⵡⴰⵄⴰⵔⵔⴻⵏⵜ ⵙ ⵓⴱⴰⵔⵔⵓ ⵏ ⵏⵏⴻⵛⵡⴰⵜ, ■ 7 ⵜⵉⵏⵏⵉ ⵅⵙⴻⵏⵜ ⴰⴷ ⵍⴻⵎⴷⴻⵏⵜ ⵍⴻⴱⴷⴰ. ⵄⴻⵎⵎⴰⵔⵚ ⴰⴷ ⴰⵡⴹⴻⵏ ⴷⴷⴰⴱ ⵏ ⵢⴻⵔⵢⴰⵣⴻⵏ ⵏⵏⵉ ⵖⴰⵔ ⵜⵓⵙⵙⵏⴰ ⵏ ⵜⵉⴷⴻⵜⵜ, ■ 8 ⵎⴰⵛⴰ ⴰⵎ ⵎⴰⵎⵎⴻⵛ ⵜⵓⵖⴰ ⵢⴰⵏⵏⵉⵙ ⴷ ⵢⴰⵎⴱⵔⵉⵙ ⵜⵜⴻⵎⵄⴰⵍⴰⵏ ⴰⴽ-ⴷ ⵎⵓⵙⴰ, ⴰⵎⵎⵓ ⵄⴰⵡⴻⴷ ⵉⵏⴰ ⵜⵜⴻⵎⵄⴰⵍⴰⵏ ⴰⴽ-ⴷ ⵜⵉⴷⴻⵜⵜ: ⴰⵇⴰ-ⵜⴻⵏ ⴷ ⵉⵡⴷⴰⵏ, ⵉⵏⵏⵉ ⵉⵜⵜⵡⴰⵖⴻⵛⵛ ⵍⴻⵄⵇⴻⵍ ⵏⵙⴻⵏ, ⵏⵉⵜⵏⵉ ⵜⵜⵡⴰⵎⵎⴻⵏⴹⴰⵔⴻⵏ ⵣⵉ ⵍ’ⵉⵎⴰⵏ. ■ 9 ⵎⴰⵛⴰ ⵡⴰⵔ ⵜⵜⵔⵉⵃⴻⵏ ⵛⴰ ⴽⵜⴰⵔ ⵖⴰⵔ ⵣⵣⴰⵜ, ⵎⵉⵏⵣⵉ ⴰⴼⵖⵓⵍ ⵏⵙⴻⵏ ⵉⴱⴰⵏ-ⴷⴷ ⵉ ⵎⴰⵔⵔⴰ, ⴰⵎ ⵎⴰⵎⵎⴻⵛ ⵜⵓⵖⴰ ⵉⵜⵜⵡⴰⵙⵙⴻⵏ ⵓⵍⴰ ⴷ ⴰⴼⵖⵓⵍ ⵏ ⵢⵉⵏⵏⵉ ⵙ ⵜⵏⴰⵢⴻⵏ.
ⴰⵎⴻⴷⵢⴰ ⵏ ⴱⵓⵍⵓⵙ ⴷ ⵡⴰⵡⴰⵍ ⵏ ⴰⵔⴻⴱⴱⵉ
10 ⵎⴰⵛⴰ ⵛⴻⴽ ⵜⵙⵉⵖⵉⴷ ⴰⴽⵉⴷⵉ ⴷⴻⴳ ⵓⵙⴻⵍⵎⴻⴷ ⵉⵏⵓ, ⴰⵎ ⵎⴰⵎⵎⴻⵛ ⴳⴳⵓⵔⴻⵖ, ⵜⵙⵉⵖⵉⴷ ⴰⴽⵉⴷⵉ ⴷⵉ ⵍⵖⴰⵔⴰⴹ ⵉⵏⵓ, ⵍ’ⵉⵎⴰⵏ ⵉⵏⵓ, ⵜⵜⴰⵙⵉⵄ ⵏ ⵍⵅⴰⴹⴰⵔ ⵉⵏⵓ, ⵜⴰⵢⵔⵉ ⵉⵏⵓ ⴷ ⵚⵚⴱⴰⵔ ⵉⵏⵓ, 11 ⴷⵉ ⵍⴻⵃⵚⴰⵔⴰⵜ ⴷ ⵓⵡⴻⴷⴷⴻⴱ ⵉⵏⵓ. ⵜⴻⵙⵙⵏⴻⴷ ⵜⵉⵎⴻⵙⵍⴰⵢⵉⵏ ⵉ ⵅⴰⴼⵉ ⵉⴽⴽⵉⵏ ⴷⵉ ⴰⵏⵜⵉⵢⵓⵅⵉⵢⴰ ⴷ ⵉⴽⵓⵏⵉⵢⴰ ⴷ ⵍⵉⵙⵜⵔⴰ, ⵎⴰⵏ ⵎⴰⵔⴽⴰⵜ ⵏ ⵓⴷⴰⵔⵔⴻⵛ ⵉ ⴽⵙⵉⵖ, ⵓⵛⴰ ⴰⵇⴰ ⵙⵉⴷⵉ ⵉⵙⵙⴻⵏⵊⴻⵎ ⴰⵢⵉ ⵣⵣⴰⵢⵙⴻⵏⵜ ⵎⴰⵔⵔⴰ. ■ 12 ⵎⴰⵔⵔⴰ ⵉⵏⵏⵉ ⵉⵅⵙⴻⵏ ⴰⴷ ⴷⴷⴰⵔⴻⵏ ⵙ ⵜⵉⴳⴳⵯⵓⴷⵉ ⵣⵉ ⴰⵔⴻⴱⴱⵉ ⴷⵉ ⵢⴻⵛⵛⵓ ⵍⵎⴰⵙⵉⵃ, ⴰⴷ ⵜⵜⵡⴰⴷⴰⵔⵔⵛⴻⵏ. ■ 13 ⵎⴰⵛⴰ ⵉⵡⴷⴰⵏ ⵉⵄⴻⴼⴼⴰⵏⴻⵏ ⴷ ⵉⵛⴻⵎⵎⴰⵜⴻⵏ ⴰⴷ ⴰⵔⵏⵉⵏ ⴷⵉ ⵜⵓⵄⴻⴼⴼⵏⴰ ⵏⵙⴻⵏ, ⴰⴷ ⵖⵡⴰⵏ ⵓⵛⴰ ⴰⴷ ⵜⵜⵡⴰⵖⵡⴰⵏ.
14 ⵎⴰⵛⴰ ⵛⴻⴽ, ⵇⵇⵉⵎ ⴷⵉ ⵎⵉⵏ ⵜⵓⵖⴰ ⵜⵍⴻⵎⴷⴻⴷ ⵓ ⴷⵉ ⵎⵉⵏ ⵜᵉⵜⵜⵡⴰⵙⵙⵇⴻⵏⵄⴻⴷ, ⵎⴰⵖⴰⵔ ⵜⴻⵙⵙⵏⴻⴷ ⵎⴰⵏ ⵡⴻⵏ ⵉ ⵣⵉ ⵜ ⵜⵍⴻⵎⴷⴻⴷ, 15 ⵓ ⴰⵇⴰ ⵣⵉ ⵜⴻⵎⵥⵉ ⵏⵏⴻⵛ ⵜᵉⵜⵜⵡⴰⵙⵙⵍⴻⵎⴷⴻⴷ ⴷⵉ ⵜⵉⵔⴰ ⵉⵇⴻⴷⴷⵙⴻⵏ, ⵜⵉⵏⵏⵉ ⵣⴻⵎⵎⴰⵔⴻⵏⵜ ⴰⴷ ⵛⴻⴽ ⴰⵔⵔⴻⵏⵜ ⴷ ⴰⵎⵉⵖⵉⵙ ⴰⵍ ⵖⴰ ⵜᵉⵟⵟⴼⴻⴷ ⵜⵓⴷⴰⵔⵜ ⵙ ⵍ’ⵉⵎⴰⵏ ⵏ ⵢⴻⵛⵛⵓ ⵍⵎⴰⵙⵉⵃ. 16 ⴽⵓⵍ ⵜⵉⵔⴰ ⵉ ⵢⵓⵔⴰⵏ ⵙ ⴰⵔⵔⵓⵃ ⵉⵇⴻⴷⴷⵙⴻⵏ, ⴰⵇⴰ ⵉⵏⴻⴼⴼⴻⵄ ⵄⴰⵡⴻⴷ ⵉ ⵓⵙⴻⵍⵎⴻⴷ, ⵉ ⵓⵚⴻⵃⵃⵉ, ⵉ ⵡⴻⵄⴷⴰⵍ ⵓⵛⴰ ⵉ ⵜⵜⴰⵔⴱⵉⵢⵢⴻⵜ ⴷⵉ ⵜⵙⴻⴳⴷⴰ, ■ 17 ⵃⵉⵎⴰ ⴱⵏⴰⴷⴻⵎ ⵏ ⴰⵔⴻⴱⴱⵉ ⴰⴷ ⵢⵉⵍⵉ ⵉⵄⴻⵙⵙ, ⵉⵃⴻⵣⵣⴻⵎ ⵉ ⵎⴰⵔⵔⴰ ⵍⵅⴻⴷⵎⴻⵜ ⵉⵚⴻⴱⵃⴻⵏ.